നെടുമ്പാശ്ശേരി:ഇന്ത്യയില്‍ നിന്നും ഹജ്ജ് കമ്മിറ്റി വഴി ഹജ്ജ് കര്‍മത്തില്‍ പങ്കെടുക്കാന്‍ തീര്‍ഥാടകരെ യാത്രയാക്കിയതില്‍ രണ്ടാം സ്ഥാനത്ത് നെടുമ്പാശ്ശേരി വിമാനത്താവളം.10,524 പേരാണ് ഇവിടെ നിന്നും യാത്രയായത്. രാജ്യത്തെ 21 എംബാര്‍ക്കേഷന്‍ പോയിന്റുകള്‍ വഴി 1,00,612 പേരാണ് ഈ വര്‍ഷം മക്കയില്‍ എത്തിയിരിക്കുന്നത്. 36000 പേര്‍ സ്വകാര്യ ഗ്രൂപ്പുകള്‍ വഴിയും എത്തിയിട്ടുണ്ട്.12339 തീര്‍ഥാടകര്‍ പുറപ്പെട്ട ഡല്‍ഹിയില്‍ നിന്നാണ് ഏറ്റവും കൂടുതല്‍ പേര്‍ ഹജ്ജ് കമ്മിറ്റി വഴി യാത്രയായത്. ഇതില്‍ 7700 ഓളം പേര്‍ ഉത്തര്‍ പ്രദേശില്‍ നിന്നുള്ളവരാണ്. ഏറ്റവും കൂടുതല്‍ പേര്‍ ഹജ്ജിന് പുറപ്പെടുന്ന ഉത്തര്‍ പ്രദേശില്‍ നിന്നുള്ള തീര്‍ഥാടകര്‍ക്ക് ലക്‌നൗ,വാരണാസി വിമാനത്താവളങ്ങള്‍ക്ക് പുറമെ ഡല്‍ഹിയിലും എംബാര്‍ക്കേഷന്‍ പോയിന്റുണ്ട്.

മദീന വഴി എത്തിയവര്‍ ജിദ്ദ വിമാനത്താവളം വഴിയും,ജിദ്ദ വിമാനത്താവളം വഴി എത്തിയവര്‍ മദീനയില്‍ നിന്നുമാണ് നാട്ടിലേക്ക് മടങ്ങുന്നത്. ഹജ്ജ് കര്‍മം പൂര്‍ത്തിയാക്കിയ ശേഷം ഈ 16 നാണ് ഇന്ത്യന്‍ തീര്‍ഥാടകരുടെ മടക്കയാത്ര ആരംഭിക്കുന്നത്. നെടുമ്പാശ്ശേരിയില്‍ നിന്നും യാത്രയായ ആദ്യ സംഘം ഈ മാസം 29 ന് മടങ്ങിയെത്തും.