റിയാദ്: ജോർജിയയിൽ (Sighnaghi) തുർക്കിയുടെ സൈനിക വിമാനം തകർന്ന് 20 സൈനികർ മരിച്ച സംഭവത്തിൽ അനുശോചനം അറിയിച്ച് സഊദി അറേബ്യ.

ബുധനാഴ്ച വൈകുന്നേരമാണ് സഊദി വിദേശകാര്യ മന്ത്രാലയം തുർക്കി അധികൃതർക്ക് അനുശോചന സന്ദേശം അയച്ചത്. ഈ ദുരന്തത്തിൽ തുർക്കി സർക്കാരിനും ജനങ്ങൾക്കും സഊദി അറേബ്യ ഐക്യദാർഢ്യം പ്രഖ്യാപിക്കുന്നതായി മന്ത്രാലയം അറിയിച്ചുവെന്ന് സഊദി പ്രസ് ഏജൻസി (SPA) റിപ്പോർട്ട് ചെയ്തു.

ALSO READ: കുതിച്ചുയർന്ന് സ്വർണവില: 24കാരറ്റ് ഗ്രാമിന് 500 ദിർഹം കടന്നു

അസർബൈജാനിൽ നിന്ന് തുർക്കിയിലേക്ക് മടങ്ങുകയായിരുന്ന സി-130 കാർഗോ വിമാനമാണ് അപകടത്തിൽപ്പെട്ട് തകർന്നുവീണത്. ജോർജിയയിലെ സിഗ്നാഗി മുനിസിപ്പാലിറ്റിയിലാണ് വിമാനം തകർന്നുവീണതെന്ന് ജോർജിയൻ ആഭ്യന്തര മന്ത്രാലയവും വ്യക്തമാക്കി. അതേസമയം, അപകടത്തെക്കുറിച്ച് അന്വേഷണം ആരംഭിച്ചതായും അധികൃതർ കൂട്ടിച്ചേർത്തു. നാറ്റോ അംഗരാജ്യമായ തുർക്കിക്ക് 2020-ൽ സിറിയയിലെ പോരാട്ടത്തിൽ 33 സൈനികരെ നഷ്ടപ്പെട്ടതിന് ശേഷം രാജ്യത്തിന് ഉണ്ടാകുന്ന ഏറ്റവും വലിയ സൈനിക നഷ്ടമാണിത്.

ലോജിസ്റ്റിക്കൽ പ്രവർത്തനങ്ങൾക്കും ഉദ്യോഗസ്ഥരെ കൊണ്ടുപോകുന്നതിനുമായി തുർക്കി സൈന്യം വ്യാപകമായി ഉപയോഗിക്കുന്ന വിമാനമാണ് സി-130. തുർക്കിയും അസർബൈജാനും തമ്മിൽ അടുത്ത സൈനിക സഹകരണമാണ് നിലനിൽക്കുന്നത്. വിമാനം തകർന്നതിനെ തുടർന്ന് ആളപായമുണ്ടായതായി തുർക്കി പ്രസിഡന്റ് റജബ് ത്വയ്യിബ് ഉർദുഗാൻ അറിയിച്ചു.

Saudi Arabia has expressed its sincere condolences to Turkey after a Turkish military aircraft crashed in Sighnaghi, Georgia, killing 20 soldiers. The Saudi Ministry of Foreign Affairs affirmed the Kingdom's solidarity with the Government of Turkey during this difficult time.