റാഞ്ചി: ജാര്‍ഖണ്ഡില്‍ സര്‍ക്കാര്‍ ആശുപത്രിയില്‍ നിന്ന് രക്തം സ്വീകരിച്ച അഞ്ച് കുട്ടികള്‍ക്ക് എച്ച്.ഐ.വി സ്ഥിരീകരിച്ചു. സിംഗ്ഭൂം ജില്ലയിലെ ചായ്ബാസ നഗരത്തിലെ സര്‍ദാര്‍ സര്‍ക്കാര്‍ ആശുപത്രിയിലാണ് ഗുരുതര വീഴ്ചയുണ്ടായിരിക്കുന്നത്. തലാസീമിയ രോഗ ബാധിതനായ ഏഴു വയസുകാരനും രോഗം സ്ഥിരീകരിച്ചിട്ടുണ്ട്. 

വിഷയത്തില്‍ കഴിഞ്ഞ വെള്ളിയാഴ്ച്ചയാണ് ഒരു കുട്ടിയുടെ കുടുംബം രംഗത്തെത്തിയത്. ആശുപത്രിയിലെ രക്തബാങ്കില്‍ നിന്ന് എച്ച്.ഐ.വി ബാധിച്ച രക്തം നല്‍കിയതായാണ് കുടുംബം പരാതിപ്പെട്ടത്. ഇതിനെതുടര്‍ന്ന് ജാര്‍ഖണ്ഡ് സര്‍ക്കാര്‍ മെഡിക്കല്‍ ഡയറക്ടര്‍ ഡോ. ദിനേശ് കുമാറിന്റെ നേതൃത്വത്തില്‍ അഞ്ചംഗ മെഡിക്കല്‍ സംഘത്തെ അന്വേഷണം ഏല്‍പ്പിച്ചു. ഈ അന്വേഷണത്തിലാണ് ഞെട്ടിക്കുന്ന കണ്ടെത്തലുകളുണ്ടായത്.

ALSO READ: ദീപാവലി ആഘോഷം: ഇന്ത്യയിലേത് പോലെ യുഎഇയിലും ആരോഗ്യ പ്രശ്‌നങ്ങള്‍ കൂടുന്നു; ദുബൈ ആശുപത്രികളില്‍ ശ്വസന, പ്രമേഹ കേസുകളില്‍ വര്‍ദ്ധനവ്

ഏകദേശം 25 യൂണിറ്റ് രക്തമാണ് ഏഴുവയസുകാരന്‍ ഇതുവരെ ആശുപത്രിയിലെ രക്തബാങ്കില്‍ നിന്ന് സ്വീകരിച്ചത്. എന്നാല്‍ രക്തത്തിലൂടെ മാത്രമാണ് രോഗബാധ പകര്‍ന്നതാണെന്ന് കരുതാനാകില്ലെന്നും ഉപയോഗിച്ച സൂചികള്‍ വീണ്ടും ഉപയോഗിച്ചതടക്കമുള്ള കാര്യങ്ങളിലൂടെയും എച്ച്.ഐ.വി അണുബാധ ഉണ്ടാകാമെന്നും ജില്ലാ സിവില്‍ സര്‍ജന്‍ ഡോ. സുശാന്തോ മഝീ പറഞ്ഞു. 

അതേസമയം, സംഭവത്തില്‍ നീതി ലഭിക്കണമെന്നാവശ്യപ്പെട്ട് കുട്ടിയുടെ കുടുംബം ജില്ലാ ഭരണകൂടത്തിനും സംസ്ഥാന സര്‍ക്കാരിനും പരാതി നല്‍കിയിട്ടുണ്ട്. സംഭവം ജാര്‍ഖണ്ഡ് ഹൈക്കോടതിയുടെ ശ്രദ്ധയില്‍പെട്ടിട്ടുണ്ട്. സംസ്ഥാന ആരോഗ്യ സെക്രട്ടറിയില്‍ നിന്നും ജില്ലാ സിവില്‍ സര്‍ജനില്‍ നിന്നും കോടതി റിപ്പോര്‍ട്ട് തേടി. ആശുപത്രിയിലെ രക്തബാങ്കിന്റെ പ്രവര്‍ത്തനം താല്‍ക്കാലികമായി നിര്‍ത്തിവച്ചു. 

English Summary: In Jharkhand, five children have tested positive for HIV after receiving blood transfusions from a government hospital. The serious lapse occurred at Sardar Government Hospital in Chaibasa, West Singhbhum district. Among the affected is a seven-year-old boy suffering from thalassemia.