കോതമംഗലം: എറണാകുളം കോതമംഗലം പ്ലാമുടിയിൽ ഉപയോഗിക്കാതെ കിടന്ന ബഹുനില കെട്ടിടത്തിന്റെ ടെറസ്സിലേക്ക് കയറിപ്പോയ പോത്തിനെ അഗ്നി രക്ഷാ സേനയുടെ മണിക്കൂറുകൾ നീണ്ട പരിശ്രമത്തിനൊടുവിൽ താഴെയിറക്കി. നാടകീയമായ രക്ഷാപ്രവർത്തനത്തിലൂടെയാണ് അഗ്നി രക്ഷാ സേനയ്ക്ക് പോത്തിനെ കെട്ടിടത്തിന്റെ മുകളിൽ നിന്ന് സുരക്ഷിതമായി താഴെയെത്തിക്കാനായത്.

ഇന്ന് വൈകീട്ട് ആറ് മണിയോടെയാണ് സംഭവം. പ്രദേശവാസിയുടെ ഉടമസ്ഥതയിലുള്ള പോത്തിനെ മേയാൻ വിട്ടതായിരുന്നു. ആളൊഴിഞ്ഞുകിടന്ന മൂന്ന് നില കെട്ടിടത്തിന്റെ പടിക്കെട്ടുവഴി വിരണ്ടോടിക്കയറിയ പോത്ത് മൂന്നാം നിലയും കടന്ന് ടെറസ്സിലെത്തുകയായിരുന്നു. എന്നാൽ മുകളിലെത്തിയ പോത്തിന് പിന്നീട് താഴേക്കിറങ്ങാൻ കഴിയാതെ വന്നു.

പോത്തിനെ കെട്ടിടത്തിന്റെ മുകളിൽ കണ്ട നാട്ടുകാർ ഉടൻ തന്നെ വിവരം കോതമംഗലം അഗ്നി രക്ഷാ സേനയെ അറിയിച്ചു. സ്ഥലത്തെത്തിയ സേനാംഗങ്ങൾ ആദ്യം പോത്തിനെ വരുതിയിലാക്കിയ ശേഷം വടം ഉപയോഗിച്ച് കെട്ടി സുരക്ഷിതമായി താഴേക്ക് ഇറക്കുകയായിരുന്നു. മണിക്കൂറുകൾ നീണ്ട പരിശ്രമത്തിനൊടുവിൽ പോത്തിനെ ഉടമസ്ഥന് കൈമാറി.

A buffalo that was allowed to graze wandered away from its normal area and somehow managed to climb all the way up to the terrace (rooftop) of a building. The unusual situation required the intervention of the fire rescue team, who had to devise a method to safely bring the animal back down to the ground