അടുത്തിടെ അവസാനിച്ച വെസ്റ്റ് ഇൻഡീസിനെതിരായ ടെസ്റ്റ് പരമ്പരയ്ക്കുള്ള ഇന്ത്യൻ ടീമിൽ മലയാളി താരം കരുൺ നായർ ഇടം നേടിയിരുന്നില്ല. ഇംഗ്ലണ്ടിനെതിരായ പരമ്പരയിൽ കരുൺ നായർ നാല് മത്സരങ്ങളിൽ നിന്നും 205 റൺസായിരുന്നു നേടിയിരുന്നത്. ഇതിനു പിന്നാലെ നടന്ന വെസ്റ്റ് ഇൻഡീസ് പര്യടനത്തിൽ മാത്രമല്ല സൗത്ത് ആഫ്രിക്ക എ ടീമിനെതിരെയുള്ള പരമ്പരയിലും താരത്തിന് ഇടം നേടാനായില്ല.

ഇപ്പോൾ ടീമിൽ ഇടം നേടാൻ സാധിക്കാത്തതിന്റെ നിരാശ പങ്കുവെച്ചിരിക്കുകയാണ് കരുൺ നായർ. കഴിഞ്ഞ രണ്ട് വർഷത്തെ പ്രകടനങ്ങൾ കണക്കിലെടുക്കുമ്പോൾ താൻ ഇന്ത്യൻ ടീമിൽ കളിക്കാൻ അർഹനാണെന്നാണ് കരുൺ നായർ പറഞ്ഞത്. 

''ടീമിൽ നിന്ന് പുറത്തായത് വളരെ നിരാശാജനകമാണ്, കഴിഞ്ഞ രണ്ട് വർഷത്തെ ആഭ്യന്തര ക്രിക്കറ്റിലെ പ്രകടനങ്ങൾക്ക് ശേഷം ഞാൻ അവിടെ ഉണ്ടായിരിക്കാൻ അർഹനാണെന്ന് എനിക്കറിയാം. ആളുകൾക്ക് അവരുടേതായ അഭിപ്രായങ്ങൾ ഉണ്ടാവാം. എന്നാൽ വ്യക്തിപരമായി എന്റെ അഭിപ്രായം എന്തെന്നാൽ ഞാൻ ഇതിലും മികച്ചത് അർഹിക്കുന്നു എന്നാണ്'' കരുൺ നായർ പറഞ്ഞു. 

നീണ്ട എട്ട് വർഷങ്ങൾക്ക് ശേഷമാണ് കരുൺ നായർ ഇംഗ്ലണ്ട് പരമ്പരയിലൂടെ ഇന്ത്യൻ ടീമിലേക്ക് തിരിച്ചെത്തിയത്. 2017ൽ ഓസ്‌ട്രേലിയയ്‌ക്കെതിരെയാണ് കരുൺ നായർ അവസാനമായി ഇതിനു മുമ്പ് ഇന്ത്യക്ക് വേണ്ടി കളിച്ചത്. ഇന്ത്യക്കായി ടെസ്റ്റ് ക്രിക്കറ്റിൽ ട്രിപ്പിൾ സെഞ്ച്വറി നേടിയ താരം കൂടിയാണ് കരുൺ നായർ. 2016ൽ ഇംഗ്ലണ്ടിനെതിരെയായിരുന്നു താരം ട്രിപ്പിൾ സെഞ്ച്വറി നേടിയത്. ടെസ്റ്റ് ക്രിക്കറ്റിൽ വീരേന്ദർ സെവാഗിന് ശേഷം ട്രിപ്പിൾ സെഞ്ച്വറി നേടുന്ന രണ്ടാമത്തെ ഇന്ത്യൻ താരം കൂടിയാണ് കരുൺ. 

സമീപകാലങ്ങളിൽ ആഭ്യന്തര ക്രിക്കറ്റിൽ നടത്തിയ മികച്ച പ്രകടനങ്ങൾക്ക് പിന്നാലെയാണ് കരുൺ വീണ്ടും ഇന്ത്യൻ ടീമിൽ ഇടം നേടിരുന്നത്. 2024ലെ രഞ്ജി ട്രോഫിയിലെ വിദർഭയുടെ കിരീട നേട്ടത്തിൽ നിർണായകമായ പങ്കുവഹിച്ച താരമാണ് കരുൺ. 16 ഇന്നിങ്സിൽ നിന്നും 53.9 എന്ന മികച്ച ആവറേജിൽ 863 റൺസാണ് കരുൺ അടിച്ചെടുത്തത്.

 രഞ്ജി ട്രോഫിയിൽ മാത്രം ഒതുങ്ങുന്നതല്ല കരുണിന്റെ പോരാട്ടവീര്യങ്ങൾ. വിജയ് ഹസാരെ ട്രോഫിയിലും സയ്യിദ് മുഷ്താഖ് അലി ട്രോഫിയിലും തകർപ്പൻ പ്രകടനമാണ്‌ കരുൺ നടത്തിയത്. വിജയ് ഹസാരെ ട്രോഫിയിൽ എട്ട് ഇന്നിങ്സിൽ നിന്നും 779 റൺസാണ് താരം അടിച്ചെടുത്തത്. സയ്യിദ് മുഷ്താഖ് അലി ട്രോഫിയിൽ 255 റൺസും കരുൺ നേടി. ഒമ്പത് സെഞ്ച്വറികളാണ് താരം 2024-25 ആഭ്യന്തര ക്രിക്കറ്റിൽ നേടിയത്. 

Karun Nair has shared his disappointment at not being able to make it to Indian criket team. Karun Nair said that considering his performances in the last two years, he deserves to play in the Indian team.