ന്യൂഡൽഹി/ദുബൈ: 10, 12 ക്ലാസുകളിലെ ബോർഡ് പരീക്ഷകളുടെ അന്തിമ തീയതികൾ പ്രഖ്യാപിച്ച് സിബിഎസ്ഇ. യുഎഇ ഉൾപ്പെടെയുള്ള രാജ്യങ്ങളിൽ ഇന്ത്യൻ സിബിഎസ്ഇ പാഠ്യപദ്ധതി പിന്തുടരുന്ന നൂറിലധികം സ്കൂളുകളിലെ വിദ്യാർത്ഥികൾക്ക് ഏറെ നിർണായകമാണ് ഈ പ്രഖ്യാപനം. നേരത്തെ സെപ്റ്റംബർ 24-ന് ഒരു താൽക്കാലിക ഡേറ്റ് ഷീറ്റ് ബോർഡ് പുറത്തിറക്കിയിരുന്നു. പരീക്ഷകൾ ആരംഭിക്കുന്നതിന് 110 ദിവസം മുമ്പാണ് ഇപ്പോൾ അവസാന ഷെഡ്യൂൾ പ്രസിദ്ധീകരിച്ചിരിക്കുന്നത്.

അന്തിമ ഷെഡ്യൂൾ അനുസരിച്ച്, രണ്ട് ക്ലാസുകളിലെയും പരീക്ഷകൾ ഫെബ്രുവരി 17-ന് ആരംഭിച്ച്, പത്താം ക്ലാസ് പരീക്ഷകൾ മാർച്ച് 10-നും പന്ത്രണ്ടാം ക്ലാസ് പരീക്ഷകൾ ഏപ്രിൽ 9-നും അവസാനിക്കും. പരീക്ഷകൾ ഇന്ത്യൻ സമയം രാവിലെ 10.30-നാണ് (യുഎഇ സമയം രാവിലെ 9 മണിക്ക്) ആരംഭിക്കുക. വിശദമായ ടൈംടേബിൾ സിബിഎസ്ഇയുടെ ഔദ്യോഗിക വെബ്സൈറ്റായ https://www.cbse.gov.in/ ൽ ലഭ്യമാണ്.

ALSO READ: സി.എസ്.ഐ.ആർ യു.ജി.സി നെറ്റ്; അപേക്ഷ തീയതി ഒക്ടോബർ 27 വരെ നീട്ടി  

പുതിയ ദേശീയ വിദ്യാഭ്യാസ നയം (NEP) 2020-ലെ ശുപാർശകൾക്ക് അനുസൃതമായി, പത്താം ക്ലാസിലേക്ക് രണ്ട് ബോർഡ് പരീക്ഷകൾ നടത്തുമെന്ന് സിബിഎസ്ഇ അറിയിച്ചു. തീയതികൾ തയ്യാറാക്കുമ്പോൾ വിദ്യാർഥികളുടെ സൗകര്യം ഉറപ്പുവരുത്തിയതായി ബോർഡ് എടുത്തുപറഞ്ഞു. രണ്ട് ക്ലാസുകളിലെയും വിദ്യാർഥികൾ സാധാരണയായി തിരഞ്ഞെടുക്കുന്ന പ്രധാന വിഷയങ്ങൾക്കിടയിൽ മതിയായ പഠന സമയം നൽകിയിട്ടുണ്ട്. കൂടാതെ, പന്ത്രണ്ടാം ക്ലാസ് വിദ്യാർത്ഥികൾക്കുള്ള പ്രവേശന പരീക്ഷകളുടെ തീയതികൾ പരിഗണിച്ച്, പ്രവേശന പരീക്ഷകൾ ആരംഭിക്കുന്നതിന് മുൻപ് തന്നെ ബോർഡ് പരീക്ഷകൾ പൂർത്തിയാക്കാൻ ശ്രമിച്ചിട്ടുണ്ട്. 

"ഇത് ബോർഡ് പരീക്ഷകൾക്കും പ്രവേശന പരീക്ഷകൾക്കും മികച്ച സമയ മാനേജ്മെന്റിന് വിദ്യാർത്ഥികളെ സഹായിക്കും," സിബിഎസ്ഇ അധികൃതർ വ്യക്തമാക്കി.

ഒരു വിദ്യാർഥി എഴുതുന്ന രണ്ട് വിഷയങ്ങളുടെ പരീക്ഷകൾ ഒരേ തീയതിയിൽ വരാതിരിക്കാൻ 40,000-ത്തിലധികം സബ്ജക്റ്റ് കോമ്പിനേഷനുകൾ ഒഴിവാക്കിയാണ് ടൈംടേബിൾ തയ്യാറാക്കിയിരിക്കുന്നത്. മൂല്യനിർണ്ണയ പ്രക്രിയയിൽ സ്കൂളുകളിലെ അധ്യാപകർക്ക് കൂടുതൽ കാലം അവധിയെടുക്കേണ്ട സാഹചര്യം ഒഴിവാക്കാനും ഈ ഡേറ്റ് ഷീറ്റ് സഹായകമാവുമെന്നും ബോർഡ് വ്യക്തമാക്കി.

cbse releases final 2026 datesheet on oct 30: class 10 exams feb 17-march 10, class 12 feb 17-april 9 at 10:30 am ist. two phases for class 10; download pdf from cbse.gov.in for full schedule and tips.