ലോകത്തിലെ ഏറ്റവും മോശപ്പെട്ട വാര്‍ത്താചാനലുകളിലാണ് ഇന്ത്യന്‍ ചാനലുകളുടെ സ്ഥാനമെന്ന് ദ ഹിന്ദു മുന്‍ എഡിറ്റര്‍ എന്‍.റാം. 'ദ വയര്‍' പോര്‍ട്ടലില്‍ കരണ്‍ ഥാപ്പറുമായുള്ള അഭിമുഖത്തിനിടെയാണ് അദ്ദേഹത്തിന്റെ വിമര്‍ശനം. ബിഹാര്‍ തെരഞ്ഞെടുപ്പ് വിശകലനം ചെയ്യുന്നതിനിടെയാണ് പ്രചാരണവുമായി ബന്ധപ്പെട്ട  മാധ്യമ കവറേജും ചര്‍ച്ചയില്‍ വന്നത്. 

'ബിഹാര്‍ തെരഞ്ഞെടുപ്പിലെ ടെലിവിഷന്‍ സംപ്രേഷണം ... അത് ഭയാനകമായിരുന്നു. ലോകത്തിലെ ഏറ്റവും മോശം ചാനലുകളില്‍ ഒന്നായിരിക്കണം അത്. അതിനി  ഹിന്ദി വാര്‍ത്താ ചാനലുകളിലാവട്ടെ മറ്റ് ദേശീയ ടിവി വാര്‍ത്താ ചാനലുകളിലാവട്ടെ. അവതരണം അങ്ങേഅറ്റം മോശമായിരുന്നു. മിക്കവാറും എല്ലാ കാര്യങ്ങളിലും.'

ദി വയറിനു വേണ്ടി കരണ്‍ ഥാപ്പറിന് നല്‍കിയ 24 മിനിറ്റ് നീണ്ട അഭിമുഖത്തില്‍ റാം ചൂണ്ടിക്കാട്ടി. 

ALSO READ: ഡല്‍ഹി സ്‌ഫോടനം: പൊട്ടിത്തെറിയുണ്ടായത് സ്‌ഫോടക വസ്തുക്കള്‍ മറ്റൊരിടത്തേക്ക് മാറ്റുമ്പോഴെന്ന് സൂചന; അന്വേഷണം ഊര്‍ജ്ജിതമായി തുടരുന്നു

പ്രധാനമന്ത്രിയോ ആഭ്യന്തരമന്ത്രിയോ ഒരു റാലിയെ അഭിസംബോധന ചെയ്യുമ്പോഴെല്ലാം തത്സമയം സംപ്രേഷണം ചെയ്യുന്ന ദേശീയ ടെലിവിഷന്‍ വാര്‍ത്താ ചാനലുകളുടെ രീതിയെയും റാം നിശിതമായി വിമര്‍ശിച്ചു. 

 'ലൈവ് നല്‍കുന്നത് മിക്കവാറും ചാനല്‍ ഒരു വാര്‍ത്താ ബുള്ളറ്റിനിന്റെ മധ്യത്തില്‍ വരെ ആവാറുണ്ട്. മുമ്പ് പലതവണ പറഞ്ഞ കാര്യങ്ങള്‍ ആവര്‍ത്തിക്കുകയാണ്  മന്ത്രിമാര്‍ ആവര്‍ത്തിക്കുന്നത്. ഈ വസ്തുത കണക്കിലെടുക്കാതെയാണ് അവരുടെ പ്രസംഗം മുഴുനീളത്തില്‍ തത്സമയം കൊടുക്കുന്നത്. ഇത് പാദസേവയല്ലാതെ മറ്റെന്താണ്?' -റാം ചോദിക്കുന്നു. 

ടെലിവിഷന്‍ വാര്‍ത്താ ചാനലുകളും സര്‍ക്കാരും തമ്മിലുള്ള അവിശുദ്ധ ബന്ധത്തെയും അദ്ദേഹം തുറന്നുകാട്ടി. ചാനലുകള്‍ ഹിന്ദുത്വയുടെ ഉപകരണമാവുന്നതിനെക്കുറിച്ചും അദ്ദേഹം അഭിമുഖത്തിനിടെ സൂചിപ്പിച്ചു. ആ അവിശുദ്ധ ബന്ധം മുമ്പത്തേക്കാളെല്ലാം ശക്തമാണിപ്പോള്‍. ഈ കാണുന്ന പാദസേവയും സ്തുതിപാഠനവുമാണ് അതിന്റെ അനിവാര്യമായ ഫലം' -അദ്ദേഹം പറഞ്ഞു.

നുഴഞ്ഞുകയറ്റക്കാരും അതിക്രമിച്ച് കടക്കുന്നവരും രാജ്യത്ത് പ്രവേശിച്ച് വോട്ടര്‍മാരായി മാറുന്നതിനെക്കുറിച്ച് പ്രധാനമന്ത്രിയും ആഭ്യന്തരമന്ത്രിയും നടത്തുന്ന പ്രതികരണങ്ങള്‍ കൃത്യമായി മുസ്‌ലിംകള്‍ക്കെതിരായതാണെന്ന് വ്യക്തമായിട്ടും ഇന്ത്യന്‍ മാധ്യമങ്ങള്‍ അതിനെ വിമര്‍ശിക്കുന്നില്ല. ഇത് ഗുരുതര വീഴ്ചയാണ്. ഇക്കാര്യം ഉയര്‍ത്തിക്കാട്ടുന്നതിലും തുറന്നുകാട്ടുന്നതിലും അപലപിക്കുന്നതിലും പരാജയപ്പെടുന്നത് ഇന്ത്യന്‍ മാധ്യമങ്ങളുടെ ഭാഗത്തുനിന്നുണ്ടാകുന്ന ഹീനമായ പരാജയമാണ്- അദ്ദേഹം ചൂണ്ടിക്കാട്ടി.  

former editor of the hindu, n. ram, strongly criticized indian news channels, calling them among the worst in the world. read more about his remarks on the state of indian media and journalism standards.