കുവൈത്ത് സിറ്റി: കുട്ടികൾക്ക് ശ്വാസംമുട്ടൽ സാധ്യതയുണ്ടാക്കുന്ന തരത്തിലുള്ള നിർമ്മാണ തകരാറുകൾ കണ്ടെത്തിയതിനെ തുടർന്ന് പ്രശസ്ത കളിപ്പാട്ടമായ 'ലബുബു' (Labubu) തിരിച്ചുവിളിക്കാൻ ഉത്തരവിട്ട് കുവൈത്ത് വാണിജ്യ വ്യവസായ മന്ത്രാലയം. TOY3378 മോഡൽ കളിപ്പാട്ടമാണ് മന്ത്രാലയം വിപണിയിൽ നിന്ന് നീക്കം ചെയ്യുന്നത്.

ശ്വാസംമുട്ടൽ സാധ്യത

കളിപ്പാട്ടത്തിൻ്റെ ചില ഭാഗങ്ങൾ എളുപ്പത്തിൽ വേർപെട്ടുപോരാൻ സാധ്യതയുണ്ടെന്നും ഇത് ചെറിയ കുട്ടികൾക്ക് ശ്വാസംമുട്ടൽ പോലുള്ള ഗുരുതരമായ അപകടങ്ങൾ ഉണ്ടാക്കുമെന്നും മന്ത്രാലയം ഇൻസ്റ്റാഗ്രാം പോസ്റ്റിലൂടെ അറിയിച്ചു.

മന്ത്രാലയത്തിന്റെ അഭ്യർത്ഥന പ്രകാരം, മാതാപിതാക്കളും രക്ഷിതാക്കളും ഈ ഉൽപ്പന്നം ഉപയോഗിക്കുന്നത് ഉടൻ നിർത്തുകയും കുട്ടികൾക്ക് ലഭ്യമല്ലാത്ത സുരക്ഷിതമായ സ്ഥലത്തേക്ക് മാറ്റുകയും ചെയ്യണം.

ALSO READ: ഇന്ത്യന്‍ രൂപയും മറ്റു കറന്‍സികളും തമ്മിലുള്ള ഇന്നത്തെ വിനിമയ നിരക്ക് ഇങ്ങനെ | Indian Rupee in 2025 November 02 

റീഫണ്ട് ലഭിക്കും

കുവൈത്തിലുടനീളമുള്ള എല്ലാ ചില്ലറ വ്യാപാരികളോടും ഈ കളിപ്പാട്ടം കടകളിൽ നിന്ന് ഉടൻ നീക്കം ചെയ്യാൻ നിർദ്ദേശിച്ചിട്ടുണ്ട്. ലബുബു TOY3378 ഇതിനകം വാങ്ങിയ ഉപഭോക്താക്കൾക്ക്, പൂർണ്ണമായ റീഫണ്ടിനായി ഈ കളിപ്പാട്ടം അംഗീകൃത വിതരണക്കാരനായ ഹുസൈൻ അബ്ദുല്ല ദഷ്തി എസ്റ്റാബ്ലിഷ്‌മെന്റിന് തിരികെ നൽകാവുന്നതാണ്.

റീഫണ്ടിനായി ഉപഭോക്താക്കൾക്ക് 96000017 അല്ലെങ്കിൽ 56539540 എന്നീ നമ്പറുകളിൽ കമ്പനിയെ ബന്ധപ്പെടാം.

എന്താണ് ലബുബു?

ഹോങ്കോംഗ് ആർട്ടിസ്റ്റ് കാസിംഗ് ലംഗ്, ചൈനീസ് ബ്രാൻഡായ പോപ്പ് മാർട്ടുമായി സഹകരിച്ച് സൃഷ്ടിച്ച ഡിസൈനർ കളക്റ്റബിൾ കളിപ്പാട്ടമാണ് ലബുബു. ഉയരമുള്ള ചെവികളും വൃത്താകൃതിയിലുള്ള കണ്ണുകളും പൈശാചികമായ ചിരിയുമുള്ള ഈ കഥാപാത്രം കുട്ടികൾക്കിടയിൽ 'വൃത്തികെട്ട ഭംഗിയുള്ള' അഥവാ അ​ഗ്ലീ ക്യൂട്ട് (Ugly Cute) എന്ന പേരിലാണ് അറിയപ്പെടുന്നത്.

ഉള്ളിലെ രൂപം മറച്ചുവെച്ച് വിൽക്കുന്ന 'ബ്ലൈൻഡ് ബോക്‌സ്' കളിപ്പാട്ടങ്ങൾക്ക് ലോകമെമ്പാടും വലിയ പ്രചാരം ലഭിച്ചിട്ടുണ്ട്. 2024-ൻ്റെ തുടക്കം മുതൽ ലിമിറ്റഡ് എഡിഷൻ പതിപ്പുകൾക്ക് ആവശ്യകത കുതിച്ചുയർന്നെങ്കിലും, ഇത് ഓൺലൈൻ തട്ടിപ്പുകൾ വർദ്ധിക്കുന്നതിനും വ്യാജ വെബ്‌സൈറ്റുകൾ പെരുകുന്നതിനും കാരണമായിട്ടുണ്ട്. അതിനാൽ, അം​ഗീകൃത പ്ലാറ്റ്‌ഫോമുകളിൽ നിന്ന് മാത്രം കളിപ്പാട്ടങ്ങൾ വാങ്ങാൻ സൈബർ സുരക്ഷാ സ്ഥാപനമായ കാസ്‌പെർസ്‌കി മുന്നറിയിപ്പ് നൽകിയിട്ടുണ്ട്.

kuwait orders removal of popular labubu toy from market due to choking hazards for kids under 3. learn about the safety concerns, global recalls, and tips for parents in 2025.