തിരുവനന്തപുരം: തദ്ദേശ തിരഞ്ഞെടുപ്പില്‍ ഒറ്റക്ക് മത്സരിക്കാനൊരുങ്ങി ബിഡിജെഎസ്. ബിജെപി മുന്നണി മര്യാദ പാലിച്ചില്ലെന്ന് ചൂണ്ടിക്കാട്ടിയാണ് തീരുമാനം. തിരുവനന്തപുരം കോര്‍പ്പറേഷനിലേക്ക് സ്വന്തം സ്ഥാനാര്‍ഥികളെ പ്രഖ്യാപിക്കുമെന്ന് പാര്‍ട്ടി അറിയിച്ചു. 

കോര്‍പ്പറേഷനിലെ സീറ്റ് വിഭജനത്തിന് പിന്നാലെയാണ് എന്‍ഡിഎയെ വെട്ടിലാക്കി ബിഡിജെഎസ് അതൃപ്തി പരസ്യമാക്കിയത്. 20 സ്ഥാനാര്‍ഥികളെ തിങ്കളാഴ്ച്ച പ്രഖ്യാപിക്കുമെന്ന് ബിഡിജെഎസ് അറിയിച്ചു. 

കഴിഞ്ഞ ദിവസം 67 സ്ഥാനാര്‍ഥികള്‍ ഉള്‍പ്പെട്ട ആദ്യഘട്ട പട്ടിക ബിജെപി പുറത്തിറക്കിയിരുന്നു. മുന്‍ ഡിജിപി ആര്‍ ശ്രീലേഖ, ഏഷ്യന്‍ ഗെയിംസ് മെഡല്‍ ജേതാവ് പത്മിനി തോമസ്, വിവി രാജേഷ് എന്നിവരാണ് പട്ടികയിലുള്ള പ്രമുഖര്‍. ലിസ്റ്റ് പുറത്ത് വന്നതിന് പിന്നാലെ ഘടക കക്ഷികള്‍ എതിര്‍പ്പുമായി രംഗത്തെത്തി. സീറ്റ് വിഭജനത്തില്‍ തഴഞ്ഞെന്ന് ആരോപിച്ചാണ് ബിഡിജെഎസ് പിന്‍മാറ്റം. 

ALSO READ: PMAY പദ്ധതി പ്രകാരം ലഭിച്ച വീട് നിർമ്മാണത്തിന് മണ്ണ് മാറ്റിയിട്ടു; 'അനധികൃത ഖനനം' നടത്തിയെന്ന് പറഞ്ഞ് വയോധിക ദമ്പതികൾക്ക് ഒരു ലക്ഷം രൂപ പിഴ 

ഇന്ത്യയിലെ ഏറ്റവും മികച്ച നഗരമാക്കി തിരുവനന്തപുരം കോര്‍പ്പറേഷനെ മാറ്റുമെന്നാണ് സ്ഥാനാര്‍ഥി പ്രഖ്യാപനത്തിന് പിന്നാലെ ബിജെപി പ്രസിഡന്റ് രാജീവ് ചന്ദ്രശേഖര്‍ പറഞ്ഞത്. ഭരിക്കാന്‍ ഒരു അവസരമാണ് ചോദിക്കുന്നതെന്നും ജനങ്ങളുടെ എല്ലാ പ്രശ്‌നങ്ങളും പരിഹരിക്കുന്ന ഭരണം കാഴ്ച്ച വെക്കുമെന്നും ബിജെപി അധ്യക്ഷന്‍ പറഞ്ഞിരുന്നു.