മംഗോളിയ: സാൻ ഫ്രാൻസിസ്കോയിൽ നിന്ന് ഡൽഹിയിലേക്ക്  പോയ എയർ ഇന്ത്യ വിമാനം യാത്രാമധ്യേ സാങ്കേതിക തകരാറിനെ തുടർന്ന് മംഗോളിയയിലെ ഉലാൻബാതറിൽ അടിയന്തരമായി ഇറക്കി. ബോയിംഗ് 777 വിമാനമാണ് മുൻകരുതലെന്ന നിലയിൽ സുരക്ഷിതമായി ലാൻഡ് ചെയ്തത്. യാത്രക്കാരും ജീവനക്കാരും സുരക്ഷിതരാണെന്ന് എയർ ഇന്ത്യ അധികൃതർ അറിയിച്ചു.

ആവശ്യമായ പരിശോധനകൾ നടക്കുകയാണെന്നും യാത്രക്കാരെ എത്രയും പെട്ടെന്ന് അവരുടെ ലക്ഷ്യസ്ഥാനത്തേക്ക് എത്തിക്കാനുള്ള ശ്രമങ്ങൾ നടത്തുകയാണെന്നും എയർ ഇന്ത്യ വിശദീകരിച്ചു. അപ്രതീക്ഷിതമായ ഈ സാഹചര്യത്തിൽ യാത്രക്കാർക്കുണ്ടായ ബുദ്ധിമുട്ടിൽ ഖേദം പ്രകടിപ്പിച്ചു. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് പരമമായ മുൻഗണന നൽകുന്നതെന്നും കമ്പനി വ്യക്തമാക്കി.

വിമാനക്കമ്പനി യാത്രക്കാർക്കായി താമസസൗകര്യവും ഭക്ഷണവും ഉൾപ്പെടെയുള്ള ക്രമീകരണങ്ങൾ ഒരുക്കിയിട്ടുണ്ട്. മംഗോളിയയിൽ കുടുങ്ങിയ യാത്രക്കാരെ ഡൽഹിയിലേക്ക് എത്തിക്കാൻ ബദൽ ക്രമീകരണങ്ങൾ ഒരുക്കുകയാണെന്നും എയർ ഇന്ത്യ അറിയിച്ചു. മംഗോളിയയിൽ കുടുങ്ങിയ എയർ ഇന്ത്യ യാത്രക്കാർക്ക് ആവശ്യമായ എല്ലാ സഹായങ്ങളും വിദേശകാര്യ മന്ത്രാലയം നൽകുന്നുവെന്നാണ് റിപ്പോർട്ട്.

An Air India flight traveling from San Francisco (SFO) to Delhi was forced to make a precautionary landing in Ulaanbaatar, Mongolia, after the flight crew detected a suspected technical issue mid-air