ദുബൈ: ഇന്ത്യയിലേക്കും തിരിച്ചും യാത്ര ചെയ്യുന്ന ആയിരക്കണക്കിന് വിമാന യാത്രക്കാർക്ക് ആശ്വാസകരമായ പുതിയ നിയമ നിർദ്ദേശങ്ങളുമായി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ). ടിക്കറ്റ് ബുക്ക് ചെയ്ത് 48 മണിക്കൂറിനുള്ളിൽ വിമാന ടിക്കറ്റുകൾ പിഴയില്ലാതെ റദ്ദാക്കാനും തീയതി പുതുക്കാനും പുതിയ നിയമം വഴിയൊരുക്കും. യുഎഇയിൽ താമസിക്കുന്ന ഇന്ത്യൻ പ്രവാസികൾക്ക് ഇത് വലിയ തോതിൽ പ്രയോജനകരമാകുമെന്നാണ് കണക്കാക്കുന്നത്.

ആഭ്യന്തര വിമാന യാത്രകൾക്ക് കുറഞ്ഞത് അഞ്ച് ദിവസവും അന്താരാഷ്ട്ര വിമാന യാത്രകൾക്ക് 15 ദിവസവും  ഉണ്ടെങ്കിൽ, അധിക ചാർജ്ജില്ലാതെ തന്നെ യാത്രക്കാർക്ക് ടിക്കറ്റ് റദ്ദാക്കാനോ പുതുക്കാനോ അനുമതി നൽകുന്ന ഒരു പുതിയ നിയമം ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) നിർദ്ദേശിച്ചിട്ടുണ്ട്. ഈ സമയപരിധിക്കുള്ളിൽ റദ്ദാക്കുകയോ മാറ്റം വരുത്തുകയോ ചെയ്യുമ്പോൾ, വിമാന നിരക്കിലെ വ്യത്യാസം ഒഴികെ മറ്റ് അധിക ചാർജുകളൊന്നും ഈടാക്കില്ല.

ALSO READ: അൽ ഐനിൽ ആദ്യമായി 'മനാർ അബൂദബി'; രാത്രിയിൽ പ്രകാശപൂരിതമായി ഈന്തപ്പനത്തോട്ടങ്ങൾ 

റീഫണ്ടിന് 21 ദിവസത്തെ സമയപരിധി

ട്രാവൽ ഏജന്റുമാർ വഴിയുള്ള ബുക്കിംഗുകളുടെ റീഫണ്ട് വൈകുന്നതിലെ പ്രശ്നം പുതിയ നിയമത്തിലൂടെ പരിഹരിക്കപ്പെടും. പി.ടി.ഐ റിപ്പോർട്ട് പ്രകാരം, വിമാനക്കമ്പനികൾ വഴിയോ ട്രാവൽ ഏജൻ്റുമാർ വഴിയോ ബുക്ക് ചെയ്ത എല്ലാ ടിക്കറ്റുകളുടെയും റീഫണ്ട് 21 പ്രവൃത്തി ദിവസങ്ങൾക്കുള്ളിൽ പൂർത്തിയാക്കണം. ഏജൻ്റുമാർ കാലതാമസം വരുത്തിയാലും റീഫണ്ട് നൽകുന്നതിന് വിമാനക്കമ്പനികൾ തന്നെയായിരിക്കും ഉത്തരവാദികൾ.

സൗജന്യമായി പേര് തിരുത്താം

ടിക്കറ്റിലെ ചെറിയ അക്ഷരത്തെറ്റുകൾക്ക് വലിയ ഫീസ് നൽകേണ്ടി വരുന്ന യാത്രക്കാർക്ക് ആശ്വാസമേകുന്ന വ്യവസ്ഥകളും നിർദ്ദേശിച്ചിട്ടുണ്ട്. എയർലൈനിൻ്റെ വെബ്സൈറ്റ് വഴി നേരിട്ട് ടിക്കറ്റ് വാങ്ങിയവർക്ക്, ബുക്ക് ചെയ്ത് 24 മണിക്കൂറിനുള്ളിൽ പേരുകളിലെ അക്ഷരത്തെറ്റുകൾ തിരുത്താൻ അധിക നിരക്ക് ഈടാക്കാൻ പാടില്ലെന്ന വ്യവസ്ഥ ഒട്ടേറെ യാത്രികർക്ക് സഹായകമാകും.

ALSO READ: യുഎഇയിൽ നാളെ 'ബീവർ സൂപ്പർമൂൺ'; ഈ വർഷത്തെ ഏറ്റവും വലുതും തിളക്കമേറിയതുമായ ചന്ദ്രനെക്കാണാൻ അവസരം 

മെഡിക്കൽ എമർജൻസികൾക്ക് പ്രത്യേക ഇളവ്

യാത്രക്കാർക്ക് ഏറെ ഉപകാരപ്രദമാകുന്ന മറ്റൊരു പ്രധാന നിർദ്ദേശവും പുതിയ വ്യവസ്ഥകളിൽ ഉൾപ്പെടുത്തിയിട്ടുണ്ട്. മെഡിക്കൽ അത്യാഹിതം കാരണം യാത്ര റദ്ദാക്കേണ്ടി വരുന്നവർക്ക് വിമാനക്കമ്പനികൾ മുഴുവൻ റീഫണ്ടോ അല്ലെങ്കിൽ ഭാവി യാത്രകൾക്കായി ഉപയോഗിക്കാവുന്ന ക്രെഡിറ്റ് ഷെല്ലോ നൽകണമെന്ന് ഡിജിസിഎ ആവശ്യപ്പെട്ടു.

കരട് നിയമങ്ങളെക്കുറിച്ച് എയർലൈനുകൾ, ട്രാവൽ ഏജൻ്റുമാർ, പൊതുജനങ്ങൾ എന്നിവരിൽ നിന്ന് നവംബർ 30 വരെ ഡിജിസിഎ ഫീഡ്‌ബാക്ക് ക്ഷണിച്ചിട്ടുണ്ട്.

പുതിയ മാനദണ്ഡങ്ങൾ നടപ്പിലാക്കുന്നതോടെ, ഇന്ത്യയിലെ വിമാന യാത്രാ നിയന്ത്രണങ്ങൾ ആഗോള തലത്തിലെ മികച്ച രീതികളുമായി കൂടുതൽ പൊരുത്തപ്പെടും. യുഎഇയിൽ നിന്ന് സ്ഥിരമായി ഇന്ത്യയിലേക്ക് യാത്ര ചെയ്യുന്നവർക്ക് ഇത്  വലിയ തോതിൽ സ്വാഗതാർഹമായ ഒരു മാറ്റമായിരിക്കും.

dgca proposes game-changing air ticket rules allowing penalty-free cancellations and amendments within 48 hours of booking. uae travelers gain faster refunds and flexibility on india-bound flights—excluding last-minute bookings. a boost for millions facing unpredictable plans amid rising airfares.