പട്‌ന: അമിത് ഷായുടെ റാലിക്കായി ആര്‍ജെഡി നേതാവ് തേജസ്വി യാദവിന്റെ റാലിക്ക് അനുമതി നിഷേധിച്ച് പ്രാദേശിക ഭരണകൂടം. നിയമസഭാ തെരഞ്ഞെടുപ്പ് പ്രചരണത്തിന് മുന്നോടിയായി എന്‍ഡിഎ സര്‍ക്കാര്‍ നടത്തുന്ന സ്വേച്ഛാധിപത്യ നടപടിക്കെതിരെ വ്യാപക പ്രതിഷേധമാണ് ഉയരുന്നത്. തേജസ്വിയുടെ ഹെലികോപ്റ്റര്‍ സ്ഥലത്ത് ലാന്‍ഡ് ചെയ്യാനുള്ള അനുമതി ജില്ല ഭരണകൂടം റദ്ദാക്കുകയും ചെയ്തു.

കേന്ദ്ര ആഭ്യന്തര മന്ത്രി അമിത് ഷാ ഇന്ന് മൂന്നിടങ്ങളിലാണ് തെരഞ്ഞെടുപ്പ് റാലി സംഘടിപ്പിച്ചിരുന്നത്. ഖഗാരിയ, മൂങ്ങെര്‍, ബിഹാര്‍ ഷരീഫ് എന്നിവിടങ്ങളിലെ റാലിക്ക് അനുമതിയും ലഭിച്ചിട്ടുണ്ട്. ഇതില്‍ ഖഗാരിയ മണ്ഡലത്തില്‍ നടത്താനിരുന്ന ആര്‍ജെഡിയുടെ റാലിക്കാണ് ജില്ല ഭരണകൂടം അനുമതി നിഷേധിച്ചത്. സമയത്തിന്റെ പരിമിതി മൂലം റാലി നടത്താന്‍ സാധിക്കില്ലെന്നാണ് ഔദ്യോഗിക വിശദീകരണം. 

അതേസമയം തീരുമാനത്തെ ശക്തമായി വിമര്‍ശിച്ച് ആര്‍ജെഡി രംഗത്തെത്തി. ജില്ല ഭരണകൂടത്തിന്റെ സ്വേച്ഛാധിപത്യ സമീപനമാണ് നടപടിയിലൂടെ വെളിവായതെന്ന് തേജസ്വി യാദവ് പറഞ്ഞു. ഖഗാരിയയിലെ റാലി റദ്ദാക്കിയെങ്കിലും ഷാപൂരിലെ ദേര മിഡില്‍ സ്‌കൂള്‍ ഗ്രൗണ്ടില്‍ സംഘടിപ്പിക്കുന്ന തെരഞ്ഞെടുപ്പ് റാലിയില്‍ തേജസ്വി പങ്കെടുക്കും. 

ALSO READ: നാണക്കേട് ! വനിത ക്രിക്കറ്റ് ലോകകപ്പിന് എത്തിയ താരങ്ങള്‍ക്ക് നേരെ ലൈംഗികാതിക്രമം; പ്രതി പിടിയില്‍