കൊച്ചി: വൈസ് ചാന്‍സിലര്‍ റദ്ദാക്കിയ കാലിക്കറ്റ് സര്‍വകലാശാല ഡിപ്പാര്‍ട്ട്‌മെന്റ് സ്റ്റുഡന്റ്‌സ് യൂനിയന്‍ (ഡി.എസ്.യു) തെരഞ്ഞെടുപ്പ് വീണ്ടും നടത്താന്‍ ഉത്തരവിട്ട് ഹൈക്കോടതി. ഒക്ടോബര്‍ 31നുള്ളില്‍ തിരഞ്ഞെടുപ്പ് പൂര്‍ത്തിയാക്കണമെന്നും, ആവശ്യമെങ്കില്‍ പൊലിസ് സഹായം തേടാനും കോടതി നിര്‍ദേശിച്ചു. ക്രമക്കേട് പരാതിയെ തുടര്‍ന്നാണ് നേരത്തെ നടത്തിയ തെരഞ്ഞെടുപ്പ് വിസി റദ്ദാക്കിയത്. 

തെരഞ്ഞെടുപ്പ് വീണ്ടും നടത്തണമെന്ന് ആവശ്യപ്പെട്ട് എസ്.എഫ്.ഐ, കെ.എസ്.യു മുന്നണി ചെയര്‍മാന്‍ സ്ഥാനാര്‍ഥികള്‍ നല്‍കിയ ഹരജികളാണ് ജസ്റ്റിസ് വിജി അരുണ്‍ പരിഗണിച്ചത്. നേരത്തെ നടന്ന തെരഞ്ഞെടുപ്പും വോട്ടെണ്ണലുമായി ബന്ധപ്പെട്ട ക്രമക്കേടുകളിലെ പരാതികളില്‍ നിഷ്പക്ഷ അന്വേഷണം തുടരാമെന്ന് കോടതി വ്യക്തമാക്കി. പുതിയ തെരഞ്ഞെടുപ്പ് എത്രയും വേഗം നടത്താനുള്ള നടപടികള്‍ സ്വീകരിക്കാന്‍ വി.സി ഉത്തരവിടണം. സമാധാനപരമായ തെരഞ്ഞെടുപ്പ് ഉറപ്പാക്കാന്‍ പൊലിസ് സഹായം തേടാമെന്നും കോടതി അറിയിച്ചു. 

അതേസമയം നവംബര്‍ ആദ്യവാരം പരീക്ഷ ആരംഭിക്കുന്നതിന് മുന്‍പായി തെരഞ്ഞെടുപ്പ് പൂര്‍ത്തിയാക്കാമെന്നായിരുന്നു സര്‍വകലാശാലയുടെ നിലപാട്. ഇതുപ്രകാരമാണ് നിലവിലെ വിജ്ഞാപന പ്രകാരമുള്ള നടപടിക്രമങ്ങള്‍ 31നകം പൂര്‍ത്തിയാക്കാന്‍ കോടതി ഉത്തരവിട്ടത്.

ALSO READ: കേരളം പി.എം ശ്രീയില്‍ ഒപ്പുവെച്ചത് ഈ മാസം 16ന്; മന്ത്രിസഭാ യോഗത്തില്‍ സര്‍ക്കാരിന്റെ ഒളിച്ചുകളി