ചണ്ഡിഗഢ്: രാജ്യസഭാ അംഗത്വം രാജിവച്ച മുന്‍ ക്രിക്കറ്റ് കളിക്കാരനും ബി.ജെ.പി അംഗവുമായിരുന്ന നവ്‌ജോത് സിങ് സിദ്ദുവിന്റെ ആവാസെ പഞ്ചാബ് പാര്‍ട്ടി നിലവില്‍ വന്നു. കാലങ്ങളായി വിവിധ രാഷ്ട്രീയ പാര്‍ട്ടികള്‍ പഞ്ചാബിനോട് കാണിച്ച അവഗണനയ്ക്കുള്ള പകരം വീട്ടലാണ് തന്റെ പാര്‍ട്ടിയെന്ന് സിദ്ദു പറഞ്ഞു. പഞ്ചാബിന്റെ പുനര്‍നിര്‍മാണമാണ് തന്റെ പാര്‍ട്ടിയുടെ പ്രഖ്യാപിത ലക്ഷ്യമെന്നും പണ്ട് നിരവധി നേട്ടങ്ങള്‍ കൈവരിച്ചിട്ടുള്ള പഞ്ചാബില്‍ ഇപ്പോള്‍ നടക്കുന്നത് മയക്കുമരുന്ന് വ്യാപാരമാണെന്നും അത് നിര്‍ത്തലാക്കുമെന്നും അദ്ദേഹം കൂട്ടിച്ചേര്‍ത്തു. ആം ആദ്മി പാര്‍ട്ടിയെയും ബി.ജെ.പിയെയും രൂക്ഷമായ ഭാഷയില്‍ വിമര്‍ശിച്ച സിദ്ദു നല്ല നേതാക്കന്മാരെ ജനങ്ങള്‍ക്കിടയില്‍ പ്രവര്‍ത്തിക്കാന്‍ പലരും അനുവദിക്കുന്നില്ലെന്നും ആക്ഷേപിച്ചു.