ഇടുക്കി: വിനോദയാത്രയ്ക്കെത്തിയ യുവാവ് പീരുമേട് തട്ടത്തികാനത്തിന് സമീപം തോട്ടിലെ കയത്തിൽപ്പെട്ട് മുങ്ങിമരിച്ചു. ഹരിപ്പാട് സ്വദേശി മഹേഷ് ആണ് മരിച്ചത്.സുഹൃത്തുക്കളോടൊപ്പം പീരുമേട്ടിലെത്തിയ മഹേഷ് ഒരു സ്വകാര്യ റിസോർട്ടിൽ താമസിച്ച ശേഷം സമീപത്തുള്ള തോട്ടിൽ ഇറങ്ങുകയായിരുന്നു. ഈ സമയം അപ്രതീക്ഷിതമായി കയത്തിൽ അകപ്പെടുകയായിരുന്നു.

 മഹേഷ് അപകടത്തിൽപ്പെട്ട ദാരുണമായ കാഴ്ച ഇതുവഴി വന്ന സമീപത്തെ കോളേജിലെ വിദ്യാർത്ഥികളാണ് ആദ്യം കണ്ടത്. ഉടൻ തന്നെ ഇവർ പീരുമേട് ഫയർഫോഴ്സിൽ വിവരം അറിയിച്ചു.ഫയർഫോഴ്സ് അധികൃതർ സ്ഥലത്തെത്തി മഹേഷിനെ കയത്തിൽ നിന്ന് പുറത്തെടുത്ത് പീരുമേട്ടിലെ താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

മഹേഷിന്റെ മൃതദേഹം നിലവിൽ ആശുപത്രിയിൽ സൂക്ഷിച്ചിരിക്കുകയാണ്. പോസ്റ്റ്മോർട്ടം നടപടികൾ പൂർത്തിയാക്കിയ ശേഷം മൃതദേഹം ബന്ധുക്കൾക്ക് വിട്ടുനൽകും.