മെൽബൺ: ഓസ്‌ട്രേലിയൻ ക്രിക്കറ്റ് ലോകത്തെ ഞെട്ടിച്ച്, പരിശീലനത്തിനിടെ പന്ത് കൊണ്ട് ഗുരുതരമായി പരിക്കേറ്റ പതിനേഴുകാരനായ ക്രിക്കറ്റർ ബെൻ ഓസ്റ്റിൻ മരിച്ചു. ഒരു ഓട്ടോമാറ്റിക് ബൗളിങ് മെഷീൻ ഉപയോഗിച്ച് നെറ്റ്‌സിൽ ബാറ്റിങ് പരിശീലനം നടത്തുന്നതിനിടെയാണ് ദാരുണമായ സംഭവം.

പ്രാദേശിക ക്ലബ്ബിനായി കളിക്കുന്ന ഓസ്റ്റിൻ ടി20 മത്സരത്തിനായുള്ള തയ്യാറെടുപ്പിലായിരുന്നു. കഴിഞ്ഞ ചൊവ്വാഴ്ച പരിശീലനം നടത്തുന്നതിനിടെ പന്ത് തലയിലും കഴുത്തിലും ഗുരുതരമായി വന്ന് ഇടിക്കുകയായിരുന്നു. ഉടൻതന്നെ ആശുപത്രിയിൽ എത്തിച്ചെങ്കിലും ചികിത്സയിലിരിക്കെ ബുധനാഴ്ച മരണം സംഭവിച്ചു. ക്ലബ്ബ് അനുശോചനം രേഖപ്പെടുത്തി പോസ്റ്റ് പങ്കുവെച്ചിട്ടുണ്ട്. ഇത് ക്രിക്കറ്റ് ലോകത്തിന് ഒരു പേടിസ്വപ്നമായി മാറിയിരിക്കുന്നു.

ഓർമ്മകളിലെ മരണം: ഫിൽ ഹ്യൂസും രമൺ ലാംബയും

ക്രിക്കറ്റ് ഗ്രൗണ്ടിലെ അപകടമരണങ്ങൾ ലോകത്തിന് പുതിയ അനുഭവമല്ല. ഓസ്‌ട്രേലിയൻ താരം ഫിൽ ഹ്യൂസ്, ഇന്ത്യൻ താരം രമൺ ലാംബ എന്നിവരുടെ മരണങ്ങൾ ക്രിക്കറ്റ് ലോകത്തെ ഏറെ വേദനിപ്പിച്ച സംഭവങ്ങളാണ്.

ഫിൽ ഹ്യൂസ് (2014): 2014 നവംബർ 25-ന് സിഡ്‌നി ക്രിക്കറ്റ് മൈതാനത്ത് സൗത്ത് ഓസ്‌ട്രേലിയയും ന്യൂ സൗത്ത് വെയിൽസും തമ്മിലുള്ള ഷെഫീൽഡ് ഷീൽഡ് ഫസ്റ്റ് ക്ലാസ് മത്സരത്തിനിടെയാണ് ഹ്യൂസിന് പരിക്കേറ്റത്. പേസ് ബൗളർ ഷോൺ ആബട്ടിന്റെ ബൗൺസർ, ഹ്യൂസ് പുൾ ഷോട്ട് കളിക്കാൻ ശ്രമിച്ചപ്പോൾ ഹെൽമറ്റിന്റെ സുരക്ഷയില്ലാത്ത ഭാഗത്ത് ഇടിക്കുകയായിരുന്നു. ഉടൻതന്നെ ഗ്രൗണ്ടിൽ വീണ താരത്തെ അടിയന്തര ശസ്ത്രക്രിയക്ക് വിധേയനാക്കിയെങ്കിലും ജീവൻ രക്ഷിക്കാനായില്ല.

രമൺ ലാംബ (1998): ഇന്ത്യൻ ഓപ്പണറായിരുന്ന രമൺ ലാംബയുടെ മരണം 1998-ലാണ്. ധാക്കയിൽ നടന്ന ക്ലബ് മത്സരത്തിൽ ഫീൽഡ് ചെയ്യുകയായിരുന്ന ലാംബയുടെ നെറ്റിയിൽ ബാറ്ററുടെ ഷോട്ട് കൊണ്ട പന്ത് ഇടിക്കുകയായിരുന്നു.