കോഴിക്കോട്: കല്ലുത്താൻക്കടവിലെ ന്യൂ പാളയം മാർക്കറ്റ് ഉദ്ഘാടന ദിവസം പാളയത്ത് വ്യാപാരികളുടെയും തൊഴിലാളികളുടെയും പ്രതിഷേധം. മനുഷ്യച്ചങ്ങല തീർത്തും കറുത്തതുണികൊണ്ട് വായമൂടിക്കെട്ടി കരിദിനം ആചരിച്ചുമായിരുന്നു പ്രതിഷേധം. ഇതിനിടെ മാർക്കറ്റ് മാറ്റത്തിന് പിന്തുണ പ്രഖ്യാപിച്ച് വ്യാപാരി വ്യവസായി സമിതി പ്രവർത്തകർ പ്രകടനമായെത്തിയതോടെ പാളയത്ത് സംഘർഷാവസ്ഥയായി. ഇന്നലെ രാവിലെ ഒൻപതോടെയാണ് പ്രതിഷേധമാരംഭിച്ചത്.
 
പാളയം ബസ് സ്റ്റാൻഡ് ഗേറ്റുമുതൽ അളകാപുരി ഹോട്ടൽ വരെയാണ് പാളയത്തെ കച്ചവടക്കാർ മനുഷ്യച്ചങ്ങല തീർത്തത്. സി.ഐ.ടി.യു ഒഴികെ മറ്റു  ട്രേഡ് യൂനിയൻ പ്രവർത്തകരും കച്ചവടക്കാരിൽ ഭൂരിപക്ഷം പേരും ചങ്ങലയിൽ കണ്ണികളായി. കറുത്ത ബാഡ്ജും കറുത്തകൊടി ഉയർത്തിയും  കോർപറേഷനെതിരേ മുദ്രാവാക്യമുയർത്തിയുമാണ് പ്രതിഷേധക്കാർ അണിചേർന്നത്. 

പ്രതിഷേധം നടന്നുകൊണ്ടിരിക്കെയാണ് പാളയം ബസ് സ്റ്റാൻഡിൽനിന്ന് ചെണ്ടവാദ്യങ്ങളുമായി വ്യാപാരി വ്യവസായി സമിതി പ്രവർത്തകർ കോർപറേഷനു പിന്തുണയുമായി കല്ലുത്താൻകടവിലേക്ക് ഘോഷയാത്ര തുടങ്ങിയത്. ഇതോടെ ഇരുവിഭാഗവും തമ്മിൽ വാക്കേറ്റവും ഉന്തുംതള്ളുമായി. പൊലിസുമായും വാക്കേറ്റമുണ്ടായി. ഏറെ നേരത്തെ ശ്രമഫലമായാണ് സ്ഥിതിഗതികൾ നിയന്ത്രിക്കാനായത്.  അതേസമയം യാതൊരു സൗകര്യവും ഇല്ലാതെയാണ് കല്ലുത്താൻകടവിൽ കെട്ടിടം നിർമിച്ചിരിക്കുന്നതെന്നാണ് പ്രതിഷേധിച്ച വ്യാപാരികൾ പറയുന്നത്.

പാളയം മാർക്കറ്റിന്റെ പകുതി സൗകര്യം പോലുമില്ലാത്ത ഇടത്തേക്കാണ് മാർക്കറ്റ് മാറ്റാൻ ശ്രമിക്കുന്നത്. പല കടമുറികളും 50, 60 സ്‌ക്വയർഫീറ്റ് മാത്രമാണുള്ളത്. ഈ സ്ഥലത്ത് ഒരു ത്രാസും മേശയും ഇട്ട് കഴിഞ്ഞാൽ യാതൊരു സൗകര്യവും ഉണ്ടാവില്ല. താഴത്തെ കടകളൊന്നും പാളയം മാർക്കറ്റിലെ കച്ചവടക്കാർക്ക് ഉള്ളതല്ല. അതിനാൽ ചരക്കുകൾ ഉൾപ്പെടെ വരുമ്പോൾ മുകളിലേക്ക് കയറ്റുന്നതും ഇറക്കുന്നതും വലിയ ബുദ്ധിമുട്ടാണ് ഉണ്ടാക്കുക. രാഷ്ട്രീയ കളികളാണ് ഇവിടെ നടക്കുന്നതെന്നും ഞങ്ങൾ രാഷ്ട്രീയത്തിനില്ലെന്നും രാഷ്ട്രീയത്തിനതീതമായിട്ടുള്ള പ്രതിഷേധമാണ് നടത്തുന്നതെന്ന് കച്ചവടക്കാർ പറയുന്നു. പ്രതിഷേധത്തിന് കോഡിനേഷൻ കമ്മിറ്റി കൺവീനർ എ.ടി അബു, ചെയർമാൻ പി.കെ കൃഷ്ണദാസ്, നാസർ കരിമാടം, കെ.വി അബ്ദുൾ ജലീൽ, പി. അബ്ദുൾ റഷീദ്, എം. മുഹമ്മദ് ബഷീർ, ടി. മുഹമ്മദ് മുസ്തഫ, കെ.വി.വി.ഇ.എസ് ജില്ലാ സെക്രട്ടറി സുനിൽ കുമാർ, ജില്ലാ വൈസ് പ്രസിഡന്റ് മനാഫ് കാപ്പാട് എന്നിവർ നേതൃത്വം നൽകി.