ഫുജൈറ: അടുത്തിടെയാണ് ഗുബ്ബ് ഇൻ്റേണൽ റോഡിൽ സുരക്ഷിതമല്ലാത്ത രീതിയിൽ റോഡിലേക്ക് പ്രവേശിച്ചതിനെ തുടർന്നുണ്ടായ അപകടത്തിൽ 20 വയസ്സുള്ള ഇമാറാത്തി യുവാവ് മരിച്ചത്. അപകടത്തിൽ നാലു പേർക്ക് പരുക്കേറ്റിരുന്നു. അപകടത്തെത്തുടർന്ന് ഡ്രൈവർമാർക്ക് ഫുജൈറ പൊലിസ് ജാഗ്രതാ നിർദ്ദേശം പുറപ്പെടുവിച്ചു.

ഞായറാഴ്ച രാവിലെയാണ് അപകടം നടന്നത്. അപകടത്തിൽപ്പെട്ട വാഹനം റോഡിലേക്ക് പ്രവേശിച്ചപ്പോൾ സുരക്ഷിതമാണെന്ന് ഉറപ്പാക്കാതിരുന്നതാണ് രണ്ട് കാറുകൾ തമ്മിൽ കൂട്ടിയിടിക്കാൻ കാരണമായതെന്ന് അധികൃതർ വിശദീകരിച്ചു.

ALSO READ: ഓൺലൈൻ തട്ടിപ്പുകളിലൂടെ നഷ്ടപ്പെട്ട 140 മില്യൺ ദിർഹം തിരിച്ചുപിടിച്ച് അബൂദബി പൊലിസ് 

"അപകടത്തിൽ ഒരു യാത്രക്കാരൻ സംഭവസ്ഥലത്ത് വെച്ച് തന്നെ മരിച്ചു. മറ്റ് നാല് പേർക്ക് പരുക്കേറ്റു. പരുക്കേറ്റവരുടെ നില തൃപ്തികരമാണ്. ഉടൻ ആശുപത്രി വിടാൻ സാധിക്കുമെന്നാണ് പ്രതീക്ഷ," ഫുജൈറ പൊലിസിലെ ട്രാഫിക് ആൻഡ് പട്രോൾസ് ഡിപ്പാർട്ട്‌മെന്റ് ഡയറക്ടർ ബ്രിഗേഡിയർ ജനറൽ സാലിഹ് മുഹമ്മദ് അബ്ദുല്ല അൽ സനാഹാനി പറഞ്ഞു.

പൊലിസിന്റെ മുന്നറിയിപ്പ്

വൈകുന്നേരങ്ങളിലും അവധി ദിവസങ്ങളിലും ഗതാഗതക്കുരുക്ക് കൂടുതലുള്ള ഉൾപ്രദേശ റോഡുകളിൽ വാഹനമോടിക്കുമ്പോൾ അതീവ ജാഗ്രത പാലിക്കണമെന്ന് സാലിഹ് മുഹമ്മദ് അബ്ദുല്ല എല്ലാവരോടും അഭ്യർത്ഥിച്ചു.

ALSO READ: യുവതിയുടെ ഫോട്ടോകളും വീഡിയോകളും ഓൺലൈനിൽ പ്രചരിപ്പിച്ചു; യുവാവിന് നാല് ലക്ഷം രൂപ പിഴ ചുമത്തി അബൂദബി കോടതി 

"എല്ലാ റോഡ് ഉപയോക്താക്കളോടും വേഗപരിധി പാലിക്കാനും, മൊബൈൽ ഫോൺ ഉപയോഗം പോലുള്ള ശ്രദ്ധ തിരിക്കുന്ന കാര്യങ്ങൾ ഒഴിവാക്കാനും, റോഡിൽ പ്രവേശിക്കുന്നതിനോ പാത മാറുന്നതിനോ മുമ്പ് റോഡ് വ്യക്തമാണെന്ന് ഉറപ്പാക്കാനും ഞങ്ങൾ ആവശ്യപ്പെടുന്നു. ഓരോ ഡ്രൈവറുടെയും ശ്രദ്ധ ഒരു ദുരന്തം തടയാൻ സഹായിക്കും," ബ്രിഗേഡിയർ അൽ സനാഹാനി കൂട്ടിച്ചേർത്തു.

യുഎഇയിലെ ഗതാഗത നിയമങ്ങൾ അനുസരിച്ച്, സുരക്ഷിതത്വം ഉറപ്പാക്കാതെ റോഡിൽ പ്രവേശിക്കുന്നവർക്ക് 400 ദിർഹം പിഴയും നാല് ബ്ലാക്ക് പോയിന്റുകളും ലഭിക്കുമെന്ന് പൊലിസ് ഓർമ്മിപ്പിച്ചു. അമിത വേഗതയ്ക്ക് 300 ദിർഹം മുതൽ 3,000 ദിർഹം വരെ പിഴ ഈടാക്കും.

tragic road accident in fujairah claims one life, prompting police to issue severe warning to drivers on speeding and reckless driving. uae authorities vow stricter penalties and patrols to enhance road safety.