ന്യൂഡല്‍ഹി: ഡല്‍ഹി കലാപസമയത്ത് ഉമര്‍ഖാലിദ് ഡല്‍ഹിയില്‍ ഉണ്ടായിരുന്നില്ലെന്ന് കപില്‍ സിബല്‍ സുപ്രിംകോടതിയില്‍. ഉമര്ഖാലിദിനെതിരായ കേസ് ഗൂഢാലോചനയാണെന്നും അദ്ദേഹം ചൂണ്ടിക്കാട്ടി. അക്രമപ്രവര്‍ത്തനങ്ങളെ ബന്ധിപ്പിക്കുന്ന സാക്ഷിമൊഴി ഇല്ലെന്നും കപില്‍ സിബല്‍ വാദിച്ചു. 

കേസ് വൈകിപ്പിക്കുകയും സമയം കളയുകയും ചെയ്യുന്നത് ഞാനാണെന്ന് അവര്‍ പറയുന്നു, അതേസമയം വസ്തുതകള്‍ മറിച്ചാണ് പറയുന്നത്. എനിക്കെതിരെയുള്ള കുറ്റം ഗൂഢാലോചനയാണ്. 751 എഫ്ഐആറുകളുണ്ട്... കലാപം നടന്നപ്പോള്‍ ഹരജിക്കാരന്‍ ഡല്‍ഹിയില്‍ പോലും ഉണ്ടായിരുന്നില്ല. ഞാന്‍ അവിടെ ഇല്ലെങ്കില്‍ കലാപത്തെ എങ്ങനെ അതുമായി ബന്ധിപ്പിക്കാന്‍ കഴിയും? 751 എഫ്.ഐ.ആറുകളില്‍ ഒന്നില്‍ മാത്രമേ എന്നെ കക്ഷി ചേര്‍ത്തിട്ടുള്ളൂ' കപില്‍ സിബല്‍ പറഞ്ഞു. 

ALSO READ: ഉമര്‍ ഖാലിദ് ഉള്‍പ്പെടെയുള്ളവര്‍ ഇരവാദം നടത്തുകയാണെന്ന് പൊലിസ്; ആക്ടിവിസ്റ്റുകളുടെ ജാമ്യത്തെ എതിര്‍ത്ത് സുപ്രിംകോടതിയില്‍ സത്യവാങ്മൂലം 

2020ല്‍ കുറ്റപത്രം സമര്‍പ്പിച്ചിരുന്നെങ്കിലും ഇതുവരെയും ജാമ്യം ലഭിച്ചിരുന്നില്ല. ഉമര്‍ ഖാലിദ് അടക്കമുള്ളവര്‍ കാരണമാണ് വിചാരണ വൈകിയതെന്നായിരുന്നു ഡല്‍ഹി പൊലിസിന്റെ വാദം. ഇന്നലെ സമര്‍പ്പിച്ച സത്യവാങ്മൂലത്തിലും പൊലിസ് ഇതേ വാദങ്ങള്‍ ആവര്‍ത്തിച്ചിരുന്നു. എന്നാല്‍ പൊലിസിന്റെ വാദങ്ങളെ ഉമര്‍ ഖാലിദ് തള്ളി. താന്‍ കാരണമല്ല വിചാരണ വൈകിയതെന്നും അഭിഭാഷക സമരമവും കേസ് നിരന്തരം മാറ്റിവെക്കുന്നതും വിചാരണ നീളുന്നതിന് കാരണമായെന്ന് ഉമര്‍ ഖാലിദ് കോടതിയില്‍ പറഞ്ഞു.

ഡല്‍ഹി കലാപത്തിലെ വിശാല ഗൂഢാലോചന കേസില്‍ പ്രതികള്‍ ഇരവാദം പറയുന്നതായി ആരോപിച്ച് പൊലിസ് ഇന്നലെ സത്യവാങ്മൂലം സമര്‍പ്പിച്ചിരുന്നു. 
കാലതാമസത്തിന്റെ അടിസ്ഥാനത്തില്‍ ജാമ്യത്തിന് അടിസ്ഥാനമില്ലെന്നും ദീര്‍ഘകാലം ജയിലില്‍ കഴിയുന്നത് ചൂണ്ടിക്കാട്ടി ഇവര്‍ 'ഇരവാദം' നടത്തുകയാണെന്നും ഡല്‍ഹി പൊലിസ് ആരോപിച്ചു. ദുരുദ്ദേശ്യപരമായ കാരണങ്ങളാല്‍ വിചാരണ ആരംഭിക്കുന്നത് നീണ്ടുപോകാന്‍ ഹരജിക്കാര്‍ തന്നെയാണ് ഉത്തരവാദികളെന്നും ജാമ്യാപേക്ഷയെ എതിര്‍ത്ത് സമര്‍പ്പിച്ച സത്യവാങ്മൂലത്തില്‍ പൊലിസ് വാദിച്ചു.

രാജ്യത്തിന്റെ സ്വാധീനത്തെയും ഐക്യത്തെയും തകര്‍ക്കാനാണ് ഇവര്‍ ഗൂഢാലോചന നടത്തിയത്. ചെറിയ കൂട്ടായ്മകളെ സായുധ കലാപത്തിലേക്ക് തള്ളിവിടുകയായിരുന്നു ഇവരുടെ ലക്ഷ്യം. രാജ്യത്തെ സാമുദായിക സൗഹൃദം തകര്‍ക്കാനും പൊതുശാന്തി തകര്‍ക്കാനും മാത്രമല്ല, ആയുധ കലാപം പ്രേരിപ്പിക്കാനും ഇവര്‍ ശ്രമിച്ചു. ഇന്ത്യയിലാകെ ഈ ഗൂഢാലോചന നടപ്പാക്കാന്‍ പദ്ധതിയിട്ടിരുന്നതായും ഇത്തരമൊരു ഗുരുതര കുറ്റത്തിന് ജാമ്യം നല്‍കാന്‍ കഴിയില്ലെന്നുമാണ് പൊലിസ് സത്യവാങ്മൂലത്തിലുള്ളത്. 

ALSO READ: ഡല്‍ഹി കലാപത്തിന് അഞ്ചാണ്ട്: പ്രതിചേര്‍ക്കപ്പെട്ടവരില്‍ 80 ശതമാനം പേരും കുറ്റവിമുക്തര്‍; മുന്‍നിര യുവ ആക്ടിവിസ്റ്റുകള്‍ ഇപ്പോഴും അകത്ത്

ഉമര്‍ഖാലിദിനെക്കൂടാതെ കേസില്‍ അറസ്റ്റിലായ ഷര്‍ജീല്‍ ഇമാം, ഗുല്‍ഫിഷ ഫാത്തിമ, മീരാന്‍ ഹൈദര്‍, ഷിഫാഉര്‍റഹ്‌മാന്‍, മുഹമ്മദ് സലീം ഖാന്‍ എന്നിവരും നല്‍കിയ ഹരജി ജസ്റ്റിസ് അരവിന്ദ് കുമാര്‍ അധ്യക്ഷനായ രണ്ടംഗ ബെഞ്ച് മുമ്പാകെയാണുള്ളത്.  വിചാരണ പോലുമില്ലാതെ അഞ്ച് വര്‍ഷത്തിലേറെയായി ഇവര്‍ ജയിലില്‍ കഴിയുകയാണ്. സിഎഎ-എന്‍ആര്‍സി വിരുദ്ധ പ്രക്ഷോഭത്തിന്റെ പേരില്‍ ഡല്‍ഹിയില്‍ കലാപത്തിന് ഗൂഢാലോചന നടത്തിയെന്ന് ആരോപിച്ചാണ് 2020 മുതല്‍ ഇവര്‍ ജയിലില്‍ കഴിയുന്നത്.ജാമ്യാപേക്ഷയില്‍ വാദം തിങ്കളാഴ്ചയും തുടരും.  

senior advocate kapil sibal informed the supreme court that activist umar khalid was not present in delhi during the 2020 delhi riots. sibal made the argument while seeking bail for khalid, who has been charged under the uapa in connection with the case. the court has reserved its decision after hearing detailed submissions from both sides.