ബെംഗളൂരു:ബെംഗളൂരു ഉത്തരാഹള്ളിയിൽ വീട്ടുടമസ്ഥയെ കൊലപ്പെടുത്തി സ്വർണ്ണം മോഷ്ടിച്ച സംഭവത്തിൽ പ്രതികൾ അറസ്റ്റിലായി. ന്യൂ മില്ലേനിയം സ്കൂൾ റോഡിലെ വീട്ടിൽ വാടകക്ക് താമസിച്ചിരുന്ന ദമ്പതികൾ വീട്ടുടമസ്ഥയെ കൊലപ്പെടുത്തി സ്വർണാഭരണങ്ങൾ മോഷ്ടിച്ചതെന്ന് പൊലിസ് വെളിപ്പെടുത്തി. ഉത്തരാഹള്ളി പൊലിസ് സ്റ്റേഷനു കീഴിലുള്ള ഈ ഞെട്ടിക്കുന്ന സംഭവത്തിൽ പ്രതികളായ പ്രസാദ് ശ്രീശൈൽ മക്കായി (26), ഭാര്യ സാക്ഷി ഹനുമന്ത് ഹോഡ്ലുര (23) എന്നിവരെ അറസ്റ്റ് ചെയ്തു. 65 വയസ്സുള്ള ശ്രീമതി ശ്രീലക്ഷ്മിയാണ് കൊല്ലപ്പെട്ടത്. കടം വീട്ടാനുള്ള സാമ്പത്തിക പ്രശ്നങ്ങളാണ് കൊലപാതകത്തിന്റെ പിന്നിലെന്ന് പ്രതികൾ പറഞ്ഞതായി പൊലിസ് വെളിപ്പെടുത്തി. അന്വേഷണം തുടരുകയാണ് പൊലിസ്.

ചൊവ്വാഴ്ച വൈകുന്നേരം ശ്രീലക്ഷ്മിയുടെ ഭർത്താവ് വീട്ടിലേക്ക് ഫോൺ ചെയ്തെങ്കിലും മറുപടി ലഭിച്ചില്ല. ആശങ്കയോടെ വീട്ടിലെത്തിയ അദ്ദേഹം ഹാളിൽ കഴുത്തിലും ചുണ്ടിലും മുഖത്തും പരിക്കുകൾ ഉള്ള ഭാര്യയെ മരിച്ച നിലയിൽ കണ്ടെത്തി. കഴുത്തിൽ ധരിച്ചിരുന്ന സ്വർണമംഗല്യസൂത്രം നഷ്ടപ്പെട്ടിരുന്നു. ഭർത്താവിന്റെ പരാതിയെത്തുടർന്ന് ഉത്തരാഹള്ളി പൊലിസ് ഉടൻ കേസ് രജിസ്റ്റർ ചെയ്ത് അന്വേഷണം ആരംഭിച്ചു. സിസിടിവി ഫൂട്ടേജുകൾ പരിശോധിച്ചതോടെ സംശയം തെളിഞ്ഞത് വാടകക്കാരായ ദമ്പതികളിലേക്കായി.

പ്രതികൾ കട നടത്തുന്നവരാണ്. വാടക കഴിഞ്ഞ കുറച്ച് മാസങ്ങളായി അടയ്ക്കാതിരുന്നതോടെ ശ്രീലക്ഷ്മിയുമായി ഇടയ്ക്ക് തർക്കങ്ങൾ ഉണ്ടായിരുന്നു. സാമ്പത്തിക പ്രശ്നങ്ങൾ കടുത്തതോടെ, ശ്രീലക്ഷ്മി വീട്ടിൽ ഒറ്റയ്ക്കുള്ള സമയത്ത് ആക്രമിച്ച് കൊലപ്പെടുത്തി മംഗല്യസൂത്രം മോഷ്ടിച്ച് രക്ഷപ്പെടാൻ ശ്രമിച്ചുവെന്നാണ് പൊലിസിന്റെ നിഗമനം. അറസ്റ്റ് ചെയ്ത ശേഷം ചോദ്യം ചെയ്തപ്പോൾ ഇരുവരും കുറ്റം സമ്മതിച്ചു. മോഷ്ടിച്ച സ്വർണം വീട്ടിൽ നിന്ന് പിടിച്ചെടുത്തതായും പൊലിസ് അറിയിച്ചു.

 സംഭവം ബെംഗളൂരുവിലെ വാടക വീടുകളിലെ സുരക്ഷാ പ്രശ്നങ്ങൾ വീണ്ടും ചൂണ്ടിക്കാട്ടുന്നു. വാടകക്കാരുടെ പശ്ചാത്തലം പരിശോധിക്കാതെ താമസം അനുവദിക്കുന്നത് അപകടകരമാണെന്ന് പ്രാദേശികരായ നാട്ടുക്കാർ പറയുന്നു. പൊലിസ് പ്രതികളെ കോടതിയിൽ ഹാജരാക്കി റിമാൻഡ് ലഭിക്കാൻ ശ്രമിക്കുകയാണ്. കൂടുതൽ തെളിവുകൾ ശേഖരിക്കുന്നതിനായി അന്വേഷണം തുടരുകയാണ്. സമാന സംഭവങ്ങൾ തടയാൻ വാടകക്കാരുടെ ഐഡന്റിറ്റി വെരിഫിക്കേഷൻ കർശനമാക്കണമെന്ന് പൊതുജനങ്ങൾ ആവശ്യപ്പെടുന്നു.