കൊച്ചി: ദീപാവലിയുമായി ബന്ധപ്പെട്ട് ബിപിസിഎല്‍ കമ്പനി വിതരണം ചെയ്ത സ്വീറ്റ്‌സ് ബോക്‌സ് ലഭിച്ചില്ലെന്ന് ആരോപിച്ച് അമ്പലമുകളില്‍ ട്രക്ക് ഡ്രൈവര്‍മാര്‍ മിന്നല്‍ പണിമുടക്ക് നടത്തി. ബിപിസിഎല്‍ ബോട്ടില്ങ് പ്ലാന്റിലാണ് ഡ്രൈവര്‍മാര്‍ ഇന്ന് രാവിലെ മുതല്‍ ഉച്ചവരെ മിന്നല്‍ പണിമുടക്ക് നടത്തിയത്. പണിമുടക്ക് ചില ജില്ലകളിലെ ഗ്യാസ് വിതരണത്തെ ബാധിച്ചതായും റിപ്പോര്‍ട്ടുണ്ട്. 

പ്ലാന്റിലെ സ്ഥിരം ജീവനക്കാര്‍ക്കും, കയറ്റിറക്ക് തൊഴിലാളികള്‍ക്കും സ്വീറ്റ് ബോക്‌സ് നല്‍കിയെന്നും തങ്ങളെ ഒഴിവാക്കിയെന്നും കാണിച്ചാണ് തൊഴിലാളികള്‍ പ്രതിഷേധിച്ചത്. 9 മണിയായിട്ടും സമരം പരിഹരിക്കാതായതോടെ ആറ് ജില്ലകളിലേക്കുള്ള സിലിണ്ടര്‍ നീക്കം നിലച്ചു. ഞായറാഴ്ച്ചയും, തിങ്കളാഴ്ച്ചയും പൊതു അവധി ആയതിന് പിന്നാലെയാണ് ചൊവ്വാഴ്ച്ച ഡ്രൈവര്‍മാരുടെ മിന്നല്‍ പണിമുടക്കും എത്തിയത്. ഇതോടെ ഗ്യാസ് ലഭിക്കാത്ത സാഹചര്യവും ഉണ്ടായി. അധികാരികള്‍ ഇടപെട്ട് ചര്‍ച്ച നടത്തിയതോടെ ഉച്ചയോടെ പണിമുടക്ക് അവസാനിപ്പിച്ച് തൊഴിലാളികള്‍ ജോലിയില്‍ പ്രവേശിക്കുകയും ചെയ്തു.

ALSO READ: അമിത് ഷായും ധർമേന്ദ്ര പ്രധാനും ചേർന്ന് തന്റെ സ്ഥാനാർത്ഥികളെ ഭീഷണിപ്പെടുത്തി പിന്തിരിപ്പിച്ചു; ബിജെപിക്കെതിരെ ​ഗുരുതര ആരോപണവുമായി പ്രശാന്ത് കിഷോർ 

bpcl truck drivers stage flash strike at ambalamukku alleging non-receipt of diwali sweets box.