മെൽബൺ: ഇന്ത്യൻ ഓപ്പണർ അഭിഷേക് ശർമയുടെ മിന്നൽ പ്രകടനങ്ങൾക്ക് ഓസ്ട്രേലിയൻ പേസ് ഇതിഹാസം ജേസൺ ഗില്ലെസ്പിയുടെ അഭിനന്ദനം. "അഭിഷേക് ശരിക്കുമൊരു റൺമെഷീനാണ്. ആദ്യ പന്ത് മുതൽ ആക്രമണോത്സുകമായി കളിക്കുന്ന അദ്ദേഹം ടി20 ക്രിക്കറ്റിൽ ഇന്ത്യയുടെ സുപ്രധാന ബാറ്ററായി മാറിയിരിക്കുന്നു" എന്ന് ഗില്ലെസ്പി വ്യക്തമാക്കി. ഇന്ത്യയുടെ ആക്രമണോത്സുക ബാറ്റിംഗ് ശൈലിക്ക് അഭിഷേക് പ്രധാന കാരണമാണെന്നും മുൻ ഓസീസ് പേസർ ചൂണ്ടിക്കാട്ടി.

ഇന്ത്യൻ ജേഴ്സിയിൽ 27 ടി20 മത്സരങ്ങളിലെ 26 ഇന്നിംഗ്സുകളിൽ നിന്ന് 961 റൺസ് അഭിഷേക് നേടിയിട്ടുണ്ട് ശരാശരി 36.96, സ്ട്രൈക്ക് റേറ്റ് 192.20. രണ്ട് സെഞ്ചുറികളും ആറ് അർധസെഞ്ചുറികളും അതിലുണ്ട്. അദ്ദേഹത്തിന്റെ ഉയർന്ന സ്കോർ 54 പന്തിൽ 135 റൺസാണ്. "അഭിഷേകിന്റെ ശൈലി എതിരാളികളെ സമ്മർദ്ദത്തിലാക്കുന്നു. ക്രീസിലേക്ക് ഇറങ്ങി ആദ്യ പന്ത് മുതൽ ആക്രമിക്കുന്നു. ഒരു ഓപ്പണറിന്റെ റോൾ പൂർണമായി നിർവഹിക്കുന്നതാണ്" എന്ന് ഗില്ലെസ്പി 'ഫാസ്റ്റ് ബൗളിംഗ് കാർട്ടർ' യൂട്യൂബ് ചാനലിൽ പറഞ്ഞു. "ഒരു പന്തിന് കുറഞ്ഞത് രണ്ട് റൺസ് വീതം അത് റൺമെഷീനിന്റെ സ്വഭാവമാണ്" എന്ന് അദ്ദേഹം ചിരിച്ചുകൊണ്ട് കൂട്ടിച്ചേർത്തു.

മുൻ ഓസ്ട്രേലിയൻ പേസർ ഡാമിയൻ ഫ്ലെമിംഗും അഭിഷേകിന്റെ പ്രകടനത്തെ പ്രകീർത്തിച്ചു. "അവന്റെ റൺസുകൾ എല്ലാം വ്യത്യസ്ത ആംഗിളുകളിലൂടെയാണ് വരുന്നത്. ഞാൻ അദ്ദേഹത്തിന്റെ റെക്കോർഡുകൾ പരിശോധിച്ചു ഫസ്റ്റ് ക്ലാസ് ക്രിക്കറ്റിൽ അപൂർവമായി മാത്രം കളിച്ചു. ദേശീയതലത്തിൽ ഏകദിനങ്ങളിൽ പോലും കുറച്ച് മാത്രം പരിചയം. ഇന്ത്യയ്ക്കായി ഒരു ഏകദിനവും കളിച്ചിട്ടില്ല. എന്നിട്ടും ടി20യിൽ ഇന്ത്യയുടെ പ്രധാന ബാറ്ററാകുന്നു. ഐപിഎൽ മാത്രം കളിച്ച് ഒരു ഫോർമാറ്റിൽ മികവ് കാട്ടുന്ന അപൂർവ താരമാണ് അഭിഷേക്" എന്ന് ഫ്ലെമിംഗ് പറഞ്ഞു.

ഹൈദരാബാദ് സൺറൈസേഴ്സിന്റെ ഐപിഎൽ ടീമാം​ഗമായ അഭിഷേക്, 2024-ലെ ലോകകപ്പിന് ശേഷം ഇന്ത്യൻ ടി20 ടീമിന്റെ സ്ഥിരാംഗമായി മാറി. ഓസ്ട്രേലിയയ്ക്കെതിരായ അടുത്തിടെയുള്ള പരമ്പരയിലും അദ്ദേഹത്തിന്റെ ഓപ്പണിംഗ് ഇന്നിം​ഗ്സുകൾ ശ്രദ്ധ നേടി. ഓസീസ് ഇതിഹാസങ്ങളുടെ വാഴ്ത്തലുകൾ അഭിഷേകിന്റെ ആഗോളതലത്തിലുള്ള സ്വാധീനത്തെ വെളിപ്പെടുത്തുന്നു. ഭാവി ടി20 ലോകകപ്പുകളിൽ ഇന്ത്യയുടെ ആക്രമണത്തിന് അഭിഷേക് നിർണായക പങ്ക് വഹിക്കുമെന്നാണ് പ്രതീക്ഷ.