അഗളി (പാലക്കാട്): അപകടം നടന്ന സമയത്ത് വാഹനം കിട്ടിയിരുന്നെങ്കില്‍ ഒരാളുടെ ജീവനെങ്കിലും രക്ഷിക്കാമായിരുന്നുവെന്ന് അട്ടപ്പാടിയില്‍ നിര്‍മാണം പൂര്‍ത്തിയാകാത്ത വീടിന്റെ സ്ലാബ് തകര്‍ന്ന് വീണ് മരിച്ച സഹോദരങ്ങളുടെ അമ്മ ദേവി. മടിയില്‍ വച്ചപ്പോള്‍ ഒരാള്‍ക്ക് അനക്കമുണ്ടായിരുന്നു. പല തവണ ബന്ധപ്പെട്ടിട്ടും വാഹനം എത്തിയില്ല. ഇതോടെയാണ് സ്‌കൂട്ടറില്‍ ആശുപത്രിയിലേക്ക് കൊണ്ടുപോകേണ്ടിവന്നത്. പ്രൊമോട്ടറേയും മെംബറേയും വിളിച്ചിട്ട് വന്നില്ലെന്നും ദേവി പറഞ്ഞു. 

പാലക്കാട് മുക്കാലി കരുവര ഉന്നതിയിലെ അജയ്-ദേവി ദമ്പതികളുടെ മക്കളായ ആദി (7) അജിനേഷ് (4) എന്നിവരാണ് മരിച്ചത്. ബന്ധുവായ അഭിനയ (6) ഗുരുതര പരുക്കുകളോടെ ചികിത്സയിലാണ്. ഇന്നലെ വൈകുന്നേരം നാലോടെയാണ് സംഭവം. 

ALSO READ: വിദ്യാര്‍ഥികളെക്കൊണ്ട് ആര്‍.എസ്.എസ് ഗണഗീതം പാടിപ്പിച്ച സംഭവം: അന്വേഷണം പ്രഖ്യാപിച്ച് മന്ത്രി വി.ശിവന്‍കുട്ടി

2016ല്‍ ഐ.ടി.ഡി.പി നിര്‍മിച്ച് നല്‍കിയ വീടിന്റെ പണി പൂര്‍ത്തിയായിരുന്നില്ല. ഉപയോഗ ശൂന്യമായി കിടന്ന വീട് ദുര്‍ബലമായ അവസ്ഥയിലായിരുന്നു. കുട്ടികള്‍ സണ്‍ഷേഡിന് മുകളില്‍ കയറി കളിക്കുന്നതിനിടെയാണ് അപകടം. ഉടന്‍ വനം വകുപ്പിന്റെ ജീപ്പില്‍ കോട്ടത്തറ ട്രൈബല്‍ താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹങ്ങള്‍ ആശുപത്രി മോര്‍ച്ചറിയില്‍. 

English Summary: In a heartbreaking incident at Attappadi in Palakkad, Kerala, Devi, the mother of two children who died after an unfinished house slab collapsed, said that her son was still alive when she held him in her lap. She added that at least one life could have been saved if a vehicle had been available on time. Despite several calls for help, no vehicle arrived, forcing her to rush the injured children to the hospital on a scooter.