തിരുവനന്തപുരം: വര്‍ക്കലയില്‍ ട്രെയിനില്‍ നിന്നും പെണ്‍കുട്ടിയെ തള്ളിയിട്ട സംഭവത്തില്‍ സിസിടിവി ദൃശ്യങ്ങള്‍ പൊലീസിന് ലഭിച്ചു. പിടിയിലായ സുരേഷ് പെണ്‍കുട്ടിയെ ചവിട്ടി തള്ളിയിടുകയായിരുന്നുവെന്ന് ലഭിച്ച ദൃശ്യങ്ങളില്‍ നിന്ന് വ്യക്തമാണ്. ഇവര്‍ സഞ്ചരിച്ച കേരള എക്‌സ്പ്രസിലെ ദൃശ്യങ്ങളാണ് പൊലിസിന് ലഭിച്ചത്. രണ്ടാമത്തെ പെണ്‍കുട്ടിയെ പ്രതി ഉപദ്രവിക്കാന്‍ ശ്രമിക്കുന്നതും ദൃശ്യങ്ങളിലുണ്ട്. 

അതേസമയം, ആക്രമണത്തിനിരയായി പുറത്തേക്കു തെറിച്ചുവീണ പേയാട് സ്വദേശി പത്തൊന്‍പതുകാരി സോനു എന്ന ശ്രീക്കുട്ടിയുടെ ആരോഗ്യനില ഗുരുതരമായി തുടരുകയാണ്. അപകടനില തരണം ചെയ്തിട്ടില്ലെന്ന് ഡോക്ടര്‍മാര്‍ അറിയിച്ചു. 

പ്രതി തിരുവനന്തപുരം പനച്ചമൂട് സ്വദേശി സുരേഷ് കുമാറിനെതിരേ കൊലപാതകശ്രമത്തിന് കേസെടുത്തിട്ടുണ്ട്. ട്രെയിനില്‍നിന്ന് ശ്രീക്കുട്ടിയെ പിന്നില്‍നിന്ന് നടുവിനു ചവിട്ടി പുറത്തേക്കു തള്ളിയിട്ടത് കൊലപ്പെടുത്തുക എന്ന ലക്ഷ്യത്തോടെയായിരുന്നുവെന്ന് എഫ്.ഐ.ആറില്‍ പറയുന്നു. 

ALSO READ: പ്രായപൂര്‍ത്തിയാവാത്ത പെണ്‍കുട്ടിയെ മദ്യം നല്‍കി പീഡിപ്പിച്ചു; രണ്ടാനച്ഛനും കൂട്ടുനിന്ന അമ്മയ്ക്കും 180 വര്‍ഷം കഠിനതടവ്

വാതില്‍ക്കല്‍ നിന്ന് മാറാന്‍ പറഞ്ഞതിന്റെ ദേഷ്യത്തിലാണ് യുവതിയെ ആക്രമിച്ചതെന്ന് പ്രതി പൊലിസിനോട് പറഞ്ഞു. ഇയാള്‍ മദ്യലഹരിയിലായിരുന്നു. 

ഞായറാഴ്ച രാത്രി എട്ടരയ്ക്കു ശേഷം ന്യൂഡല്‍ഹി-തിരുവനന്തപുരം കേരള എക്സ്പ്രസ് വര്‍ക്കല സ്റ്റേഷന്‍ പിന്നിട്ടതിനു പിന്നാലെയാണ് സംഭവം. ആലുവയില്‍നിന്ന് തിരുവനന്തപുരത്തേക്ക് വരികയായിരുന്നു സോനുവും സുഹൃത്ത് അര്‍ച്ചനയും. എസ്.എല്‍.ആര്‍ കോച്ചില്‍ ശുചിമുറിയില്‍നിന്ന് പുറത്തിറങ്ങി വാതിലിനടുത്ത് നില്‍ക്കുകയായിരുന്ന സോനുവിനെ സുരേഷ്‌കുമാര്‍ ചവിട്ടി തള്ളിയിടുകയായിരുന്നു. അപകടം കണ്ടു നിലവിളിച്ച സോനുവിന്റെ സുഹൃത്ത് അര്‍ച്ചനയെയും പ്രതി തള്ളിയിട്ടു. എന്നാല്‍ അര്‍ച്ചന വാതിലിന്റെ കമ്പിയില്‍ പിടിച്ചുതൂങ്ങി. കോച്ചിലെ മറ്റ് യാത്രക്കാരാണ് അര്‍ച്ചനയെ ട്രെയിനിനുള്ളിലേക്ക് കയറ്റിയത്.

പരുക്കേറ്റ് ട്രാക്കില്‍ കിടന്ന സോനുവിനെ യാത്രക്കാര്‍ നല്‍കിയ വിവരത്തിന്റെ അടിസ്ഥാനത്തില്‍ മറ്റൊരു ട്രാക്കിലൂടെ വരികയായിരുന്ന കന്യാകുമാരി-കൊല്ലം മെമു ട്രെയിനില്‍ വര്‍ക്കല സ്റ്റേഷനിലെത്തിച്ചു. തുടര്‍ന്ന് തിരുവനന്തപുരം മെഡിക്കല്‍ കോളജില്‍ പ്രവേശിപ്പിച്ചു.

English Summary: Police have obtained crucial CCTV footage in the Varkala train attack case showing the accused, Suresh Kumar from Panachamoodu, kicking and pushing 19-year-old Sreekutty (Sonu) out of the Kerala Express train. The visuals confirm that he assaulted her deliberately and also tried to harass another girl, Archana.