ബെംഗളൂരു: കര്‍ണാടക കോലാര്‍ ജില്ലയിലെ മാലൂര്‍ നിയോജക മണ്ഡലം എംഎല്‍എ കെ.വൈ നഞ്ചഗൗഡയുടെ തെരഞ്ഞെടുപ്പ് ഫലം റദ്ദാക്കാനുള്ള നടപടിക്ക് സുപ്രീം കോടതി സ്‌റ്റേ. 2023ലെ തെരഞ്ഞെടുപ്പ് റദ്ദാക്കിക്കൊണ്ടുള്ള കര്‍ണാടക ഹൈക്കോടതിയുടെ ഉത്തരവാണ് ചൊവ്വാഴ്ച്ച സുപ്രീം കോടതി താല്‍ക്കാലികമായി സ്‌റ്റേ ചെയ്തത്. 

മണ്ഡലത്തിലെ വോട്ടുകള്‍ വീണ്ടും എണ്ണാനും ഫലത്തെക്കുറിച്ചുള്ള റിപ്പോര്‍ട്ട് മുദ്രവെച്ച കവറില്‍ സമര്‍പ്പിക്കാനും തെരഞ്ഞെടുപ്പ് കമ്മീഷനോട് കോടതി നിര്‍ദേശിച്ചു. വീണ്ടും എണ്ണിയ ഫലം കോടതി അനുമതിയില്ലാതെ പരസ്യപ്പെടുത്താന്‍ പാടില്ലെന്നും ജസ്റ്റിസുമാരായ വിക്രം നാഥ്, സന്ദീപ് മേത്ത എന്നിവരടങ്ങിയ രണ്ടംഗ ബെഞ്ച് ഉത്തരവില്‍ വ്യക്തമാക്കി.

ALSO READ: ഒരു പവന് മൂന്നര ലക്ഷം രൂപയോ? ഞെട്ടണ്ട ഈ സ്വർണ വില പാകിസ്താനിലാണ്, കാരണം ഇതാണ് 

വോട്ടെണ്ണലിൽ ക്രമക്കേട് നടന്നുവെന്നാരോപിച്ച് എതിർസ്ഥാനാർത്ഥിയായിരുന്ന ബിജെപിയുടെ കെ എസ് മഞ്ജുനാഥ ഗൗഡ ഫയൽ ചെയ്ത ഹരജിയാണ് കർണാടക ഹെെക്കോടതി പരിഗണിച്ചത്. വോട്ടെണ്ണലിൽ തിരിമറി നടന്നതിനാൽ നഞ്ചഗൗഡയുടെ വിജയം റദ്ദാക്കണമെന്നും ഹർജിക്കാരൻ ആവശ്യപ്പെട്ടിരുന്നു.

മണ്ഡലത്തിൽ റീകൗണ്ടിങ് നടത്തി നാലാഴ്ചയ്ക്കകം ഫലം പ്രഖ്യാപിക്കാൻ തെരഞ്ഞെടുപ്പ് കമ്മീഷന് ജസ്റ്റിസ് ആർ ദേവദാസിന്റെ ബെഞ്ച് നിർദേശം നൽകിയിരുന്നു. വോട്ടെണ്ണലിന്റെ വീഡിയോ ദൃശ്യം ഉണ്ടെങ്കിൽ ഹാജരാക്കാൻ കോലാർ ജില്ലാ ഇലക്ഷൻ ഓഫീസർക്ക് കോടതി നിർദേശം നൽകിയിരുന്നു. ഈ ഉത്തരവാണ് സുപ്രീം കോടതി ഇപ്പോൾ സ്റ്റേ ചെയ്തിരിക്കുന്നത്. 

ALSO READ: ഇടുക്കി എസ്‌റ്റേറ്റില്‍ അതിഥി തൊഴിലാളിയായി എത്തിയത് മാവോയിസ്റ്റ്; ഒന്നര വര്‍ഷത്തിന് ശേഷം അറസ്റ്റ്; പിടിയിലായത് മൂന്ന് പൊലിസുകാരെ കൊന്ന പ്രതി