തിരുവനന്തപുരം: നിരോധിത സംഘടനയായ പോപ്പുലർ ഫ്രണ്ടിന്റെ 67 കോടി രൂപയുടെ സ്വത്തുക്കൾ കണ്ടുകെട്ടി ഇ.ഡി. മഞ്ചേരിയിലെ പോപ്പുലർ ഫ്രണ്ടിന്റെ ഗ്രീൻ വാലിയടക്കം 67 കോടി രൂപയുടെ സ്വത്തുക്കളാണ് കണ്ടുകെട്ടിയത്. രാഷ്ട്രീയ പാർട്ടിയായ എസ്ഡിപിഐയുടെ തിരുവനന്തപുരത്തെ ഭൂമിയും കണ്ടുകെട്ടിയ സ്വത്തുക്കളിൽ ഉൾപ്പെടുന്നു. കള്ളപ്പണക്കേസിലാണ് ഇ.ഡിയുടെ നടപടി. 67.03 കോടി രൂപയുടെ സ്വത്തുക്കൾ മരവിപ്പിക്കാൻ ഉത്തരവിടുന്നതായി നവംബർ ആറിന് ഇ.ഡി അറിയിച്ചിരുന്നു. നടപടിയോടെ കേസിൽ മരവിപ്പിച്ച ആസ്തികളുടെ ആകെ മൂല്യം 129 കോടി രൂപയായി.

ഗ്രീൻ വാലി അക്കാദമിക്ക് പുറമേ പന്തളം എഡ്യുക്കേഷണൽ ആന്റ് കൾച്ചറൽ ട്രസ്റ്റ്, ആലപ്പുഴ സോഷ്യൽ കൾച്ചറൽ ആന്റ് എഡ്യുക്കേഷൻ ട്രസ്റ്റ്, മലപ്പുറം ഹരിതം ഫൗണ്ടേഷൻ, ആലുവയിൽ സ്ഥിതി ചെയ്യുന്ന പെരിയാർ വാലി ചാരിറ്റബിൾ ട്രസ്റ്റ്, പാലക്കാട്ടെ വള്ളുവനാട് ട്രസ്റ്റ്, തിരുവനന്തപുരത്തെ എസ്ഡിപിഐയുടെ പേരിലുള്ള സ്ഥലം എന്നിങ്ങനെ വിവിധ സ്ഥാപനങ്ങളുടെ പേരിലാണ് സ്വത്തുക്കൾ രജിസ്റ്റർ ചെയ്തിരുന്നത്.

ALSO READ: വന്ദേഭാരതിൽ ആർഎസ്എസ് ഗണഗീതം ആലപിച്ച സംഭവം; വിമർശനത്തിന് പിന്നാലെ പിൻവലിച്ച പോസ്റ്റ് ഇംഗ്ലീഷ് പരിഭാഷയോടെ വീണ്ടും പങ്കുവെച്ച് ദക്ഷിണ റെയിൽവേ 

കേരളത്തിലെ വിവിധ കേന്ദ്രങ്ങളിൽ പോപ്പുലർ ഫ്രണ്ട് ആയുധ പരിശീലനവും ശാരീരിക പരിശീലന പരിപാടികളും നടത്തിയിരുന്നതായും ഡമ്മി ഉടമകളുടെ പേരിൽ രജിസ്റ്റർ ചെയ്ത സ്ഥാപനങ്ങളിലാണ് പരിശീലനം നടന്നിരുന്നതെന്നും ഇ.ഡി. ആരോപിച്ചിരുന്നു.

പാലക്കാട്ടെ വള്ളുവനാട് ഹൗസ്, മലബാർ ഹൗസ് (ഹരിതം ഫൗണ്ടേഷൻ) എന്നിവയുൾപ്പെടെ നിരവധി ഇടങ്ങളിൽ പോപ്പുലർ ഫ്രണ്ട് കായിക, വിദ്യാഭ്യാസ പരിശീലന പരിപാടികൾ നടത്തിയിരുന്നതായും കൂടാതെ, ആയുധങ്ങൾ ഉപയോഗിച്ചുള്ള പരിശീലനത്തിനായി ഈ കേന്ദ്രങ്ങളിൽ ഷെഡുകൾ നിർമ്മിച്ചതായും അന്വേഷണത്തിൽ കണ്ടെത്തിയതായി ഇ.ഡി ആരോപിച്ചിരുന്നു.

തീവ്രവാദ പ്രവർത്തനങ്ങൾക്കായി പി.എഫ്.ഐ. നിയമവിരുദ്ധമായി 131 കോടി രൂപ സമാഹരിച്ചതായും അന്വേഷണ ഏജൻസി വ്യക്തമാക്കി. ഇന്ത്യയ്ക്കകത്തും പുറത്തും നിന്ന് ബാങ്കുകൾ, ഹവാല മാർഗ്ഗങ്ങൾ, സംഭാവനകൾ എന്നിവ വഴിയാണ് ഈ ഫണ്ട് സ്വരൂപിക്കപ്പെട്ടതെന്നും ഇ.ഡി. കൂട്ടിച്ചേർത്തു.

തീവ്രവാദ പ്രവർത്തനങ്ങളിൽ ഏർപ്പെടുന്നു എന്ന ആരോപണത്തെത്തുടർന്ന് 2022 സെപ്റ്റംബറിലാണ് കേന്ദ്രസർക്കാർ പോപ്പുലർ ഫ്രണ്ട് ഓഫ് ഇന്ത്യയെ അഞ്ച് വർഷത്തേക്ക് നിരോധിച്ചത്. നിരോധനത്തിന് ശേഷവും സംഘടനയുടെ സാമ്പത്തിക ഇടപാടുകളെക്കുറിച്ചും ആസ്തികളെക്കുറിച്ചുമുള്ള ഇ.ഡി.യുടെ അന്വേഷണം തുടരുകയാണ്.

the enforcement directorate has confiscated properties valued at ₹67 crore linked to the popular front of india, including the green valley academy in manjeri.