മലയാളി സൂപ്പർതാരം സഞ്ജു സാംസൺ ചെന്നൈ സൂപ്പർ കിങ്സിലേക്ക് പോവുമെന്ന് വാർത്തകളാണ് ഇപ്പോൾ ശക്തമായി നിലനിൽക്കുന്നത്. സഞ്ജു ചെന്നൈയിൽ എത്തുകയാണെങ്കിൽ താരത്തിന് ക്യാപ്റ്റൻസി ലഭിക്കുമോ എന്നതിനെക്കുറിച്ച് തന്റെ അഭിപ്രായം തുറന്നു പറഞ്ഞിരിക്കുകയാണ് മുൻ ഇന്ത്യൻ സ്പിന്നർ അശ്വിൻ. ആദ്യ സീസണിൽ തന്നെ സഞ്ജുവിന് ചെന്നൈയുടെ ക്യാപ്റ്റൻ സ്ഥാനം ലഭിക്കില്ലെന്നാണ് അശ്വിൻ പറഞ്ഞത്. തന്റെ യുട്യൂബ് ചാനലിലൂടെ സംസാരിക്കുകയായിരുന്നു അശ്വിൻ.

''ചെന്നൈ സഞ്ജുവിന് ക്യാപ്റ്റൻസി നൽകുമെന്ന് ഞാൻ കരുതുന്നില്ല. കാരണം ഇത് ചെന്നൈക്കൊപ്പമുള്ള സഞ്ജുവിന്റെ ആദ്യ സീസൺ ആയിരിക്കും. റിതുരാജ് ഗെയ്ക്വാദ് തന്നെ ക്യാപ്റ്റനായി തുടരുമെന്ന് ഞാൻ കരുതുന്നു. എന്നാൽ കുറച്ചു സീസൺ കഴിഞ്ഞാൽ സഞ്ജു മികച്ചൊരു ഓപ്‌ഷൻ ആയിരിക്കും'' അശ്വിൻ പറഞ്ഞു. 

സഞ്ജുവിന്റെ ട്രേഡുമായി ബന്ധപ്പെട്ട് രണ്ട് താരങ്ങളെയാണ് രാജസ്ഥാൻ ആവശ്യപ്പെട്ടിട്ടുള്ളത്. രവീന്ദ്ര ജഡേജ, സാം കറൻ എന്നിവരെ കൈമാറിയാൽ സഞ്ജുവിനെ നൽകാമെന്നണ് രാജസ്ഥാന്റെ നിലപാട്. 

അതേസമയം ഡൽഹി ക്യാപിറ്റസും സഞ്ജുവിനെ സ്വന്തമാക്കാൻ ശ്രമം നടത്തിയിരുന്നു. സഞ്ജുവിന് പകരമായി ഡൽഹി സൗത്ത് ആഫ്രിക്കൻ സൂപ്പർതാരം ട്രിസ്റ്റൻ സ്റ്റബ്‌സിനെ രാജസ്ഥാന് കൈമാറുമെന്നാണ് ദി ടൈംസ് ഓഫ് ഇന്ത്യ റിപ്പോർട്ട് ചെയ്തത്. 2025 ഐപിഎല്ലിൽ സീസണിൽ രാജസ്ഥാൻ റോയൽസ് നിറം മങ്ങിയ പ്രകടനമാണ്‌ പുറത്തെടുത്തത്. എട്ട് പോയിന്റുമായി ഒമ്പതാം സ്ഥാനത്താണ് രാജസ്ഥാൻ ഫിനിഷ് ചെയ്‌തത്. 

അതേസമയം 2025 ഐപിഎൽ സീസണിൽ ചെന്നൈയും നിരാശാജനകമായ പ്രകടനമായിരുന്നു നടത്തിയിരുന്നത്. 14 മത്സരങ്ങളിൽ നിന്നും വെറും നാല് മത്സരങ്ങളിൽ മാത്രമാണ് ചെന്നൈയ്ക്ക് വിജയിക്കാൻ സാധിച്ചത്. 10 മത്സരങ്ങൾ പരാജയപ്പെട്ട് വെറും എട്ട് പോയിന്റോടെ അവസാന സ്ഥാനത്താണ് ചെന്നൈ ഫിനിഷ് ചെയ്തത്. ചരിത്രത്തിൽ ഇതാദ്യമായാണ് ചെന്നൈ തുടർച്ചയായ രണ്ടാം സീസണിൽ പ്ലേ ഓഫ് കാണാതെ പുറത്താവുന്നത്. 

There are strong reports that Sanju Samson will join Chennai Super Kings. Former Indian spinner Ashwin has opened up about whether the player will get the captaincy if Sanju joins Chennai.