ഇന്ത്യ-ഓസ്ട്രേലിയ അഞ്ചു ടി-20 മത്സരങ്ങളുടെ പരമ്പര അവസാനിച്ചിരിക്കുകയാണ്.  അവസാന ടി-20 മത്സരം മഴമൂലം ഉപേക്ഷിക്കുകയായിരുന്നു. ഇതോടെ പരമ്പര 2-1ന് സ്വന്തമാക്കാനും ഇന്ത്യക്ക് സാധിച്ചു. നേരത്തെ പരമ്പരയിലെ ആദ്യ മത്സരവും മഴമൂലം ഉപേക്ഷിക്കപ്പെട്ടിരുന്നു. രണ്ടാം മത്സരത്തിൽ ഓസ്ട്രേലിയ വിജയിച്ചപ്പോൾ പിന്നീടുള്ള രണ്ട് മത്സരങ്ങളും വിജയിച്ചുകൊണ്ട് ഇന്ത്യ പരമ്പരയിലേക്ക് ശക്തമായി തിരിച്ചു വരുകയായിരുന്നു. 

ഗാബയിൽ നടന്ന അവസാന മത്സരത്തിൽ ടോസ് നേടിയ ഓസ്‌ട്രേലിയൻ നായകൻ മിച്ചൽ മാർഷ് ബൗളിംഗ് തെരഞ്ഞെടുക്കുകയായിരുന്നു. ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ 4.5 ഓവറിൽ 52 റൺസ് എന്ന നിലയിൽ നിൽക്കെ മഴ വില്ലനായി എത്തുകയായിരുന്നു. മത്സരം വീണ്ടും തുടങ്ങാൻ അനുവദിക്കാതെ മഴ ശക്തമായതോടെ മത്സരം പൂർണമായും ഉപേക്ഷിക്കുകയായിരുന്നു.  

പരമ്പരയിൽ മലയാളി സൂപ്പർതാരം സഞ്ജു സാംസണ് അത്ര മികച്ച പ്രകടനം പുറത്തെടുക്കാൻ സാധിച്ചിട്ടില്ല. ഒരു മത്സരത്തിൽ മാത്രമാണ് സഞ്ജുവിന് ബാറ്റിങ്ങിന് അവസരം ലഭിച്ചത്. ആ മത്സരത്തിൽ രണ്ട് റൺസ് നേടിയാണ് സഞ്ജു മടങ്ങിയത്. പിന്നീട് സഞ്ജുവിന് പ്ലെയിങ് ഇലവനിലെ സ്ഥാനം നഷ്ടമാവുകയും ചെയ്തു. സഞ്ജുവിന് പകരം ജിതേഷ് ശർമ്മയായിരുന്നു കളത്തിൽ ഇറങ്ങിയിരുന്നത്. 

ഈ പരമ്പരയിൽ സഞ്ജുവിന് തന്റെ കരിയറിൽ പുതിയൊരു നാഴികക്കല്ല് സ്വന്തമാക്കാനുള്ള സുവര്ണാവസരമുണ്ടായിരുന്നു. ഇന്റർനാഷണൽ ടി-20യിൽ 1000 റൺസ് പൂർത്തിയാക്കാനുള്ള അവസരമായിരുന്നു മലയാളി താരത്തിന് ഉണ്ടായിരുന്നത്. പരമ്പര തുടങ്ങുന്നതിന് മുമ്പായി സഞ്ജുവിന് ഈ നാഴികക്കല്ല് പിന്നിടാൻ വെറും ഏഴ് റൺസ് മാത്രമായിരുന്നു വേണ്ടിയിരുന്നത്. എന്നാൽ പരമ്പരയിൽ ആകെ സഞ്ജുവിന് രണ്ട് റൺസ് മാത്രമാണ് നേടാനായത്. ഇനിയും ഈ നേട്ടത്തിലെത്താൻ സഞ്ജുവിന് അഞ്ചു റൺസ് കൂടിയാണ് വേണ്ടത്. അടുത്ത പരമ്പരയിൽ സഞ്ജു ഈ നേട്ടം സ്വന്തമാക്കുമെന്ന് തന്നെയാണ് ആരാധകർ പ്രതീക്ഷിക്കുന്നത്. 

The five-match T20I series between India and Australia has come to an end. The final T20I was abandoned due to rain. With this, India was able to win the series 2-1. Sanju Samson has not been able to perform well in the series.