ചെന്നൈ: വീട്ടിൽ കൊണ്ടുവിടുന്നതിനിടെ 22 വയസ്സുള്ള യുവതിയെ ലൈംഗികമായി പീഡിപ്പിച്ച സംഭവത്തിൽ ബൈക്ക് ടാക്സി ഡ്രൈവർ ചെന്നൈയിൽ അറസ്റ്റിലായി. ശിവകുമാർ എന്നയാളാണ് പ്രതി. ഇയാളെ പൊലിസ് പിടികൂടി ചൊവ്വാഴ്ച കോടതിയിൽ ഹാജരാക്കുകയും തുടർന്ന് ജുഡീഷ്യൽ കസ്റ്റഡിയിൽ വിടുകയും ചെയ്തു. ഇയാളുടെ മോട്ടോർ സൈക്കിളും പൊലിസ് പിടിച്ചെടുത്തിട്ടുണ്ട്.

തിങ്കളാഴ്ച വൈകുന്നേരമാണ് സംഭവം. ചെന്നൈയിലെ പക്കികരണൈയിലുള്ള സുഹൃത്തിനെ സന്ദർശിക്കാനായി യുവതി ബൈക്ക് ടാക്സി ബുക്ക് ചെയ്തത്. തിരികെ വീട്ടിലേക്ക് പോകുന്നതിനായി കാത്തുനിൽക്കാൻ യുവതി ഡ്രൈവറായ ശിവകുമാറിനോട് ആവശ്യപ്പെടുകയും ചെയ്തു.

യുവതിയെ വീട്ടിലേക്ക് കൊണ്ടുവിടുന്നതിനിടെ, വിജനമായ വഴിയിലൂടെ സഞ്ചരിച്ച ശിവകുമാർ ഭീഷണിപ്പെടുത്തി യുവതിയെ ലൈംഗികമായി പീഡിപ്പിക്കുകയായിരുന്നുവെന്ന് അന്വേഷണ ഉദ്യോഗസ്ഥർ അറിയിച്ചു. പീഡനത്തിന് ശേഷം ഇയാൾ യുവതിയെ വീട്ടിൽ ഇറക്കിവിട്ടു.

വീട്ടിലെത്തിയ യുവതി സംഭവം ഭർത്താവിനോട് വെളിപ്പെടുത്തി. തുടർന്ന് യുവതി നൽകിയ പരാതിയുടെ അടിസ്ഥാനത്തിൽ പൊലിസ് അന്വേഷണം ആരംഭിക്കുകയും പ്രതിയായ ശിവകുമാറിനെ അറസ്റ്റ് ചെയ്യുകയുമായിരുന്നു.