ദുബൈ: ട്രാഫിക് പിഴകളിൽ 50% കിഴിവ് വാഗ്ദാനം ചെയ്യുന്ന വ്യാജ ഓൺലൈൻ പ്രചാരണത്തിനെതിരെ ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) രംഗത്ത്. ഇതുസംബന്ധിച്ച് ദുബൈ ആർടിഎ പൊതുജനങ്ങൾക്ക് ശക്തമായ മുന്നറിയിപ്പ് നൽകി. ആർടിഎ സേവനങ്ങളിൽ കിഴിവ് ലഭിക്കുമെന്ന് അവകാശപ്പെടുന്ന ഈ തട്ടിപ്പ്, താമസക്കാരെ കബളിപ്പിക്കാൻ ഇമെയിലുകളിലൂടെയും സോഷ്യൽ മീഡിയ പ്ലാറ്റ്‌ഫോമുകളിലൂടെയുമാണ് പ്രചരിപ്പിക്കുന്നത്.

"ഇന്ന് ഓൺലൈനായി പണമടച്ചാൽ ആർടിഎ സേവനങ്ങളിൽ പകുതി കിഴിവ് ലഭിക്കും" എന്ന് വാഗ്ദാനം ചെയ്യുന്ന ഓഫർ അതോറിറ്റിയുടേതല്ലെന്ന് അധികൃതർ വ്യക്തമാക്കി.

ALSO READ: റെക്കോഡ് നേട്ടവുമായി ഇത്തിഹാദ് എയർവേസ്; 9 മാസ ലാഭം 1.7 ബില്യൺ ദിർഹം; 26% വർധന; 16.1 ദശലക്ഷം യാത്രക്കാർ 

ആർടിഎയുടെ ഔദ്യോഗിക 'എക്‌സ്' അക്കൗണ്ടിൽ ഒരു ദുബൈ നിവാസി ഈ വ്യാജ ഓഫറിന്റെ ചിത്രം പങ്കുവെച്ചതിനെ തുടർന്നാണ് അധികൃതർ വിശദീകരണവുമായി രംഗത്തെത്തിയത്. ഡിജിറ്റൽ സേവന ഉപയോക്താക്കളെ തെറ്റിദ്ധരിപ്പിക്കാൻ ലക്ഷ്യമിട്ടുള്ള വഞ്ചനാപരമായ പ്രവൃത്തിയാണ് ഇത്തരം പ്രചാരണങ്ങളെന്ന് ആർടിഎ മുന്നറിയിപ്പ് നൽകി. ഈ പേജിന് അതോറിറ്റിയുമായി യാതൊരു ബന്ധവുമില്ലെന്നും അധികൃതർ വ്യക്തമാക്കി.

ഔദ്യോഗിക മാർഗ്ഗങ്ങൾ മാത്രം ഉപയോഗിക്കുക

ദുബൈ നിവാസികൾ അതീവ ജാഗ്രത പാലിക്കണമെന്ന് ആർടിഎ നിർദ്ദേശിച്ചു. സംശയാസ്പദമായ ലിങ്കുകളിൽ ക്ലിക്ക് ചെയ്യുന്നതും അനൗദ്യോഗിക ഉറവിടങ്ങളിലൂടെ പണം അടയ്ക്കുന്നതും ഒഴിവാക്കണം.

പിഴകൾ അടയ്ക്കുന്നതിനും ആർടിഎയുടെ മറ്റ് സേവനങ്ങൾ ഉപയോഗിക്കുന്നതിനും അതോറിറ്റിയുടെ ഔദ്യോഗിക വെബ്‌സൈറ്റ്, ടിക്കറ്റ് ഓഫീസുകൾ, അംഗീകൃത വെൻഡിംഗ് മെഷീനുകൾ തുടങ്ങിയ അംഗീകൃത മാർ​ഗങ്ങൾ മാത്രം ഉപയോഗിക്കണമെന്നും അധികൃതർ ആവശ്യപ്പെട്ടു.

ALSO READ: ദുബൈ ഫിറ്റ്നസ് ചലഞ്ച് ടി 100 ട്രയാത്ത്‌ ലൺ: നാളെ പുതുക്കിയ സാലിക് ടോൾ നൽകണം 

യുഎഇയിൽ ഓൺലൈൻ തട്ടിപ്പുകൾ വർദ്ധിക്കുന്നു

വ്യാജ ട്രാഫിക് പിഴകൾ, യാത്രാ ടിക്കറ്റുകൾ, ട്രേഡിംഗ് പ്ലാറ്റ്‌ഫോമുകൾ എന്നിവയുൾപ്പെടെയുള്ള ഓൺലൈൻ തട്ടിപ്പുകൾ യുഎഇയിൽ വർധിച്ചുവരുന്ന സാഹചര്യത്തിലാണ് അധികൃതരുടെ മുന്നറിയിപ്പ്. യുഎഇ സൈബർ സുരക്ഷാ കൗൺസിലും ആഭ്യന്തര മന്ത്രാലയവും ഈ വിഷയത്തിൽ നേരത്തെ തന്നെ ജാഗ്രത നിർദ്ദേശങ്ങൾ പുറപ്പെടുവിച്ചിരുന്നു.

അധികൃതർ നൽകുന്ന പ്രധാന ഉപദേശങ്ങൾ

• ഔദ്യോഗിക എയർലൈൻ അല്ലെങ്കിൽ വ്യാപാര വെബ്‌സൈറ്റുകൾ മാത്രം ഉപയോഗിക്കുക.
• URL-കളും സന്ദേശം അയച്ചയാളുടെ ഐഡന്റിറ്റികളും കൃത്യമായി പരിശോധിക്കുക.
• സത്യമാകാൻ സാധ്യതയില്ലാത്തത്ര ആകർഷകമായ ഡീലുകൾക്കെതിരെ ജാഗ്രത പാലിക്കുക.
• വിശ്വസനീയമല്ലാത്ത രീതികളിലൂടെയോ ലിങ്കുകളിലൂടെയോ പണമടയ്ക്കുന്നത് ഒഴിവാക്കുക.

ഇരകളെ കബളിപ്പിക്കാൻ തട്ടിപ്പുകാർ ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള ഡിജിറ്റൽ ഉപകരണങ്ങൾ കൂടുതലായി ഉപയോഗിക്കുന്നുണ്ടെന്ന് ഉദ്യോഗസ്ഥർ പറഞ്ഞു. വ്യക്തിഗത, ബാങ്കിംഗ് വിവരങ്ങൾ സംരക്ഷിക്കേണ്ടതിന്റെയും ഏതെങ്കിലും ഇടപാടുകൾക്ക് മുമ്പ് എല്ലാ സന്ദേശങ്ങളും ഉറവിടങ്ങളും പരിശോധിച്ചുറപ്പിക്കേണ്ടതിന്റെയും പ്രാധാന്യം അവർ ചൂണ്ടിക്കാട്ടി.

Dubai’s Roads and Transport Authority has confirmed that the viral message claiming a 50% discount on traffic fines if paid today is completely fake. The RTA urged residents to rely only on official announcements made through its website and verified platforms.