കണ്ണൂർ: നഗരമധ്യത്തിലെ വനിതാ ഹോസ്റ്റലിൽ അതിക്രമിച്ചു കയറാൻ ശ്രമിച്ച യുവാവിനെ പിടികൂടി. ഇന്നലെ രാത്രി 10 മണിയോടെ താവക്കരയിലെ ഹോസ്റ്റലിലാണ് സംഭവം. ഹോസ്റ്റലിലെ താമസക്കാർ വിവരമറിയിച്ചതിനെ തുടർന്ന് ടൗൺ പൊലിസ് സ്ഥലത്തെത്തി ഇയാളെ കസ്റ്റഡിയിലെടുക്കുകയായിരുന്നു. പ്രതി മദ്യലഹരിയിലായിരുന്നെന്ന് പൊലിസ് അറിയിച്ചു.

യുവാവ് ജീപ്പിലാണ് ഹോസ്റ്റലിന് സമീപമെത്തിയത്. ജീപ്പ് പുറത്ത് നിർത്തി, മതിൽ ചാടിക്കടക്കാൻ ശ്രമിക്കുന്നത് ഹോസ്റ്റലിലെ താമസക്കാരായ ചില പെൺകുട്ടികൾ കണ്ടു. ഉടൻ തന്നെ ഇവർ വാർഡനെ വിവരമറിയിച്ചു.

സെക്യൂരിറ്റി ജീവനക്കാർ പരിശോധിക്കാൻ എത്തിയതോടെ യുവാവ് ഓടി രക്ഷപ്പെടാൻ ശ്രമിച്ചു. എങ്കിലും ജീവനക്കാർ ഇയാളെ പിടികൂടി പൊലിസിൽ ഏൽപ്പിക്കുകയായിരുന്നു. മദ്യലഹരിയിലായിരുന്ന പ്രതിയുടെ യഥാർത്ഥ ഉദ്ദേശ്യമെന്തെന്നും, ഇയാൾക്കൊപ്പം മറ്റാരെങ്കിലും ഉണ്ടായിരുന്നോ എന്നും ഉൾപ്പെടെയുള്ള കാര്യങ്ങൾ പൊലിസ് അന്വേഷിച്ചുവരികയാണ്.