ന്യൂഡൽഹി: ഉന്നതരും പ്രമുഖരും താമസിക്കുന്ന ഗുരുഗ്രാം സെക്ടർ 48-ലെ ആഢംബര ഹൗസിങ് സൊസൈറ്റിയായ സെൻട്രൽ പാർക്ക് റിസോർട്ട്സിൽ 11-ാം ക്ലാസ് വിദ്യാർഥിക്ക് നേരേ സഹപാഠികൾ വെടിയുതിർത്തു. ശനിയാഴ്ച രാത്രിയാണ് സംഭവം. വെടിയേറ്റ 17-കാരനെ ആശുപത്രിയിൽ പ്രവേശിപ്പിച്ചു. ആക്രമണത്തിന് പിന്നാലെ പ്രതികളായ രണ്ട് വിദ്യാർഥികളെ പൊലിസ് കസ്റ്റഡിയിലെടുത്തു.

ആക്രമണത്തിന് ഇരയായ കുട്ടിയും പ്രതികളായ കുട്ടികളും ഗുരുഗ്രാമിലെ യദുവംശി സ്കൂളിലെ വിദ്യാർഥികളാണ്. ഇവർ തമ്മിൽ മുൻവൈരാഗ്യം നിലനിന്നിരുന്നതാണ് ആക്രമണത്തിന് കാരണമായതെന്ന് പൊലിസ് വ്യക്തമാക്കി.മുഖ്യപ്രതിയുടെ പിതാവ് വാടകയ്‌ക്കെടുത്ത അപ്പാർട്ട്‌മെൻ്റിലേക്കാണ് 17-കാരനായ സഹപാഠിയെ വിളിച്ചുവരുത്തിയത്.തനിക്ക് നേരിൽ കാണണമെന്ന് പറഞ്ഞ് മുഖ്യപ്രതിയാണ് ആദ്യം ഫോണിൽ വിളിച്ചത്. ആദ്യം മടിച്ചെങ്കിലും പിന്നീട് സമ്മതിച്ചതോടെ, മുഖ്യപ്രതി 17-കാരന്റെ വീട്ടിൽ നിന്ന് പ്രതിയുടെ അപ്പാർട്ട്‌മെൻ്റിലേക്ക് കൂട്ടിക്കൊണ്ടുപോവുകയായിരുന്നു.അപ്പാർട്ട്‌മെൻ്റിൽ എത്തിയപ്പോഴാണ് രണ്ടാമത്തെ പ്രതിയായ സഹപാഠിയെ 17-കാരൻ കണ്ടത്. തൊട്ടുപിന്നാലെ, പ്രതികളിലൊരാളുടെ പിതാവിൻ്റെ പേരിലുള്ള തോക്ക് ഉപയോഗിച്ച് മുഖ്യപ്രതി 17-കാരന് നേരെ നിറയൊഴിക്കുകയായിരുന്നു.

വിവരം ലഭിച്ച ഉടൻ പൊലിസ് സ്ഥലത്തെത്തി വെടിയേറ്റ നിലയിൽ കണ്ടെത്തിയ വിദ്യാർഥിയെ അടിയന്തരമായി ആശുപത്രിയിലേക്ക് മാറ്റി. പ്രതികളെ ഉടൻ തന്നെ കസ്റ്റഡിയിലെടുക്കുകയും ചെയ്തു.പൊലിസ് അപ്പാർട്ട്‌മെൻ്റിൽ നടത്തിയ പരിശോധനയിൽ ഒരു തോക്കും 65-ഓളം തിരകളും കണ്ടെടുത്തു. ഫൊറൻസിക് സംഘവും സ്ഥലത്ത് വിശദമായ പരിശോധന നടത്തി തെളിവുകൾ ശേഖരിച്ചിട്ടുണ്ട്. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.