തിരുവനന്തപുരം: തിരുവനന്തപുരം മെഡിക്കല്‍ കോളജില്‍ ചികിത്സ വൈകിയതിനെ തുടര്‍ന്ന് രോഗി മരിച്ച സംഭവത്തില്‍  അന്വേഷണം നടത്തിയ ഡോക്ടര്‍മാരുടെ സംഘം റിപ്പോര്‍ട്ട് ഇന്ന് മെഡിക്കല്‍ വിദ്യാഭ്യാസ വകുപ്പ് ഡയറക്ടര്‍ക്ക് സമര്‍പ്പിക്കും.  കൊല്ലം പന്മന സ്വദേശി വേണു മതിയായ ചികിത്സ കിട്ടാതെയാണ് മരിച്ചതെന്ന കുടുംബത്തിന്റെ പരാതിയിലായിരുന്നു അന്വേഷണം. വേണുവിന്റെ ഭാര്യ സിന്ധുവില്‍ നിന്നും അന്വേഷണസംഘം ഇന്ന് വിവരമെടുക്കും.

ജോയിന്റ് ഡി.എം.ഇയുടെ നേതൃത്വത്തില്‍ ഉള്ള സംഘമാണ് അന്വേഷണം നടത്തിയത്. പ്രോട്ടോക്കോള്‍ പ്രകാരമുള്ള ചികിത്സ വേണുവിന് നല്‍കിയെന്നാണ് കാര്‍ഡിയോളജി വിഭാഗം ഡോക്ടര്‍മാര്‍ അന്വേഷണ സംഘത്തിന് മുമ്പാകെ മൊഴി നല്‍കിയിരിക്കുന്നത്.  കേസ് ഷീറ്റിലും ചികിത്സ സംബന്ധിച്ച് പ്രശ്‌നങ്ങള്‍ ഇല്ലെന്നാണ് അന്വേഷണസംഘത്തിന്റെ നിഗമനം. അതേസമയം, വേണുവിന്റെ ശബ്ദ സന്ദേശം സംബന്ധിച്ച് കുടുംബത്തിന്റെ ഭാഗത്തുനിന്ന് കൂടുതല്‍ വ്യക്തത വരുത്തണമെന്നും റിപ്പോര്‍ട്ടില്‍ നിര്‍ദ്ദേശിക്കുന്നു. 

ALSO READ: വേണുവിന്റെ മരണം: മെഡിക്കല്‍ കോളജിന് വീഴ്ചയില്ലെന്ന് ഡി.എം.ഇ റിപ്പോര്‍ട്ട്

അന്വേഷണ സംഘത്തിന്റെ റിപ്പോര്‍ട്ട് പഠിച്ചതിനുശേഷം തുടര്‍ നടപടികള്‍ സ്വീകരിക്കുമെന്നാണ് ഡി.എം.ഇ അറിയിച്ചിരിക്കുന്നത്. ഇതുകൂടി ഉള്‍പ്പെടുത്തിയായിരിക്കും മെഡിക്കല്‍ വിദ്യാഭ്യാസ ഡയറക്ടര്‍ ആരോഗ്യമന്ത്രിക്ക് അന്തിമ റിപ്പോര്‍ട്ട് നല്‍കുക. എന്നാല്‍ ആദ്യം ഉന്നയിച്ച ആരോപണത്തില്‍  വേണുവിന്റെ കുടുംബം ഉറച്ചു നില്‍ക്കുകയാണ്. നീതി കിട്ടണമെന്നും നിയമപരമായി മുന്നോട്ടുപോകുമെന്നും വേണുവിന്റെ ഭാര്യ സിന്ധു കഴിഞ്ഞദിവസം പ്രതികരിച്ചിരുന്നു.

ആരോഗ്യവകുപ്പിനെ പ്രതിക്കൂട്ടിലാക്കി വിമര്‍ശനം: ഡോ. ഹാരിസില്‍ നിന്ന് വിശദീകരണം തേടിയേക്കും
തിരുവനന്തപുരം: ചികിത്സ വൈകിയതിനെ തുടര്‍ന്ന് തിരുവനന്തപുരം മെഡിക്കല്‍ കോളജില്‍ രോഗി മരിച്ചതിന് പിന്നാലെ ആരോഗ്യവകുപ്പിലെ 'സിസ്റ്റത്തിനെതിരേ' വീണ്ടും വിമര്‍ശനമുന്നയിച്ച യൂറോളജി വിഭാഗം മുന്‍ മേധാവി ഡോ. ഹാരിസില്‍ നിന്നു ആരോഗ്യവകുപ്പ് വിശദീകരണം തേടിയേക്കും. എന്നാല്‍, ഡോ. ഹാരിസ് വിമര്‍ശനമുന്നയിച്ചത് കാംപസിന് പുറത്തുവച്ചുള്ള പരിപാടിയിലായതിനാല്‍ ഇക്കാര്യത്തില്‍ അന്തിമ തീരുമാനമുണ്ടായിട്ടില്ല. 

കൂടാതെ നേരത്തെ മെഡിക്കല്‍ കോളജിലെ പോരായ്മകള്‍ പുറംലോകത്തോട് വിളിച്ചുപറഞ്ഞ് സര്‍ക്കാരിനെ പ്രതിരോധത്തിലാക്കിയപ്പോള്‍ നടപടിയെടുക്കാനൊരുങ്ങി കൈപൊള്ളിയ അനുഭവം ആരോഗ്യവകുപ്പിനും മന്ത്രിക്കുമുള്ളതിനാല്‍ കരുതലോടെയാണ് ഇത്തവണ നീക്കം നടക്കുന്നത്. തെരഞ്ഞെടുപ്പുകള്‍ പടിവാതില്‍ക്കലെത്തി നില്‍ക്കവെ ഹാരിസിനെതിരേ എന്തെങ്കിലും നടപടിയുണ്ടായാല്‍ അത് സര്‍ക്കാരിന് കനത്ത തിരിച്ചടിയാകാന്‍ സാധ്യതയുണ്ട്. ഹാരിസിനുള്ള ജനപിന്തുണയും അദ്ദേഹം തുറന്നുപറഞ്ഞ കാര്യങ്ങള്‍ ശരിയാണെന്നുള്ള വിശ്വാസവുമാണ് കഴിഞ്ഞ തവണയും നടപടിയെടുക്കുന്നതില്‍ നിന്നു ആരോഗ്യവകുപ്പിനെ പിന്തിരിപ്പിച്ചത്. 

ALSO READ: തറയില്‍ എങ്ങനെയാണ് രോഗിയെ കിടത്തുന്നത്? നാടുമുഴുവന്‍ മെഡി.കോളജുകള്‍ തുടങ്ങിയിട്ട് കാര്യമില്ല: രൂക്ഷ വിമര്‍ശനവുമായി ഡോ. ഹാരിസ്

മെഡിക്കല്‍ കോളജിലേക്ക് എത്തിച്ച കൊല്ലം പന്‍മന സ്വദേശി വേണു മരിച്ചതിന് പിന്നാലെയാണ് ഹാരിസ് ആരോഗ്യവകുപ്പിലെ പോരായ്മകളെ കുറിച്ച് വീണ്ടും വിമര്‍ശനമുന്നയിച്ചത്. തിരുവനന്തപുരം മെഡിക്കല്‍ കോളജിലേത് ഇപ്പോഴും 1986ലെ അവസ്ഥ തന്നെയാണെന്നായിരുന്നു ഹാരിസിന്റെ വിമര്‍ശനം. തറയില്‍ എങ്ങനെയാണ് രോഗിയെ കിടത്തുന്നത്. എങ്ങനെ നിലത്ത് കിടത്തി ചികിത്സിക്കാനാകും? നാടാകെ മെഡിക്കല്‍ കോളജ് തുടങ്ങിയിട്ട് കാര്യമില്ലെന്നും സ്വകാര്യ ആശുപത്രികളെ ആശ്രയിക്കേണ്ട അവസ്ഥയാണെന്നും അദ്ദേഹം ചൂണ്ടിക്കാട്ടിയിട്ടിയിരുന്നു.

the inquiry report on the patient death at thiruvananthapuram medical college will be submitted today. according to the cardiology department, treatment was provided as per medical protocol.