മാഞ്ചസ്റ്റർ: മാഞ്ചസ്റ്റർ സിറ്റിക്കെതിരെ ലിവർപൂൾ 3-0ന് പരാജയപ്പെട്ട മത്സരത്തിൽ, കളിയുടെ ഗതി നിർണയിച്ചേക്കാവുന്ന ഒരു വിവാദ ഗോൾ നിഷേധം വലിയ ചർച്ചയാവുന്നു. കളി ആരംഭിച്ച് അരമണിക്കൂറിനുള്ളിൽ എർലിംഗ് ഹാലൻഡിന്റെ ഗോളിൽ സിറ്റി 1-0ന് മുന്നിലെത്തിയതിന് പിന്നാലെയായിരുന്നു നിർണായകമായ ആ ​ഗോൾ പിറന്നത്.

റെഡ്‌സിന് നിരാശ; വാർ വിധി പ്രതികൂലം

38-ാം മിനിറ്റിൽ ലിവർപൂൾ ക്യാപ്റ്റൻ വിർജിൽ വാൻ ഡൈക്ക് ഒരു ഹെഡ്ഡറിലൂടെ സമനില ഗോൾ നേടിയെന്ന് ആരാധകർ ആശ്വസിച്ചു. മുഹമ്മദ് സല നൽകിയ ഇൻസ്വിംഗിംഗ് കോർണർ കിക്ക്, സിറ്റി ഗോൾകീപ്പർ ജിയാൻലൂയിഗി ഡൊണാറുമ്മയെ മറികടന്ന് വാൻ ഡൈക്ക് വലയിലെത്തിച്ചതോടെ റെഡ്‌സ് ആഘോഷം തുടങ്ങി.

എന്നാൽ, സൈഡ് റഫറി തന്റെ പതാക ഉയർത്തുകയും പിന്നാലെ വിഡിയോ അസിസ്റ്റന്റ് റഫറി (VAR) പരിശോധന നടത്തുകയും ചെയ്തതോടെ ഗോൾ നിഷേധിച്ചു. ലിവർപൂൾ പ്രതിരോധതാരം ആൻഡി റോബർട്ട്‌സൺ ഓഫ്‌സൈഡ് പൊസിഷനിലായിരുന്നു എന്നതായിരുന്നു വാർ തീരുമാനം.

വിവാദ കാരണം

സിറ്റി താരം ജെറമി ഡോക്കുവിന് പിന്നിലായി ഓഫ്‌സൈഡ് നിലയിലായിരുന്ന റോബർട്ട്‌സൺ, വാൻ ഡൈക്കിന്റെ ഹെഡ്ഡർ വരുമ്പോൾ തല കുനിച്ചതാണ് ​ഗോൾ നിഷേധിക്കാൻ കാരണമായത്.

ഗോൾ നിഷേധിക്കാനുള്ള തീരുമാനം "തെറ്റായ തീരുമാനമായിരുന്നു എന്ന് വളരെ വ്യക്തമാണ്" എന്ന് ലിവർപൂൾ മാനേജർ ആർനെ സ്ലോട്ട് സ്കൈ സ്പോർട്സിനോട് പറഞ്ഞു."ഗോൾകീപ്പർക്ക് ചെയ്യാൻ കഴിയുന്ന കാര്യങ്ങളിൽ റോബർട്ട്‌സൺ ഒരു തരത്തിലും ഇടപെട്ടില്ല. കളി കഴിഞ്ഞയുടനെ ആരോ അതേ റഫറി അനുവദിച്ച ഗോൾ എനിക്ക് കാണിച്ചുതന്നു - കഴിഞ്ഞ സീസണിൽ വോൾവ്സിനെതിരെ സിറ്റി നേടിയ ഗോൾ. ഓഫ്‌സൈഡ് ആണെന്ന് പറയാൻ ലൈൻസ്മാൻ തന്റെ പതാക ഉയർത്താൻ 13 സെക്കൻഡ് എടുത്തു. ആ ഗോൾ ഞങ്ങൾക്ക് കളിയെ പോസിറ്റീവ് രീതിയിലാക്കാൻ സഹായിച്ചേനെ," സ്ലോട്ട് കൂട്ടിച്ചേർത്തു.

തീരുമാനത്തെക്കുറിച്ച് കൂടുതൽ പ്രതികരിക്കാൻ വാൻ ഡൈക്ക് തയ്യാറായില്ല. "പ്രധാന തീരുമാനങ്ങൾ റഫറിമാർ തീരുമാനിക്കുന്നു, എന്റെ കാഴ്ചപ്പാടിൽ ഇതിനെക്കുറിച്ച് ചർച്ച ചെയ്യുന്നതിൽ അർത്ഥമില്ല," അദ്ദേഹം പറഞ്ഞു.താൻ എന്ത് അഭിപ്രായം പറഞ്ഞാലും അത് മാധ്യമങ്ങളിൽ നിറഞ്ഞുനിൽക്കുകയും അന്താരാഷ്ട്ര മത്സരത്തിന്റെ ഇടവേള മുഴുവൻ ആ തീരുമാനത്തെക്കുറിച്ചുള്ള ചർച്ചകൾ നടക്കുകയും ചെയ്യും എന്നതിനാലാണ് കൂടുതൽ പ്രതികരിക്കാത്തതെന്നും അദ്ദേഹം കൂട്ടിച്ചേർത്തു.