യുവേഫ ചാമ്പ്യൻസ് ലീഗിൽ കഴിഞ്ഞ ദിവസം നടന്ന മത്സരത്തിൽ ജർമ്മൻ വമ്പൻമാരായ ബയേൺ മ്യൂണിക് തകർപ്പൻ വിജയമാണ് സ്വന്തമാക്കിയത്. ബെൽജിയം ടീമായ ക്ലബ്‌ ബ്രഗ്ഗിനെതിരെ എതിരില്ലാത്ത നാലു ഗോളുകൾക്കായിരുന്നു ബയേണിന്റെ വിജയം. 

മത്സരത്തിൽ ബയേൺ മ്യൂണിക്കിന്റെ ഇംഗ്ലണ്ട് സൂപ്പർ താരം ഹാരി കെയ്ൻ തന്റെ കരിയറിലെ ഒരു പുതിയ നാഴികക്കല്ലും സ്വന്തമാക്കിയിരിക്കുകയാണ്. മത്സരത്തിൽ ഒരു ഗോൾ നേടിയാണ് ഹാരി കെയ്ൻ തിളങ്ങിയത്. ഈ സീസണിൽ ജർമ്മൻ ക്ലബ്ബിനുവേണ്ടി കെയ്ൻ നേടുന്ന 20ാം ഗോൾ ആയിരുന്നു ഇത്.

ഇതോടെ ഇതിഹാസ താരങ്ങളായ ലയണൽ മെസിയുടെയും ക്രിസ്റ്റ്യാനോ റൊണാൾഡോയുടെയും പേരിലുണ്ടായിരുന്ന ഒരു അപൂർവ റെക്കോർഡും കെയ്ൻ തകർത്തിരിക്കുകയാണ്. ഒരു സീസണിൽ ഏറ്റവും വേഗത്തിൽ 20 ഗോളുകൾ സ്വന്തമാക്കുന്ന താരമെന്ന റെക്കോർഡിലേക്കാണ് കെയ്ൻ നടന്നു കയറിയത്. വെറും 12 മത്സരങ്ങളിൽ നിന്നുമാണ് താരം ബയേണിനായി 20 ഗോളുകൾ അടിച്ചുകൂട്ടിയത്. 

2014-15 സീസണിൽ റയൽ മാഡ്രിഡിന് വേണ്ടി വെറും 13 മത്സരങ്ങളിൽ നിന്നുമായിരുന്നു റൊണാൾഡോ 20 ഗോളുകൾ നേടിയത്. അതേസമയം മെസി ഒരു സീസണിൽ 20 ഗോളുകൾ നേടിയത് 17 മത്സരങ്ങളിൽ നിന്നുമായിരുന്നു. മൂന്ന് സീസണുകളിൽ മെസി ഇത്തരത്തിൽ 17 മത്സരങ്ങളിൽ നിന്നും 20 ഗോളുകൾ സ്വന്തമാക്കിയിട്ടുണ്ട്. 

അതേസമയം മത്സരത്തിൽ ബയേൺ മ്യൂണിക്കിന് വേണ്ടി ഹാരി കെയ്നിന് പുറമെ ലെന്നാർട്ട് കാൾ, ലൂയിസ് ഡയസ്, നിക്കോളാസ് ജാക്സൺ എന്നിവരും ഗോൾ നേടി. മത്സരത്തിൽ സർവ്വാധിപത്യവും ജർമൻ വമ്പൻമാരുടെ കൈവശമായിരുന്നു. 60 ശതമാനം ബോൾ പൊസഷൻ സ്വന്തമാക്കിയ ബയേൺ മ്യൂണിക്ക് 20 ഷോട്ടുകളാണ് എതിർ ടീമിന്റെ പോസ്റ്റിലേക്ക് ഉതിർത്തത്. ഇതിൽ 10 ഷോട്ടുകളും ഓൺ ടാർഗറ്റിലേക്ക് ആയിരുന്നു. മറുഭാഗത്ത് മൂന്ന് ഷോട്ടുകളിൽ നിന്നും വെറും രണ്ട് ഷോട്ടുകൾ മാത്രമാണ് ബയേൺ പോസ്റ്റിലേക്ക് ഉന്നം വെക്കാൻ ബെൽജിയം ക്ലബിന് സാധിച്ചത്.

നിലവിൽ ചാമ്പ്യൻസ് ലീഗ് പോയിന്റ് പട്ടികയിൽ മൂന്നു മത്സരങ്ങളും വിജയിച്ചുകൊണ്ട് ഒമ്പത് പോയിന്റുമായി രണ്ടാം സ്ഥാനത്താണ് ബയേൺ. അതേസമയം ബുണ്ടസ് ലീഗയിലും അവിസ്മരണീയമായ കുതിപ്പാണ് ജർമ്മൻ വമ്പന്മാർ നടത്തിക്കൊണ്ടിരിക്കുന്നത്. ലീഗിലെ ആദ്യ ഏഴ് മത്സരങ്ങളും വിജയിച്ചു കൊണ്ട് 21 പോയിന്റുമായി ഒന്നാം സ്ഥാനത്താണ് ബയേൺ.