പാലക്കാട്: ഭാര്യയേയും മകനേയും യാത്രയാക്കാൻ റെയിൽവേ സ്റ്റേഷനിലെത്തിയ യുവാവിന് അതേ ട്രെയിനിന്റെ അടിയിൽപ്പെട്ട് ദാരുണാന്ത്യം. . പാലക്കാട് ജില്ലയിലെ പട്ടാമ്പി റെയിൽവേ സ്റ്റേഷനിലാണ് ഈ സംഭവം നടന്നത്. ഉത്തർപ്രദേശ് സ്വദേശിയായ ഇക്ബാൽ ഖാനാണ് മരണപ്പെട്ടത് . വൈകുന്നേരം ഏഴ് മണിയോടെ ഒന്നാം നമ്പർ പ്ലാറ്റ്ഫോമിൽ എറണാകുളം-നിസാമുദ്ദീൻ മംഗള എക്സ്പ്രസിന്റെ അടിയിൽപ്പെട്ടാണ് അപകടം.

ഭാര്യയെയും മകനെയും ട്രെയിനിലേക്ക് കയറ്റിവിട്ട ശേഷം ലഗേജുകൾ ട്രെയിൽ ഏറ്റിവച്ചുകഴിഞ്ഞാണ് ഇക്ബാൽ ഖാൻ അപകടത്തിൽ പെടുന്നത്. എസ്-വൺ കമ്പാർട്ട്മെന്റിലാണ് കുടുംബാംഗങ്ങളെ ഇയാൾ കയറ്റിവിട്ടത്. ട്രെയിൻ നീങ്ങിത്തുടങ്ങിയ ഉടനെയാണ് ഇക്ബാൽ ഖാൻ പ്ലാറ്റ്ഫോമിൽ നിന്ന് തെന്നി ട്രാക്കിലേക്ക് വീണത്. ഈ ദാരുണ ദൃശ്യം കണ്ട് ഭാര്യയും ബഹളം വെച്ചപ്പോൾ. യാത്രക്കാർ ഉടൻ തന്നെ ചെയിൻ വലിച്ച് ട്രെയിനെ അടിയന്തരമായി നിർത്തുകയായിരുന്നു.

ഉത്തർപ്രദേശിൽ നിന്ന് കുടുംബത്തോടൊപ്പം കേരളത്തിലെത്തിയ ഇക്ബാൽ ഖാൻ, ഭാര്യയെയും മകനെയും ഡൽഹിയിലേക്ക് യാത്രയാക്കാനാണ് പട്ടാമ്പി സ്റ്റേഷനിലെത്തിയത്. എല്ലാം സുഗമമായി പൂർത്തിയായ ശേഷം, ട്രെയിൻ യാത്ര ആരംഭിക്കുന്നതിന് തൊട്ടുമുമ്പ് ഇയാൾ പ്ലാറ്റ്ഫോമിന്റെ അരികിൽ നിന്ന് തെന്നി വീഴുകയായിരുന്നു. പ്രാഥമിക അന്വേഷണത്തിൽ, പ്ലാറ്റ്ഫോമിലെ തിരക്കോ ശ്രദ്ധക്കുറവോ ആയിരിക്കാം അപകടകാരണമെന്ന് പൊലിസ് സൂചിപ്പിക്കുന്നു. ഇക്ബാൽ ഖാന്റെ മൃതദേഹം പട്ടാമ്പി പൊലിസിന്റെ നിർദേശപ്രകാരം സമീപത്തെ ആശുപത്രിയിലേക്ക് മാറ്റി. പോസ്റ്റ്മോർട്ടം പരിശോധനയ്ക്ക് ശേഷം മൃതദേഹം കുടുംബത്തിന് കൈമാറും.

പട്ടാമ്പി പൊലിസ് സംഭവസ്ഥലത്ത് എത്തി അന്വേഷണം ആരംഭിച്ചു. സ്റ്റേഷൻ അധികൃതരുമായി ചേർന്ന് സിസിടിവി ഫൂട്ടേജുകൾ പരിശോധിക്കുന്നുണ്ട്. റെയിൽവേ പൊലിസും സംഭവത്തിൽ അന്വേഷണത്തിന് പിന്തുണ നൽകുന്നു. ഈ അപകടം റെയിൽവേ സ്റ്റേഷനുകളിലെ സുരക്ഷാ നടപടികളുടെ പ്രാധാന്യം വീണ്ടും ഓർമിപ്പിക്കുന്നതാണ്.