ബ്യൂണസ് എയേഴ്സ്: 2026-ലെ ഫിഫ ലോകകപ്പിൽ കിരീടം നിലനിർത്താൻ, ലയണൽ മെസ്സിയെ കൂടുതൽ ഓടാൻ അനുവദിക്കാതെ കൃത്യമായ ഇടങ്ങളിൽ പന്തെത്തിക്കാൻ ടീമംഗങ്ങൾ ശ്രദ്ധിക്കണമെന്ന് മുൻ അർജൻ്റീനിയൻ പ്രതിരോധ താരം പാബ്ലോ സബലേറ്റ അഭിപ്രായപ്പെട്ടു. മെസ്സിയുടെ ഇപ്പോഴത്തെ പ്രായവും ശാരീരികക്ഷമതയും കണക്കിലെടുത്ത് ടീം തന്ത്രം മാറ്റേണ്ടതിൻ്റെ പ്രാധാന്യമാണ് അദ്ദേഹം എടുത്തുപറഞ്ഞത്.

1962-ൽ ബ്രസീലിനു ശേഷം തുടർച്ചയായി ലോകകപ്പ് നേടുന്ന ആദ്യ ടീമായി മാറാനാണ് നിലവിലെ ചാമ്പ്യന്മാരായ അർജൻ്റീന ഒരുങ്ങുന്നത്. സൗത്ത് അമേരിക്കൻ ഫിഫാ ലോകകപ്പ് യോഗ്യതാ മത്സരങ്ങളിൽ അവർ ഒന്നാം സ്ഥാനത്തോടെ യോ​ഗ്യത നേടി കഴിഞ്ഞു. അടുത്ത ലോകകപ്പ് നടക്കുമ്പോൾ മെസ്സിക്ക് 39 വയസ്സ് തികയാനിരിക്കുകയാണ്. പ്രതാപകാലത്തെപ്പോലെ പ്രതിരോധ നിരയെ ഭേദിച്ച്, ആഴത്തിൽ ഇറങ്ങി ഡ്രിബിൾ ചെയ്യാൻ അദ്ദേഹത്തിന് പഴയ ഊർജ്ജം ഉണ്ടാകില്ല.മെസ്സിക്ക് വേണ്ടി ടീം ഭൂരിഭാഗം കായിക അദ്ധ്വാനങ്ങളും ഏറ്റെടുക്കണം. ഇന്റർ മിയാമിയിൽ മെസ്സിക്ക് വേണ്ടി സഹതാരങ്ങൾ ഓടുന്നത് പോലെ, അർജൻ്റീന താരങ്ങൾ അദ്ദേഹത്തെ നന്നായി പിന്തുണയ്ക്കണം.

ഇന്റർ മിയാമി മോഡൽ അർജൻ്റീനയിൽ

"ഇന്റർ മിയാമിയിലെ കളികൾ ശ്രദ്ധിച്ചാൽ, അത് ദേശീയ ടീമിൽ നമ്മുക്ക് കാണാൻ കഴിയുന്നതിനോട് സാമ്യമുള്ളതാണ്. കളിക്കാർ മെസ്സിയെ ചുറ്റിപ്പറ്റിയാണ് കളിക്കുന്നത്. മെസ്സിക്ക് വേണ്ടി പരമാവധി ഓടാൻ അവർ ആഗ്രഹിക്കുന്നു.""ബോക്സിന് പുറത്തുള്ള അവസാന ഘട്ടത്തിൽ മെസ്സിക്ക് പന്ത് ലഭിച്ചാൽ, രണ്ടോ മൂന്നോ കളിക്കാരെ മറികടന്ന് പന്ത് വലയിലെത്തിക്കാൻ അദ്ദേഹത്തിന് ഇപ്പോഴും കഴിയും. ആ മാന്ത്രിക നിമിഷങ്ങളും സർഗ്ഗാത്മകതയും ടീമിലേക്ക് കൊണ്ടുവരുന്ന പ്രധാന വ്യക്തി അദ്ദേഹം തന്നെയാണ്."

തന്ത്രപരമായ നീക്കം

മെസ്സിയെ പരമാവധി ഉപയോഗപ്പെടുത്താൻ അർജൻ്റീന താരങ്ങൾ ശ്രദ്ധിക്കേണ്ട കാര്യങ്ങൾ സബലേറ്റ പറഞ്ഞു."നമുക്കിപ്പോൾ അഞ്ച് വർഷം മുമ്പുള്ള മെസ്സിയെ ലഭ്യമല്ല. അന്ന് അദ്ദേഹത്തിന് പകുതി ലൈനിൽ നിന്ന് പന്തുമായി ഓടിത്തുടങ്ങാൻ കഴിഞ്ഞേനെ.മെസ്സിക്ക് പന്തിൽ നിന്ന് വിശ്രമിക്കാൻ ടീം ഒരു വഴി കണ്ടെത്തണം. എന്നാൽ, ടീമിന് പന്ത് വീണ്ടും ലഭിക്കുമ്പോൾ, അവർക്ക് അദ്ദേഹത്തെ ഒരു നല്ല സ്ഥാനത്ത് കണ്ടെത്താൻ കഴിയണം.ബാക്കിയുള്ള കാര്യങ്ങൾ അദ്ദേഹത്തിന് ഇപ്പോഴും ചെയ്യാൻ കഴിയും. ഗെയിമുകൾ ജയിപ്പിക്കാനും ഗോളുകൾ നേടാനും അദ്ദേഹത്തിന് ഇപ്പോഴും ആ ഗുണമുണ്ട്. ലോകകപ്പിൽ നിങ്ങൾക്ക് വേണ്ടത് ഗെയിമുകൾ ജയിക്കുക എന്നതാണ്."യുവതാരങ്ങളെ അണിനിരത്തി മെസ്സിക്ക് കളിക്കളത്തിൽ കൂടുതൽ ഇടം നൽകി, അദ്ദേഹത്തിൻ്റെ 'മാജിക്' ഗോളുകൾക്കായി മാത്രം ഉപയോഗപ്പെടുത്തുന്ന തന്ത്രമാണ് സബലേറ്റ ലക്ഷ്യമിടുന്നത്. യോഗ്യതാ മത്സരങ്ങളിൽ 12 കളികളിൽ നിന്ന് 8 ഗോളുകളും 3 അസിസ്റ്റുകളുമായി മെസ്സി മികച്ച പ്രകടനം കാഴ്ചവെച്ചിട്ടുണ്ട്.