ഇന്ത്യൻ ലോകകപ്പ് ഹീറോ റിച്ച ഘോഷിന് ജന്മനാടിന്റെ ആദരം. ഡാർജിലിങ്ങിലെ പുതിയ ക്രിക്കറ്റ് സ്റ്റേഡിയത്തിനു റിച്ച ഘോഷിന്റെ പേര് നൽകുമെന്ന് പശ്ചിമ ബംഗാൾ മുഖ്യമന്ത്രി മമത ബാനർജി പ്രഖ്യാപനം നടത്തി. റിച്ചയെ ആദരിച്ചുകൊണ്ട് നടത്തിയ ചടങ്ങിലാണ് പശ്ചിമ ബംഗാൾ മുഖ്യമന്ത്രി ഇക്കാര്യം പ്രഖ്യാപിച്ചത്. ഈ സ്റ്റേഡിയം യാഥാർഥ്യമായാൽ ഇന്ത്യൻ വനിതാ ക്രിക്കറ്റിലെ ഒരു പുതിയ നാഴികക്കല്ലായിരിക്കും ഇത്. ഒരു വനിത ക്രിക്കറ്റ് താരത്തിന്റെ പേരിലുള്ള ഇന്ത്യയിലെ ആദ്യത്തെ ക്രിക്കറ്റ് സ്റ്റേഡിയമായി ഇത് മാറും.  

മിതാലി രാജ്, ജുലാൻ ഗോസ്വാമി എന്നീ ഇതിഹാസങ്ങളുടെ പേരുകളിൽ വിശാഖപട്ടണത്തെ സ്റ്റേഡിയത്തിലും കൊൽക്കത്തയിലെ ഈഡൻ ഗാർഡനിലെ സ്റ്റേഡിയത്തിലും സ്റ്റാൻഡുകൾ ഉണ്ടെങ്കിലും ഒരു വനിത ക്രിക്കറ്റ് താരത്തിന്റെ പേരിൽ ഒരു സ്റ്റേഡിയം നിർമ്മിക്കപ്പെടുന്നത് ഇത് ആദ്യമായിട്ടായിരിക്കും. 

റിച്ചയെ ആദരിച്ച ചടങ്ങിൽ മുൻ ഇന്ത്യൻ നായകൻ സൗരവ് ഗാംഗുലിയും ജുലാൻ ഗോസ്വാമിയും ഒപ്പിട്ട സ്വർണ ബാറ്റും ബോളും റിച്ചക്ക് നൽകി. ചടങ്ങിൽ ബംഗ ഭൂഷൺ അവാർഡും റിച്ചക്ക് കൈമാറി. ഇന്ത്യൻ ക്രിക്കറ്റിന് നൽകിയ സംഭാവനകൾ പരിഗണിച്ചുകൊണ്ട് റിച്ചയെ ഡിഎസ്പിയായും നിയമിച്ചു. 

വെസ്റ്റ് ബംഗാളിലെ സിലിഗുരിയിൽ ജനിച്ച റിച്ച ഇന്ത്യയുടെ കിരീട നേട്ടത്തിൽ നിർണായകമായ പങ്കാണ് വഹിച്ചത്. എട്ട് മത്സരങ്ങളിൽ നിന്നും 235 റൺസാണ് റിച്ച നേടിയത്. വിക്കറ്റിന് പിന്നിലും റിച്ച മിന്നും പ്രകടനം നടത്തി. ഗ്രൂപ്പ് ഘട്ടത്തിൽ സൗത്ത് ആഫിക്കക്കതിരെ റിച്ച നടത്തിയ പോരാട്ടമാണ് ഏറെ ശ്രദ്ധേയമായത്. 94 റൺസാണ് താരം നേടിയത്. മത്സരത്തിൽ 102 റൺസിന്‌ ആറ് വിക്കറ്റുകൾ എന്ന നിലയിൽ തകർന്ന ഇന്ത്യയെ റിച്ചയുടെ ഇന്നിംഗ്സ് ആയിരുന്നു കരകയറ്റിയത്‌. 

കലാശപ്പോരാട്ടത്തിൽ സൗത്ത് ആഫ്രിക്കയെ വീഴ്ത്തിയാണ് ഹർമൻപ്രീത് കൗറും സംഘവും ലോകത്തിന്റെ നെറുകയിലെത്തിയത്‌. ചരിത്രത്തിലെ മൂന്നാം ലോകകപ്പ് ഫൈനലിലെത്തിയ ഇന്ത്യ ഇത്തവണ കിരീടം നേടിയാണ് മടങ്ങിയത്. ഇതിന് മുമ്പ് 2005ലും 2017ലുമാണ് ഇന്ത്യ ഫൈനൽ യോഗ്യത നേടിയിരുന്നത്. എന്നാൽ ഈ രണ്ട് ഫൈനലിലും ഇന്ത്യ പരാജയപ്പെടുകയായിരുന്നു. 

ഫൈനലിൽ സൗത്ത് ആഫ്രിക്കയെ 52 റൺസിനാണ് ഇന്ത്യ കീഴടക്കിയത്. മത്സരത്തിൽ ടോസ് നേടിയ സൗത്ത് ആഫ്രിക്ക ഇന്ത്യയെ ബാറ്റിങ്ങിനയക്കുകയായിരുന്നു. ആദ്യം ബാറ്റ് ചെയ്ത ഇന്ത്യ 50 ഓവറിൽ ഏഴ് വിക്കറ്റ് നഷ്ടത്തിൽ 298 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ സൗത്ത് ആഫ്രിക്ക 45.3 ഓവറിൽ 246 റൺസിന്‌ പുറത്താവുകയായിരുന്നു. 

Indian World Cup hero Richa Ghosh to be honoured by her hometown. West Bengal Chief Minister Mamata Banerjee announced that a new cricket stadium in Darjeeling will be named after Richa Ghosh. The West Bengal Chief Minister announced this at a function held to honour Richa.