തളിപ്പറമ്പ് : കുറ്റിക്കോല്‍ സ്വദേശിയായ യുവാവിന്റെ തിരോധാനവുമായി ബന്ധപ്പെട്ട പരാതിയില്‍ പൊലിസ് അന്വേഷണം ഊര്‍ജിതമാക്കി. കുറ്റിക്കോല്‍ പാറാട്ടെ രജീഷ് (34) നെ കഴിഞ്ഞ അഞ്ചുമുതല്‍ കാണാതായെന്നാണ് ബന്ധുക്കളുടെ പരാതി. പറശിനിക്കടവ് എ.യു.പി സ്‌കൂള്‍ അറ്റന്‍ഡറായ രജീഷ് കഴിഞ്ഞ അഞ്ചിന് രാവിലെ സ്‌കൂളിലേക്ക് പോയതിനു ശേഷം വീട്ടിലേക്കു വന്നിട്ടില്ല. വൈകിട്ട് സുഹൃത്തിന്റെ കുട്ടിയുടെ ബര്‍ത്ത്‌ഡേ പാര്‍ട്ടിക്ക് പോകുന്നതിനാല്‍ വൈകുമെന്ന് സൂചിപ്പിച്ചതായി ബന്ധുക്കള്‍ തളിപ്പറമ്പ് പൊലിസില്‍ നല്‍കിയ പരാതിയില്‍ പറയുന്നു. പ്രിസിപ്പല്‍ എസ്.ഐ പി രാജേഷിന്റെ നേതൃത്വത്തിലാണ് അന്വേഷണം നടക്കുന്നത്. സൈബര്‍ സെല്ലുമായി ബന്ധപ്പെട്ട് നടത്തിയ അന്വേഷണത്തില്‍ കരിമ്പം ഫാമിന് പിറകിലുള്ള മൊബൈല്‍ ടവറിന്റെ പരിധിയില്‍ രജീഷ് ഉള്ളതായി സൂചന ലഭിച്ചിരുന്നു. ഇവിടെ ഒരു വീട്ടില്‍ രജീഷിനെ ബന്ദിയാക്കിയതായി രഹസ്യവിവരം ലഭിച്ചതിനാല്‍ കഴിഞ്ഞ ദിവസം രാത്രി എസ്.ഐയുടെ നേതൃത്വത്തില്‍ സംശയാസ്പദമായ കേന്ദ്രത്തില്‍ റെയ്ഡ് നടത്തിയിരുന്നു. രഹസ്യാന്വേഷണ വിഭാഗവും അന്വേഷണം ഊര്‍ജ്ജിതമാക്കിയിട്ടുണ്ട്.