ന്യൂഡല്‍ഹി: ആം ആദ്മി സര്‍ക്കാര്‍ 21 എം.എല്‍.എമാരെ പാര്‍ലമെന്ററി സെക്രട്ടറിമാരായി നിയമിച്ച തീരുമാനം ഡല്‍ഹി ഹൈക്കോടതി റദ്ദാക്കി. ഗവര്‍ണറുടെ അനുമതിയില്ലാതെയാണ് നിയമനം നടത്തിയതെന്ന് സംസ്ഥാന സര്‍ക്കാര്‍ കോടതിയില്‍ സമ്മതിച്ചിരുന്നു. പാര്‍ലമെന്ററി സെക്രട്ടറിമാരുടെ നിയമനം ഭരണഘടനാ വിരുദ്ധവും നിയമ വിരുദ്ധവുമാണെന്ന് കാണിച്ച് സന്നദ്ധ സംഘടനയായ രാഷ്ട്രീയ മുക്തി മോര്‍ച്ച സമര്‍പ്പിച്ച പൊതു താല്‍പര്യ ഹരജിയില്‍ ഡല്‍ഹി ഹൈക്കോടതിയുടെ ബഞ്ചാണ് വിധി പറഞ്ഞത്.
നേരത്തെ പാര്‍ലമെന്ററി സെക്രട്ടറിമാരെ നിയമിക്കാനുള്ള ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്റെ തീരുമാനം ചര്‍ച്ചയായിരുന്നു. നിയമന തീരുമാനത്തിന് അംഗീകാരം നല്‍കാന്‍ രാഷ്ട്രപതി തയാറായിരുന്നില്ല. സര്‍ക്കാര്‍ പദവികളില്‍ ഇരട്ട പദവി വഹിക്കുന്നത് തടഞ്ഞു കൊണ്ടുള്ള നിയമം ചൂണ്ടിക്കാട്ടിയാണ് രാഷ്ട്രപതി നിയമനത്തിന് അംഗീകാരം നല്‍കാതിരുന്നത്. എന്നാല്‍ ഡല്‍ഹി ഭരണത്തിനെതിരേ കേന്ദ്രം നടത്തുന്ന നീക്കങ്ങളാണിതെന്നായിരുന്നു ആപ്പിന്റെ ആരോപണം.