കൊച്ചി: അധ്യാപകർ വിദ്യാർഥികൾക്കെതിരെ ചൂരൽ പ്രയോഗം നടത്തുന്നത് കുറ്റകരമല്ലെന്ന് ഹൈക്കോടതി. സ്കൂൾ അച്ചടക്കത്തിൻറെയും കുട്ടികളെ​ തിരുത്തലിൻറെയും ഭാഗമായി ഉപയോഗിക്കാമെന്ന് ചൂണ്ടിക്കാണിച്ച് കോടതി. അച്ചടക്കം ഉറപ്പാക്കാനും കുട്ടികളുടെ തെറ്റ്​ തിരുത്താനുമുള്ള അധികാരം അധ്യാപകർക്കുണ്ട്​ എന്നും കോടതി നിരീക്ഷിച്ചു. ജസ്റ്റിസ്​ സി. പ്രതീപ്​ കുമാറാണ് ഈ നിരീക്ഷണം നടത്തിയത്.

സ്കൂളിൽ ​ചേർത്ത് കുട്ടികളെ അധ്യാപകരുടെ ശിക്ഷണത്തിലേക്ക്​ വിടുമ്പോൾ കുട്ടികളുടെ തെറ്റ് തിരുത്താനുള്ള ഈ അധികാരങ്ങളും അവർക്ക്​ രക്ഷിതാക്കൾ കൈമാറുന്നുണ്ട്​ എന്നും കോടതി നിരീക്ഷിച്ചു. അഞ്ചാംക്ലാസ്​ വിദ്യാർഥികളായ മൂന്ന് കുട്ടികൾ തമ്മിൽ തല്ലുകൂടിയപ്പോൾ ചൂരൽകൊണ്ട്​ തല്ലിയ​ ​അധ്യാപകനെതിരെ വടക്കാ​ഞ്ചേരി പൊലിസ്​ രജിസ്റ്റർ ചെയ്ത കേസ്​ റദ്ദാക്കിയാണ്​ കോടതിയുടെ പരാമർശം.

ALSO READ: പിഎം ശ്രീയിൽ ഒപ്പുവെച്ച് കേരളവും: ചർച്ചയില്ലാതെ ഒറ്റയ്ക്ക് തീരുമാനമെടുത്ത് സർക്കാർ; സിപിഐക്ക് കനത്ത തിരിച്ചടി

മൂന്ന്​ വിദ്യാർഥികൾ പരസ്പരം വടി ഉപയോഗിച്ച്​ തല്ലിയും തുപ്പിയും വഴക്കിടുന്നത്​ ശ്രദ്ധയിൽപെട്ട അധ്യാപകൻ അവരുടെ കാലിൽ ചൂരൽ കൊണ്ട് അടിച്ചിരുന്നു. ഇതിനെതിരെ​ രക്ഷിതാവ്​ വടക്കാഞ്ചേരി സ്റ്റേഷനിൽ നൽകിയ പരാതിയിലാണ്​ കേസെടുത്തത്​. 

എന്നാൽ, അടികൂടിയ കുട്ടികളെ തടയുകയല്ലാതെ മറ്റൊരു ഉദ്ദേശ്യവും അധ്യാപകന് ഉണ്ടായിരുന്നില്ലെന്ന് കോടതി കണ്ടെത്തി. ശരിയായ ലക്ഷ്യത്തോടെ കുട്ടികളെ അധ്യാപകൻ അടിച്ചാൽ അതിൽ തെറ്റില്ലെന്നും ​കോടതി വ്യക്തമാക്കി. അധ്യാപകൻറെ സദുദ്ദേശത്തെ തിരിച്ചറിയാത്ത രക്ഷിതാക്കളുടെ നടപടിയെ കോടതി വിമർശിച്ചു.