പാലക്കാട്: സാംസ്‌ക്കാരിക വകുപ്പ്, ജില്ല ഭരണകൂടം, ഇന്‍ഫര്‍മേഷന്‍ ആന്‍ഡ് പബ്ലിക്ക് റിലേഷന്‍സ് വകുപ്പ്, ലൈബ്രറി കൗണ്‍സില്‍, വിവിധ സന്നദ്ധ സംഘടനകള്‍, വിവിധ വകുപ്പുകളുടെ സംയുക്തമായി നടപ്പാക്കുന്ന ശ്രീനാരായണ ഗുരുവിന്റെ നമുക്ക് ജാതിയില്ല വിളംബരം ശതാബ്ദി ആഘോഷത്തിന്റെ പ്രചരണ പരിപാടിക്കായി സംഘാടക സമിതി രൂപീകരിച്ചു.
ജില്ലയുടെ ചുമതലയുളള നിയമ സാംസ്‌ക്കാരിക, പിന്നാക്കക്ഷേമ വകുപ്പ് മന്ത്രി എ.കെ ബാലന്‍, മുന്‍ മുഖ്യമന്ത്രി വി.എസ് അച്യുതാനന്ദന്‍ ജില്ലയിലെ എം.പിമാര്‍, എം.എല്‍.എമാര്‍, ജില്ല പഞ്ചായത്ത് പ്രസിഡന്റ്, നഗരസഭ അധ്യക്ഷ രക്ഷാധികാരികളായിരിക്കും.
ജില്ല കലക്ടര്‍ പി. മേരിക്കുട്ടി സംഘാടക സമിതി ചെയര്‍പേഴ്‌സനും, സംസ്ഥാന ലൈബ്രറി കൗണ്‍സില്‍ എക്‌സിക്യൂട്ടിവ് അംഗം പി.കെ സുധാകരന്‍ കണ്‍വീനറും ആയിരിക്കും. ജില്ല പഞ്ചായത്ത് വൈസ് പ്രസിഡന്റ് ടി.കെ നാരായണദാസ്, എ.ഡി.എം എസ് വിജയന്‍, ജില്ല പൊലിസ് മേധാവി എസ്. ശ്രീനിവാസ്, ആര്‍.ഡി.ഒമാരായ പി.ബി നൂഹ്, എ. ഉണ്ണികൃഷ്ണന്‍, ചലച്ചിത്ര നിരൂപകന്‍ ജി.പി രാമചന്ദ്രന്‍ തുടങ്ങിയവര്‍ വൈസ് ചെയര്‍മാന്‍മാരായിരിക്കും. ജില്ല പബ്ലിക്ക് ലൈബ്രറി സെക്രട്ടറി ടി.ആര്‍ അജയന്‍, പി.ആര്‍.ഡി മേഖല ഡെപ്യൂട്ടി ഡയറക്ടര്‍ എം.എസ് അലികുഞ്ഞ്, പു.ക.സ സെക്രട്ടറി എ.കെ ചന്ദ്രന്‍ കുട്ടി ജോയിന്റ് കണ്‍വീനര്‍മാരായിരിക്കും. ഇതിനു പുറമെ പരിപാടിയില്‍ സഹകരിക്കുന്ന വിവിധ വകുപ്പ് പ്രതിനിധികള്‍ ഉള്‍പ്പെട്ട 101 അംഗ എക്‌സിക്യുട്ടീവ് അംഗങ്ങളേയും തിരഞ്ഞെടുത്തു.
പ്രചരണപരിപാടിയുടെ ജില്ലാതല ഉദ്ഘാടനം സെപ്റ്റംബര്‍ 25 ന് മുന്‍സിപ്പല്‍ ടൗണ്‍ഹാളില്‍ വൈകിട്ട് മൂന്നിന് മന്ത്രി എ.കെ ബാലന്‍ നിര്‍വ്വഹിക്കും. വിഷയം ആസ്പദമാക്കി മുഖ്യപ്രഭാഷണങ്ങളും സംവാദവും ഉദ്ഘാടന ചടങ്ങിനോടനുബന്ധിച്ച് നടക്കും.
തുടര്‍ന്ന് കലാമണ്ഡലം വിദ്യാര്‍ഥികള്‍ അവതരിപ്പിക്കുന്ന വിവിധ കലാപരിപാടികളും വിഷയത്തെ അധികരിച്ചുള്ള കവിതാപാരായണവും നടക്കും. പ്രചരണ പരിപാടിയുടെ ഭാഗമായി സ്‌ക്കൂള്‍ വിദ്യാര്‍ഥികള്‍ക്കായി ക്വിസ്, ഉപന്യാസ രചന, ചിത്രരചന മത്സരങ്ങളും സംഘടിപ്പിക്കും.
ജില്ലാ കലക്ടര്‍ പി മേരിക്കുട്ടിയുടെ അധ്യക്ഷതയില്‍ കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന സംഘാടക സമിതി രൂപീകരണ യോഗത്തില്‍ മന്ത്രി എ.കെ ബാലന്റെ പ്രതിനിധി സി.പി പ്രമോദ്, എ.ഡി.എം എസ് വിജയന്‍, ജില്ലാ പഞ്ചായത്ത് വൈസ് പ്രസിഡന്റ് ടി.കെ നാരായണദാസ്, സംസ്ഥാന ലൈബ്രറി കൗണ്‍സില്‍ എക്‌സിക്യൂട്ടിവ് അംഗം പി.കെ സുധാകരന്‍, പി.ആര്‍.ഡി ഡെപ്യൂട്ടി ഡയറക്ടര്‍ എം.എസ് അലികുഞ്ഞ്, അസിസ്റ്റന്റ് എഡിറ്റര്‍ പ്രിയ ഉണ്ണികൃഷ്ണന്‍, എം കാസിം പങ്കെടുത്തു.