ഡെറാഡൂണ്‍: ഉത്തരാഖണ്ഡിനെ വിറപ്പിച്ച് അജ്ഞാതപ്പനി പടരുന്നു. രണ്ട് ജില്ലകളിലായി 10 പേര്‍ പനി ബാധിച്ച മരിച്ചതായി റിപ്പോര്‍ട്ട്. രണ്ടാഴ്ചക്കുള്ളിലാണ് മരണങ്ങള്‍ റിപ്പോര്‍ട്ട് ചെയ്തിരിക്കുന്നതെന്ന് ആരോഗ്യ അധികൃതര്‍ പറയുന്നു.
രണ്ടാഴ്ചയ്ക്കുള്ളിലാണ് മരണങ്ങള്‍ റിപ്പോര്‍ട്ട് ചെയ്തതെന്ന് ഉദ്യോഗസ്ഥര്‍ പറയുന്നു. അല്‍മോറ ജില്ലയിലെ ധൗലാദേവി ബ്ലോക്കിലാണ് കൂടുതല്‍ മരണങ്ങള്‍ റിപ്പോര്‍ട്ട് ചെയ്യപ്പെട്ടത്. ഇവിടെ ഏഴ് മരണങ്ങളെങ്കിലും റിപ്പോര്‍ട്ട് ചെയ്യപ്പെട്ടിട്ടുണ്ട്. റൂര്‍ക്കിയില്‍ മൂന്ന് പേര്‍ മരിച്ചു.

ഡെങ്കി, മലേറിയ തുടങ്ങിയ വൈറല്‍ അണുബാധകളുമായി ബന്ധപ്പെട്ട ലക്ഷണങ്ങളാണ് കൂടുതലായും രോഗികള്‍ കാണിക്കുന്നത്.  കടുത്ത പനിയും പ്ലേറ്റ്ലെറ്റ് എണ്ണത്തില്‍ അപകടകരമായ കുറവും ഉണ്ടായതായി അധികൃതര്‍ പറഞ്ഞു. പരിശോധനാ ഫലത്തിനായി കാത്തിരിക്കുന്നതിനാല്‍ കൃത്യമായ കാരണം കണ്ടെത്താനായിട്ടില്ല. ലാബ് റിപ്പോര്‍ട്ട് ലഭിച്ചാല്‍ മാത്രമേ അണുബാധയുടെ കൃത്യമായ കാരണം അറിയാന്‍ കഴിയുകയുള്ളുവെന്ന് ചീഫ് മെഡിക്കല്‍ ഓഫീസര്‍ ഡോ. നവീന്‍ ചന്ദ്ര തിവാരിയെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു.

ALSO READ: അവസാനിക്കാത്ത ക്രൂരത; ഗസ്സയിലേക്കുള്ള സഹായം നിയന്ത്രിക്കുമെന്ന് ഇസ്‌റാഈല്‍, ട്രക്കുകളുടെ എണ്ണം പകുതിയായി കുറച്ചു,  നാല് മൃതദേഹം കൂടി വിട്ടുനല്‍കി ഹമാസ്

പനി ബാധിച്ചവരുടെ സാമ്പിളുകള്‍ വിശദമായ പരിശോധനക്കായി അല്‍മോറ മെഡിക്കല്‍ കോളേജിലേക്ക് അയച്ചിട്ടുണ്ടെന്നും ഫലങ്ങള്‍ ഉടന്‍ ലഭിക്കുമെന്നും ഡോ. തിവാരി വ്യക്തമാക്കി. എല്ലാ മരണങ്ങളും ഒരു പകര്‍ച്ചവ്യാധി സ്രോതസ്സുമായി നേരിട്ട് ബന്ധപ്പെട്ടിരിക്കില്ലെന്നും അദ്ദേഹം ചൂണ്ടിക്കാട്ടി.

'ഏഴ് മരണങ്ങളില്‍ മൂന്നെണ്ണം വൈറല്‍ അണുബാധയുമായി ബന്ധപ്പെട്ടതാണെന്ന് തോന്നുന്നു. ബാക്കിയുള്ളവ വാര്‍ധക്യ സഹജമായ ആരോഗ്യപ്രശ്‌നങ്ങള്‍ മൂലമാണെന്ന് കരുതുന്നു' തിവാരി പറഞ്ഞു. എന്നാല്‍ പ്രദേശവാസികള്‍ ആശങ്കയിലാണ്. സംസ്ഥാന സര്‍ക്കാര്‍ പനി ബാധിത പ്രദേശങ്ങളില്‍ ആരോഗ്യ സംഘങ്ങളെ വിന്യസിച്ചിട്ടുണ്ടെന്ന് ആരോഗ്യ സെക്രട്ടറി ആര്‍. രാജേഷ് കുമാര്‍ സ്ഥിരീകരിച്ചു. വൈറല്‍ പനി ആണെന്ന നിഗമനത്തിലാണ് ആരോഗ്യ വകുപ്പ് ഉദ്യോഗസ്ഥര്‍. പകര്‍ച്ചവ്യാധികള്‍ പടരുന്ന സമയമാണിതെന്നും തണുപ്പ് കാലമാകുന്നതോടെ കുറയുമെന്നും വിദഗ്ധര്‍ ചൂണ്ടിക്കാട്ടുന്നു.

പനിയും അനുബന്ധ ലക്ഷണങ്ങളും ഉണ്ടോയെന്ന് പരിശോധിക്കാന്‍ ആരോഗ്യ വകുപ്പ് ബാധിത പ്രദേശങ്ങളില്‍ തീവ്രമായ വീടുതോറുമുള്ള സ്‌ക്രീനിംഗ് കാമ്പെയ്ന്‍ ആരംഭിച്ചിട്ടുണ്ട്. നൂറുകണക്കിന് പേരെ പരിശോധിച്ചു. മാലിന്യം കലര്‍ന്നിട്ടുണ്ടോ എന്ന ആശങ്ക നിലനില്‍ക്കുന്നതിനാല്‍ ജലസ്രോതസ്സുകളും പരിശോധിക്കുന്നുണ്ട്. ശുചിത്വം പാലിക്കാനും കൊതുക് പ്രതിരോധ മരുന്നുകള്‍ ഉപയോഗിക്കാനും പനി ലക്ഷണങ്ങള്‍ കണ്ടാല്‍ ഉടന്‍ റിപ്പോര്‍ട്ട് ചെയ്യാനും അധികൃതര്‍ ജനങ്ങളോട് അഭ്യര്‍ഥിച്ചു.

a mysterious fever outbreak in uttarakhand has caused panic, with 10 deaths reported from almora and haridwar. health officials are investigating the cause.