ജിദ്ദ: ആകാശയാത്രയിൽ യാത്രികർക്ക് അതിവേഗ ഇന്റർനെറ്റ് സൗകര്യം ഒരുക്കി സഊദിയ എയർലൈൻസ്. പൂർണ്ണമായും ഇന്റർനെറ്റ് പ്രവർത്തനക്ഷമമാക്കിയ ആദ്യ വിമാന സർവീസായി ഇതോടെ സഊദിയ എയർലൈൻസ് മാറി. എയർലൈൻസിന്റെ ഡിജിറ്റൽ പരിവർത്തനത്തിലെ നിർണ്ണായക നാഴികക്കല്ലായി ഇത് മാറുമെന്നാണ് കരുതുന്നത്.

അതിവേഗവും വിശ്വസനീയവുമായ വിമാന സർവീസുകൾ വഴി യാത്രാനുഭവം മെച്ചപ്പെടുത്താനുള്ള സഊദിയയുടെ പ്രതിബദ്ധതയാണ് ഈ സംരംഭം ഉറപ്പിക്കുന്നത്. സേവനം ഔദ്യോഗികമായി നിലവിൽ വരുന്നതോടെ എല്ലാ യാത്രക്കാർക്കും സൗജന്യമായി ഇന്റർനെറ്റ് ലഭ്യമാകും.

300 Mbps വേഗത, തത്സമയ സ്ട്രീമിംഗ് സാധ്യം

തുടക്കത്തിൽ സെക്കൻഡിൽ 300 മെഗാബൈറ്റ് (Mbps) വരെ വേഗത നൽകുന്ന സാങ്കേതികവിദ്യ, ഭാവിയിൽ 800 Mbps വരെ വേ​ഗത കൈവരിക്കും. ഇതോടെ, 35,000 അടി ഉയരത്തിൽ വെർച്വൽ മീറ്റിംഗുകളിൽ പങ്കെടുക്കാനും ഒന്നിലധികം ഉപകരണങ്ങളിൽ ബ്രൗസ് ചെയ്യാനും യാത്രക്കാർക്ക് സാധിക്കും.

SV1044 വിമാനത്തിന്റെ പരീക്ഷണ പറക്കലിനിടെ, പുതിയ സേവനത്തിന്റെ ഗുണമേന്മ തെളിയിച്ചുകൊണ്ട് സഊദി പ്രോ ലീഗ് മത്സരം തത്സമയം സംപ്രേക്ഷണം ചെയ്തു. ഗതാഗത, ലോജിസ്റ്റിക് സേവന മന്ത്രിയും സഊദി എയർലൈൻസ് കോർപ്പറേഷൻ ബോർഡ് ചെയർമാനുമായ സാലിഹ് അൽ-ജാസർ ഉൾപ്പെടെയുള്ള പ്രമുഖർ പരീക്ഷണ പറക്കലിൽ പങ്കെടുത്തു.

ALSO READ: ആഭ്യന്തര കലാപം രൂക്ഷം; ഈ രാജ്യത്തേക്കുള്ള സർവീസുകൾ റദ്ദാക്കി എമിറേറ്റ്സ് 

ആകാശത്തുനിന്ന് വീഡിയോ കോൾ

കണക്ഷന്റെ സ്ഥിരത പ്രകടമാക്കുന്നതിനായി, മന്ത്രി അൽ-ജാസർ കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്നോളജി മന്ത്രി അബ്ദുല്ല അൽസ്വാഹയുമായി വിമാനത്തിൽ വെച്ച് തത്സമയ ടെലിവിഷൻ അഭിമുഖവും വീഡിയോ കോളും നടത്തി. മുഴുവൻ വിമാനക്കമ്പനികളിലും ഈ സംവിധാനം വേഗത്തിൽ വ്യാപിപ്പിക്കാൻ അദ്ദേഹം ഉദ്യോഗസ്ഥർക്ക് നിർദ്ദേശം നൽകി.

ഏകദേശം 20 വിമാനങ്ങളിൽ നിലവിൽ പുതിയ സാങ്കേതികവിദ്യ സജ്ജീകരിച്ചിട്ടുണ്ട്. അന്തിമ റെഗുലേറ്ററി അംഗീകാരങ്ങൾ ലഭിച്ച ശേഷം നിലവിലുള്ളതും പുതിയതുമായ എല്ലാ വിമാനങ്ങളിലേക്കും പദ്ധതി വ്യാപിപ്പിക്കുമെന്ന് സഊദിയ ഗ്രൂപ്പ് ഡയറക്ടർ ജനറൽ എഞ്ചിനീയർ ഇബ്രാഹിം ബിൻ അബ്ദുൾറഹ്മാൻ അൽ-ഒമർ അറിയിച്ചു. ഡിജിറ്റലായി ബന്ധിപ്പിച്ച വ്യോമയാന മേഖലയെക്കുറിച്ചുള്ള രാജ്യത്തിന്റെ വിശാലമായ കാഴ്ചപ്പാടിന് ഈ ലോഞ്ച് വലിയ പിന്തുണ നൽകും.

saudia airlines, saudi arabia's national carrier, has pioneered the world's first fully internet-enabled flight, delivering free high-speed wifi powered by starlink at cruising altitudes of 35,000 feet—boasting speeds up to 300 mbps (with potential for 800+ mbps) for seamless streaming and work, launched in a pilot phase on november 1, 2025, and set to expand fleet-wide for enhanced passenger experience.