അബൂദബി: യുഎഇയിലെ വർധിച്ചുവരുന്ന ഗതാഗതക്കുരുക്ക് ഒരു മുൻഗണനയായി കണ്ട്, പുതിയ ഗതാഗത നയങ്ങളും സംവിധാനങ്ങളും ആവിഷ്കരിക്കാൻ ഒരുങ്ങുന്നതായി ഊർജ, അടിസ്ഥാന സൗകര്യ മന്ത്രി സുഹൈൽ അൽ മസ്രൂയി. സ്വകാര്യ വാഹനം സ്വന്തമാക്കുന്നവരുടെ എണ്ണത്തിൽ ഉണ്ടായ കുത്തനെയുള്ള വർധനവും തിരക്കേറിയ സമയങ്ങളിലെ റോഡുകളിലെ സമ്മർദ്ദവുമാണ് രാജ്യത്തെ ​ഗതാ​ഗതക്കുരുക്കിന് പിന്നിൽ. അബൂദബിയിൽ വെച്ച് നടന്ന യുഎഇ ഗവൺമെൻ്റ് വാർഷിക യോഗങ്ങളിൽ സംസാരിക്കുകയായിരുന്നു അദ്ദേഹം.

ALSO READ: എമിറേറ്റ്‌സ് ഗ്രൂപ്പിൽ വൻ നിയമനം: 3,700-ൽ അധികം പേർക്ക് ജോലി നൽകി, നിയമനം തുടരുന്നു 

വാഹനങ്ങളുടെ എണ്ണത്തിൽ റെക്കോർഡ് വർധന

ജനസംഖ്യയും സാമ്പത്തിക പ്രവർത്തനങ്ങളും വർധിക്കുന്നതിനനുസരിച്ച് യുഎഇ റോഡുകളിലെ വാഹനങ്ങളുടെ എണ്ണം പ്രതിവർഷം 8 ശതമാനത്തിലധികം വർധിക്കുന്നതായി മന്ത്രി ചൂണ്ടിക്കാട്ടി. ആഗോള ശരാശരി 2 ശതമാനം മാത്രമായിരിക്കെയാണ് യുഎഇയിലെ ഈ കുതിച്ചുചാട്ടം. സ്കൂൾ, ജോലി സമയങ്ങൾ ഒരേസമയം വരുന്നതിനാൽ തിരക്കേറിയ സമയങ്ങളിൽ ഫെഡറൽ, ലോക്കൽ റോഡ് ശൃംഖലകളിൽ സമ്മർദ്ദം കൂടുന്നു.

ദുബൈയ്ക്കും വടക്കൻ എമിറേറ്റ്‌സിനും ഇടയിലാണ് ഗതാഗതക്കുരുക്ക് ഏറ്റവും രൂക്ഷമായിട്ടുള്ളത്. ഈ റൂട്ടിൽ യാത്ര ചെയ്യുന്ന ഒരു ജീവനക്കാരന് പ്രതിവർഷം ഏകദേശം 460 മണിക്കൂർ (60 പ്രവൃത്തി ദിവസങ്ങൾക്ക് തുല്യം) ഗതാഗതക്കുരുക്ക് കാരണം നഷ്ടപ്പെടുന്നുണ്ടെന്ന് ഫെഡറൽ നാഷണൽ കൗൺസിലിൽ ഈ വർഷം ചർച്ച ചെയ്തിരുന്നു.

ബദൽ ഗതാഗതവും റെയിൽ ശൃംഖലയും

ഗതാഗതക്കുരുക്ക് പരിഹരിക്കുന്നത് സർക്കാരിന്റെ പ്രധാന ലക്ഷ്യമാണെന്ന് മന്ത്രി വ്യക്തമാക്കി. ഗതാഗതം സുഗമമാക്കുന്നതിനും പൊതുഗതാഗതത്തിന്റെയും പങ്കിട്ട ഗതാഗതത്തിന്റെയും ഉപയോഗം പ്രോത്സാഹിപ്പിക്കുന്നതിനും പ്രാദേശിക സ്ഥാപനങ്ങളുമായി ചേർന്ന് പ്രത്യേക നയങ്ങളും ചട്ടങ്ങളും വിഭാവനം ചെയ്യും.

ALSO READ: മനുഷ്യത്വത്തിന് വേണ്ടി യുഎഇ: ആഗോള സഹായമായി നൽകിയത് 370 ബില്യൺ ദിർഹം 

ഇന്റഗ്രേറ്റഡ് മോണിറ്ററിംഗ് സെന്റർ 

യാത്രയുടെ വിശ്വാസ്യത വർദ്ധിപ്പിക്കുന്നതിനായി സാങ്കേതികവിദ്യ ഉപയോഗിച്ചുള്ള ഗതാഗത മാനേജ്മെൻ്റ് സംവിധാനങ്ങൾ മെച്ചപ്പെടുത്തുന്നുണ്ട്. 24 മണിക്കൂറും പ്രവർത്തിക്കുന്ന സംയോജിത ഗതാഗത നിരീക്ഷണ കേന്ദ്രം (Integrated Transport Monitoring Centre) ഗതാഗതക്കുരുക്കിൻ്റെ രീതികൾ വിശകലനം ചെയ്യുകയും പരിഹാരങ്ങൾ നിർദ്ദേശിക്കുകയും ചെയ്യും.

ഇത്തിഹാദ് റെയിൽ 

യുഎഇയിലെ ​ഗതാ​ഗതത്തിന്റെ ഭാവിയുടെ ഒരു പ്രധാന സ്തംഭമായി റെയിൽ മേഖലയെ അൽ മസ്രൂയി എടുത്തു കാണിച്ചു. 2021-ൽ പ്രഖ്യാപിച്ച 50 ബില്യൺ ദിർഹമിൻ്റെ യുഎഇ റെയിൽവേ പദ്ധതിയുടെ ഭാഗമായി 2026-ഓടെ ഇത്തിഹാദ് റെയിൽ പാസഞ്ചർ സർവീസുകൾ ആരംഭിക്കാനുള്ള ഒരുക്കത്തിലാണ്. ഇത് പ്രധാന നഗരങ്ങളെ തമ്മിൽ ബന്ധിപ്പിക്കുകയും ഗതാഗതക്കുരുക്ക് കുറയ്ക്കുകയും ചെയ്യും.

റോഡ് വികസനം, പൊതുഗതാഗത സംയോജനം, നയ അപ്‌ഡേറ്റുകൾ, സ്മാർട്ട്-മൊബിലിറ്റി സാങ്കേതികവിദ്യകൾ എന്നിവയുടെ സംയോജനത്തിലൂടെ വർദ്ധിച്ചുവരുന്ന ഗതാഗത ആവശ്യകതകളെ മറികടക്കാൻ യുഎഇ ലക്ഷ്യമിടുന്നതായി അധികൃതർ അറിയിച്ചു.

discover the root cause behind uae's notorious traffic snarls, from rapid urbanization to booming tourism. the government is now mapping innovative solutions, including smart roads and expanded metro lines, to transform commutes and boost mobility across dubai, abu dhabi, and beyond.