ഇന്‍ഡോര്‍: രാജ്യത്തിന് നാണക്കേടായി ഓസ്‌ട്രേലിയന്‍ വനിത ക്രിക്കറ്റ് താരങ്ങള്‍ക്ക് നേരെ ലൈംഗികാതിക്രമം. സംഭവത്തില്‍ ഇന്‍ഡോര്‍ സ്വദേശിയായ അഖില്‍ ഖാനെ പിടികൂടിയതായി ഇന്‍ഡോര്‍ പൊലിസ് അറിയിച്ചു. വ്യാഴാഴ്ച്ചയാണ് കേസിനാസ്പദമായ സംഭവം. 

ഐ.സി.സി വനിത ക്രിക്കറ്റ് ലോകകപ്പിന് എത്തിയ രണ്ട് താരങ്ങള്‍ക്ക് നേരെയാണ് ആക്രമണമുണ്ടായത്. വ്യാഴാഴ്ച്ച രാവിലെ ഖജ്‌റാന റോഡിന് സമീപം കഫേയിലേക്ക് നടന്നു പോവുന്നതിന് ഇടിയിലാണ്  ബൈക്കിലെത്തിയ പ്രതി ഇവരെ കയറി പിടിച്ചത്. ഉടന്‍ തന്നെ യുവതികള്‍ ടീം സെക്യൂരിറ്റി ഓഫീസര്‍ ഡാനി സിമ്മണ്‍സിനെ വിവരമറിയിക്കുകയും, അദ്ദേഹം യുവതികളെ രക്ഷപ്പെടുത്തുന്നതിനായി വാഹനം അയക്കുകയും ചെയ്തു. 

സംഭവത്തില്‍ പരാതി ലഭിച്ച ഉടന്‍ അതിക്രമത്തിന് ഇരയായ താരങ്ങളെ സന്ദര്‍ശിച്ച് മൊഴി രേഖപ്പെടുത്തിയതായി അസിസ്റ്റന്റ് പൊലിസ് കമ്മീഷണര്‍ ഹിമാനി മിശ്ര പറഞ്ഞു. അന്വേഷണത്തിനൊടുവില്‍ പ്രതിയെ പിടികൂടിയ പൊലിസ് ഇയാള്‍ക്കെതിരെ സ്ത്രീകള്‍ക്കെതിരായ അതിക്രമം, അപായപ്പെടുത്താന്‍ ലക്ഷ്യമിട്ട് പിന്തുടരല്‍ എന്നീ വകുപ്പുകള്‍ ചുമത്തി കേസെടുത്തു.

ALSO READ: ചർച്ചയെ കുറിച്ച് പ്രതികരിക്കാനില്ല; എംഎൻ സ്മാരകത്തിലെത്തി ബിനോയ് വിശ്വത്തെ കണ്ട് വി. ശിവൻകുട്ടി, പി.എം ശ്രീയിൽ സിപിഐ ഇടഞ്ഞുതന്നെ