കൊച്ചി: തദ്ദേശ തെരഞ്ഞെടുപ്പിനിടെയുള്ള സമഗ്ര വോട്ടര്‍പട്ടിക പരിഷ്‌കരണ നടപടികള്‍ നിര്‍ത്തിവെക്കണമെന്ന് ആവശ്യപ്പെട്ട് സംസ്ഥാന സര്‍ക്കാര്‍ ഹൈക്കോടതിയില്‍. വോട്ടര്‍ പട്ടിക തീവ്ര പരിഷ്‌കരണത്തിന് അടിയന്തിര പ്രാധാന്യമില്ല. വോട്ടര്‍ പട്ടിക തീവ്ര പരിഷ്‌കരണം ഉദ്യോഗസ്ഥ ക്ഷാമത്തിന് കാരണമാകുന്നുവെന്ന് ചൂണ്ടിക്കാട്ടിയാണ് സര്‍ക്കാര്‍ ഹൈക്കോടതിയെ സമീപിച്ചിരിക്കുന്നത്. 

''സംസ്ഥാനത്ത് തദ്ദേശ തെരഞ്ഞടുപ്പും എസ്ഐആറും ഒരേസമയത്താണ് നടക്കുന്നത്. ഇത് ഭരണപരമായ പ്രതിസന്ധി ഉണ്ടാക്കും. നിലവിലെ തദ്ദേശസ്ഥാപനങ്ങളുടെ കാലാവധി ഡിസംബര്‍ 20നാണ് അവസാനിക്കുക. 21നകം പുതിയ ഭരണസമിതി അധികാരമേല്‍ക്കേണ്ടതുണ്ട്. ഇതിനായി ഡിസംബര്‍ ഒന്‍പതിനും പതിനൊന്നിനും തെരഞ്ഞെടുപ്പും പതിമൂന്നാം തീയതി വോട്ടെണ്ണലും നിശ്ചയിച്ചിട്ടുണ്ട്. ഇത് സംബന്ധിച്ച നടപടിക്രമങ്ങളെല്ലാം ഡിസംബര്‍ പതിനെട്ടിനകം പൂര്‍ത്തിയാക്കണം. എന്നാല്‍ നവംബര്‍ നാലിനും ഡിസംബര്‍ നാലിനും ഇടയില്‍ എസ്ഐആര്‍ പൂര്‍ത്തിയാക്കണമെന്നാണ് കേന്ദ്ര തെരഞ്ഞെടുപ്പ് കമ്മീഷന്റെ നിര്‍ദേശം. ഇത് പ്രായോഗികമായി ബുദ്ധിമുട്ടാണ്. ഇത് രണ്ടും ഒന്നിച്ച് നടത്തേണ്ട ഉദ്യോഗസ്ഥര്‍ സംസ്ഥാനത്ത് ഇല്ല. അതുകൊണ്ടുതന്നെ എസ്.ഐ.ആര്‍ നിര്‍ത്തിവയ്ക്കണം''- ഹരജിയില്‍ പറയുന്നു. 

അതേസമയം, എസ്.ഐ.ആര്‍ ഹരജികള്‍ സുപ്രിംകോടതിയുടെ പരിഗണനയിലുള്ള സാഹചര്യത്തില്‍ അവിടെ സമീപിച്ചുകൂടെ എന്ന് ഹൈക്കോടതി വാക്കാല്‍ ആരാഞ്ഞു. 

ALSO READ: ഗുജറാത്തില്‍ പശുവിനെ കൊന്നതിന് മൂന്നുപേര്‍ക്ക് ജീവപര്യന്തം തടവുശിക്ഷ വിധിച്ച് കോടതി; ചരിത്രപരമായ വിധിയെന്ന് സര്‍ക്കാര്‍

നടപടികള്‍ നീട്ടിവെക്കണമെന്ന ആവശ്യം തെരഞ്ഞെടുപ്പ് കമ്മിഷന്‍ എതിര്‍ത്തു. നീട്ടിവെക്കണം എന്നാല്‍ പരോക്ഷമായി എസ്.ഐ.ആര്‍ തടസപ്പെടുത്തുകയാണ്. ചില രാഷ്ട്രീയ പാര്‍ട്ടികളും വ്യക്തികളും സംഘടനകളും എസ്.ഐ.ആര്‍ നടപ്പിലാക്കാതിരിക്കാന്‍ ശ്രമിക്കുന്നുണ്ടെന്നും തെരഞ്ഞെടുപ്പ് കമമിഷന്‍ കോടതിയെ അറിയിച്ചു. എസ്.ഐ.ആര്‍ ഫോമില്‍ എപിക് നമ്പര്‍ ഉള്‍പ്പടെ പകുതിയിലേറെ വിവരങ്ങള്‍ കമ്മിഷന്‍ തന്നെ രേഖപ്പെടുത്തിയിട്ടുണ്ട്. വോട്ടര്‍ ഇത് പരിശോധിച്ച് ഒപ്പ് വെച്ചാല്‍ മാത്രം മതി. നടപടികള്‍ തുടങ്ങിക്കഴിഞ്ഞു. ഇടയ്ക്ക് വെച്ച് തടസ്സപ്പെടുത്തിയാല്‍ പ്രതിസന്ധി ഉണ്ടാകും. തദ്ദേശ തെരഞ്ഞെടുപ്പിനെ ബാധിക്കാത്ത വിധത്തിലായിരിക്കണം എസ്.ഐ.ആര്‍ നടപടികള്‍ എന്ന് നിര്‍ദ്ദേശിച്ചിരുന്നു. ഉദ്യോഗസ്ഥ ക്ഷാമം ഉണ്ടെന്ന് സംസ്ഥാന തെരഞ്ഞെടുപ്പ് കമ്മിഷന്‍ അറിയിച്ചിട്ടില്ലെന്നും കേന്ദ്ര തെരഞ്ഞെടുപ്പ് കമ്മിഷന്‍ വ്യക്തമാക്കി. 

English Summary: The Kerala High Court has questioned the state government for approaching it with a plea to stay the SIR (Special Investigation Report) proceedings, asking why the government did not approach the Supreme Court instead. The state government had filed a petition seeking to halt further action based on the SIR, but the High Court observed that the matter might be more appropriate for the Supreme Court’s consideration.