വാഷിങ്ടൺ: ആഗോള ഇ-കൊമേഴ്‌സ് ഭീമനായ ആമസോൺ 14,000 ജീവനക്കാരെ പിരിച്ചുവിട്ട നടപടി ജീവനക്കാരെ അറിയിച്ചത് അസാധാരണമായ രീതിയിലായിരുന്നു. പിരിച്ചുവിട്ടതായി അറിയിച്ചുകൊണ്ടുള്ള ടെക്സ്റ്റ് സന്ദേശങ്ങളാണ് ആയിരക്കണക്കിന് ജീവനക്കാർക്ക് ലഭിച്ചത്.

ബിസിനസ് ഇൻസൈഡറിൻ്റെ റിപ്പോർട്ട് അനുസരിച്ച്, ചൊവ്വാഴ്ച ജീവനക്കാരുടെ ജോലിയിൽ നിന്ന് പിരിച്ചുവിട്ടു കൊണ്ടുള്ള രണ്ട് തരം സന്ദേശങ്ങൾ അയച്ചുകൊണ്ടാണ്.ആദ്യ സന്ദേശം ജോലിക്ക് റിപ്പോർട്ട് ചെയ്യുന്നതിന് മുമ്പ് അവരുടെ സ്വകാര്യ അല്ലെങ്കിൽ ഔദ്യോഗിക ഇമെയിലുകൾ പരിശോധിക്കാൻ ജീവനക്കാരോട് ആവശ്യപ്പെട്ടു.രണ്ടാമത്തെ സന്ദേശത്തിൽ "നിങ്ങളുടെ റോളിനെക്കുറിച്ച് ഒരു ഇമെയിൽ സന്ദേശം" ലഭിച്ചില്ലെങ്കിൽ  ഹെൽപ്പ് ഡെസ്‌കിലേക്ക് വിളിക്കാൻ ജീവനക്കാരോട് നിർദ്ദേശിച്ചു.

ജീവനക്കാർ ജോലിസ്ഥലത്ത് എത്തുന്നതിനു മുൻപ് തന്നെ പിരിച്ചുവിടൽ നടപ്പിലാക്കാനും, അവരുടെ ആക്‌സസ് ബാഡ്ജുകൾ പ്രവർത്തിക്കുന്നില്ലെന്ന് ഉറപ്പാക്കാനുമാണ് ഈ അസാധാരണമായ തന്ത്രം സ്വീകരിച്ചതെന്ന് ഈ വിഷയവുമായി ബന്ധമുള്ളവർ പറയുന്നു.

ഗൂഗിളിലും ടെസ്‌ലയിലും ഉൾപ്പെടെയുള്ള ടെക് കമ്പനികളിൽ കൂട്ടപ്പിരിച്ചുവിടൽ നടക്കുമ്പോൾ, പിരിച്ചുവിട്ട ജീവനക്കാർ ഓഫീസിൽ എത്തുകയും അവരുടെ ബാഡ്ജുകൾ പ്രവർത്തിക്കാതിരിക്കുകയും ചെയ്യുന്നത് ഒരു സാധാരണ സംഭവമായി മാറിയ സാഹചര്യത്തിലാണ് ആമസോൺ ഈ രീതി തിരഞ്ഞെടുത്തത്.

കമ്പനിയുടെ വിശദീകരണം:

ആമസോൺ 30,000 ജോലികൾ വെട്ടിക്കുറയ്ക്കുമെന്ന റിപ്പോർട്ടുകൾ വന്നതിന് പിന്നാലെയാണ് 14,000 ജോലികൾ വെട്ടിക്കുറയ്ക്കുന്നതായി കമ്പനി സ്ഥിരീകരിച്ചത്."ഞങ്ങളുടെ ഏറ്റവും വലിയ നിക്ഷേപങ്ങളിൽ ശ്രദ്ധ കേന്ദ്രീകരിക്കുകയും, ഉദ്യോഗസ്ഥ മേധാവിത്വം കുറയ്ക്കുകയും, ലെയറുകൾ നീക്കം ചെയ്യുകയും, വിഭവങ്ങൾ പുനഃക്രമീകരിക്കുകയും ചെയ്തുകൊണ്ട് കൂടുതൽ ശക്തമാക്കാനുള്ള പ്രവർത്തനങ്ങളുടെ തുടർച്ചയാണ് ഈ പിരിച്ചു വിടൽ," ആമസോൺ എച്ച്ആർ മേധാവി ബെത്ത് ഗാലെറ്റി ഒരു ബ്ലോഗ് പോസ്റ്റിൽ വ്യക്തമാക്കി.

നഷ്ടപരിഹാര പാക്കേജ്:

പിരിച്ചുവിട്ട ജീവനക്കാർക്ക് ആശ്വാസം നൽകുന്ന ചില നടപടികളും കമ്പനി സ്വീകരിച്ചിട്ടുണ്ട്.ബിസിനസ് ഇൻസൈഡർ ആക്‌സസ് ചെയ്ത ഒരു ആഭ്യന്തര ഇമെയിലിൽ, പിരിച്ചുവിട്ട ജീവനക്കാർക്ക് 90 ദിവസത്തേക്ക് പൂർണ്ണ ശമ്പളവും ആനുകൂല്യങ്ങളും (നോൺ-വർക്കിംഗ് കാലയളവ്), ഒരു സെവറൻസ് പാക്കേജും, രാജ്യം അനുസരിച്ചുള്ള പരിവർത്തന ആനുകൂല്യങ്ങളും, നൈപുണ്യ പരിശീലനത്തിലേക്കും ബാഹ്യ ജോലി പ്ലേസ്‌മെൻ്റ് പിന്തുണയിലേക്കുമുള്ള പ്രവേശനവും നൽകുമെന്ന് എച്ച്ആർ മേധാവി അറിയിച്ചു.

കൂടുതൽ പിരിച്ചുവിടലുകൾക്ക് സാധ്യത:

ആമസോൺ സിഇഒ ആൻഡി ജാസ്സിയുടെ മുന്നറിയിപ്പിന് പിന്നാലെയാണ് പിരിച്ചുവിടലുകൾ ഉണ്ടായത് എന്നത് ശ്രദ്ധേയമാണ്. ഭാവിയിൽ കൂടുതൽ പിരിച്ചുവിടലുകൾക്ക് സാധ്യതയുണ്ടെന്ന് ഗാലെറ്റി സൂചന നൽകി."ഇൻ്റർനെറ്റിന് ശേഷം നമ്മൾ കണ്ടിട്ടുള്ളതിൽ വെച്ച് ഏറ്റവും പരിവർത്തനപരമാണ് ഈ തലമുറയിലെ ആർട്ടിഫിഷ്യൽ ഇൻ്റലിജൻസ് (AI) സാങ്കേതികവിദ്യ," അവർ പറഞ്ഞു."2026 വരെ മുന്നോട്ട് നോക്കുമ്പോൾ, പ്രധാന തന്ത്രപരമായ മേഖലകളിൽ നിയമനം തുടരുമെന്ന് ഞങ്ങൾ പ്രതീക്ഷിക്കുന്നു, ഒപ്പം ലെയറുകൾ നീക്കം ചെയ്യാനും കാര്യക്ഷമത നേടാനും കഴിയുന്ന കൂടുതൽ ഇടങ്ങൾ കണ്ടെത്താനും ഞങ്ങൾ ശ്രമിക്കും," അവർ കൂട്ടിച്ചേർത്തു.ആമസോണിൽ ഇതിനു മുൻപ് വലിയ രീതിയിലുള്ള പിരിച്ചുവിടൽ നടന്നത് മൂന്ന് വർഷം മുമ്പായിരുന്നു, അത് അഞ്ച് മാസമെടുത്താണ് നടപ്പിലാക്കിയത്.