മാഞ്ചസ്റ്റർ: തൻ്റെ കരിയർ രൂപപ്പെട്ട കൗമാരപ്രായത്തിൽ മാഞ്ചസ്റ്റർ യുണൈറ്റഡിന് പകരം ലണ്ടൻ ക്ലബ്ബായ ആഴ്‌സണലിൽ (Arsenal) ചേരാനുള്ള അവസരം തനിക്കുണ്ടായിരുന്നതായി പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോ  വെളിപ്പെടുത്തി. റെഡ് ഡെവിൾസിനായി രണ്ട് കാലഘട്ടങ്ങളിൽ കളിച്ച ഇതിഹാസ താരത്തിന്റെ പ്രൊഫഷണൽ കരിയർ വഴിതിരിച്ചുവിട്ട ഈ സംഭവം, യൂട്യൂബിൽ സംപ്രേഷണം ചെയ്ത പിയേഴ്‌സ് മോർഗനുമായുള്ള പ്രത്യേക അഭിമുഖത്തിലാണ് അദ്ദേഹം സ്ഥിരീകരിച്ചത്.

 "ആഴ്‌സണലിനെ എനിക്കിഷ്ടമാണ്, എതിരാളിയായി കാണുന്നില്ല"

വർഷങ്ങളായി ഫുട്ബോൾ ലോകത്ത് പ്രചരിച്ച ഒരു കഥയാണ് റൊണാൾഡോയുടെ ഈ വെളിപ്പെടുത്തലിലൂടെ സ്ഥിരീകരിക്കപ്പെടുന്നത്. ആഴ്‌സണലിനോടുള്ള തൻ്റെ ആരാധന മറച്ചുവെക്കാത്ത റൊണാൾഡോ, അവരെ ഒരു എതിരാളി ടീമായി പോലും താൻ കണക്കാക്കുന്നില്ലെന്നും പറഞ്ഞു.

"ഇത് സത്യമാണ്. വർഷങ്ങൾക്ക് മുമ്പ് ഞാൻ ആഴ്‌സണലിൽ ചേരാൻ അടുത്തിരുന്നു... പക്ഷേ അത് നടക്കാതെ പോയി. സത്യം പറഞ്ഞാൽ, ആഴ്സണലിനെ നോക്കുമ്പോൾ, ഞാൻ അവരെ ഒരിക്കലും ഒരു എതിരാളിയായി കാണുന്നില്ല. എനിക്ക് ആ ടീമിനെ ഇഷ്ടമാണ്, എനിക്ക് അവരെ ഇഷ്ടമാണ്!", റൊണാൾഡോ പറഞ്ഞു.

സ്‌പോർട്ടിംഗ് ക്ലബ്ബിന്റെ യുവതാരമായിരിക്കുമ്പോളാണ് റൊണാൾഡോ ആഴ്‌സൻ വെംഗറുടെ ആഴ്‌സണലിന്റെ ശ്രദ്ധ ആകർഷിച്ചത്. എന്നാൽ, 18 വയസ്സുള്ളപ്പോൾ സ്‌പോർട്ടിംഗിനുവേണ്ടി മാഞ്ചസ്റ്റർ യുണൈറ്റഡിനെതിരെ നടന്ന പ്രീ-സീസൺ സൗഹൃദ മത്സരത്തിൽ താരം കാഴ്ചവെച്ച മിന്നുന്ന പ്രകടനമാണ് അലക്‌സ് ഫെർഗൂസനെക്കൊണ്ട് ഉടൻ തന്നെ താരത്തെ ഓൾഡ് ട്രാഫോർഡിലേക്ക് എത്തിക്കാൻ തീരുമാനമെടുപ്പിച്ചത്.

 മാഞ്ചസ്റ്റർ യുണൈറ്റഡ് കിരീടം നേടില്ല: പ്രവചനവുമായി റൊണാൾഡോ

പിയേഴ്‌സ് മോർഗനുമായുള്ള അഭിമുഖത്തിൽ, നിലവിലെ പ്രീമിയർ ലീഗ് കിരീടപ്പോരാട്ടത്തെക്കുറിച്ചും റൊണാൾഡോ പ്രവചനം നടത്തി. മുൻ ക്ലബ്ബായ മാഞ്ചസ്റ്റർ യുണൈറ്റഡ് ഈ സീസണിൽ ലീഗ് കിരീടത്തിനായി മത്സരിക്കാൻ സാധ്യതയില്ലെന്ന് അദ്ദേഹം തുറന്നു പറഞ്ഞു. നിലവിൽ പോയിന്റുകൾ ഒരുപാട് പിന്നിലായതാണ് ഇതിന് കാരണം.

"പ്രീമിയർ ലീഗിൽ എന്ത് സംഭവിക്കുമെന്ന് പറയാൻ കഴിയില്ല... മാഞ്ചസ്റ്റർ യുണൈറ്റഡ് പ്രീമിയർ ലീഗ് നേടാൻ പോകുന്നില്ല, കാരണം അവർ ഇപ്പോൾ വളരെ പോയിൻ്റുകൾ പിന്നിലാണ്. അത് സംഭവിക്കാൻ സാധ്യതയുണ്ടെങ്കിലും ഞാൻ അതിൽ വിശ്വസിക്കുന്നില്ല. ആഴ്‌സണലിന് ലീഗ് നേടാൻ കഴിയും", സഊദി ക്ലബ്ബായ അൽ-നാസറിൻ്റെ സൂപ്പർതാരം പറഞ്ഞു.

നിലവിൽ പ്രീമിയർ ലീഗിൽ രണ്ടാം സ്ഥാനത്തുള്ള മാഞ്ചസ്റ്റർ സിറ്റിയേക്കാൾ ആറ് പോയിൻ്റ് വ്യത്യാസത്തിൽ ആഴ്‌സണൽ ആണ് ഒന്നാം സ്ഥാനത്ത്. ഈ സീസണിൽ ഒരൊറ്റ തോൽവി മാത്രം വഴങ്ങിയ ആഴ്സണൽ ടീമിനെ പിന്തുണച്ചുകൊണ്ടുള്ള റൊണാൾഡോയുടെ പ്രവചനം ആരാധകർക്കിടയിൽ ചർച്ചയായി കഴിഞ്ഞു.