അബൂദബി: അബുദാബിയിലെ സ്കൂളുകളിൽ "ചുവപ്പ് ഗുളികകൾ" (Red Pills) വിതരണം ചെയ്യുന്നതായി സോഷ്യൽ മീഡിയയിൽ പ്രചരിക്കുന്ന വാർത്തകൾ പൂർണ്ണമായും അടിസ്ഥാനരഹിതമാണെന്ന് അബൂദബി പോലീസ് വ്യക്തമാക്കി.

ആൻ്റി-നാർക്കോട്ടിക്സ് ഡയറക്ടറേറ്റ് ഡയറക്ടർ ബ്രിഗേഡിയർ താഹെർ ഗരീബ് അൽ ദഹേരിയാണ് ഈ അവകാശവാദങ്ങൾ നിഷേധിച്ചത്. യുഎഇയിലെ സ്കൂളുകളിലോ സർവകലാശാലകളിലോ ഇത്തരം ഗുളികകൾ നിലവിലില്ലെന്ന് അദ്ദേഹം മാതാപിതാക്കൾക്കും പൊതുജനങ്ങൾക്കും ഉറപ്പ് നൽകി.

ALSO READ: ദുബൈയിലെ ഔദ് മേത്ത റോഡിൽ കാറിന് തീപിടിച്ചു; അര മണിക്കൂറിലേറെ ​ഗതാ​ഗത തടസ്സം നേരിട്ടു 

"ഓരോ അധ്യയന വർഷത്തിൻ്റെ തുടക്കത്തിലും ചുവന്ന ഗുളികകൾ വിതരണം ചെയ്യുന്നതായുള്ള തെറ്റായ വാർത്തകൾ സോഷ്യൽ മീഡിയയിൽ വീണ്ടും പ്രത്യക്ഷപ്പെടാറുണ്ട്. ഈ അവകാശവാദങ്ങൾ ശരിയല്ല," അൽ ദഹേരി പറഞ്ഞു.

പൊതുജനാഭിപ്രായം അസ്ഥിരപ്പെടുത്താനായി ചില ഓൺലൈൻ ഗ്രൂപ്പുകൾ ഇത്തരം വ്യാജ പ്രചാരണങ്ങൾ പ്രോത്സാഹിപ്പിക്കുന്നുണ്ടെന്നും അദ്ദേഹം ചൂണ്ടിക്കാട്ടി. വിശ്വസനീയവും ഔദ്യോഗികവുമായ സ്രോതസ്സുകളിൽ നിന്ന് മാത്രം വാർത്തകൾ ശേഖരിക്കേണ്ടതിൻ്റെ പ്രാധാന്യം അദ്ദേഹം ചൂണ്ടിക്കാട്ടി.

പരമ്പരാഗത മയക്കുമരുന്ന് ഉപയോഗം ആശങ്കയായി തുടരുമ്പോൾ തന്നെ, 'സുരക്ഷിതം' അല്ലെങ്കിൽ 'നിയമപരമായത്' എന്ന ലേബലിൽ ഓൺലെെനിൽ വിപണനം ചെയ്യുന്ന ഇതര പദാർത്ഥങ്ങൾ (alternative substances) പരീക്ഷിക്കുന്ന പ്രവണത യുവാക്കൾക്കിടയിൽ വർധിക്കുന്നതായി യുഎഇയിലെ ദേശീയ പുനരധിവാസ കേന്ദ്രം (NRC) വ്യക്തമാക്കി. കുറിപ്പടി മരുന്നുകൾ ദുരുപയോഗം ചെയ്യുകയോ, വീട്ടുപകരണങ്ങൾ ലഹരിക്കായി ഉപയോഗിക്കുകയോ ചെയ്യുന്ന രീതികളും ഇതിൽ ഉൾപ്പെടുന്നു.

ALSO READ: ഷാർജയിൽ നവംബർ 1 മുതൽ പുതിയ ഗതാഗത നിയമം; ബൈക്കുകൾക്കും ലോറികൾക്കും ബസുകൾക്കും പ്രത്യേക പാതകൾ 

മയക്കുമരുന്ന് കടത്തുകാർ ഊർജ്ജ പാനീയങ്ങൾ, ച്യൂയിംഗ് ഗം പോലുള്ള ദൈനംദിന ഉൽപ്പന്നങ്ങളിൽ ഒളിപ്പിച്ച് ലഹരിവസ്തുക്കൾ വിതരണം ചെയ്യാൻ ശ്രമിക്കുന്ന പുതിയ തന്ത്രങ്ങൾ ദുബൈ പബ്ലിക് പ്രോസിക്യൂഷൻ അടുത്തിടെ കണ്ടെത്തിയിരുന്നു. പുതിയ സൈക്കോ ആക്റ്റീവ് ലഹരിവസ്തുക്കൾ (NPS) ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാം എന്ന് ലോകാരോഗ്യ സംഘടന മുന്നറിയിപ്പ് നൽകുന്നു.

യുവാക്കളെ ലഹരിവസ്തുക്കളുടെ അപകടങ്ങളിൽ നിന്ന് സംരക്ഷിക്കുന്നതിനായി പൊലിസ് വകുപ്പുകളും സ്കൂളുകളും മറ്റ് കമ്മ്യൂണിറ്റി സംഘടനകളും ചേർന്ന് യുഎഇയിലുടനീളം ബോധവൽക്കരണ പരിപാടികളും വർക്ക്‌ഷോപ്പുകളും സംഘടിപ്പിക്കുന്നുണ്ട്. 

abu dhabi police have denied rumors about the distribution of so-called ‘red pills’ in local schools, confirming that the circulating social media reports are false and urging the public not to spread misinformation.